ព័ត៌មានជាតិ

អភិបាលខណ្ឌច្បារអំពៅ នាំចៅសង្កាត់ព្រែកប្រា ចុះពិនិត្យទឹកលូលិចចូលផ្ទះពលរដ្ឋ

បានផុស

៨ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

កាលពីព្រឹកថ្ងៃទី ៩ តុលា នេះ លោក ចេង មុនីរ៉ា អភិបាលខណ្ឌច្បារអំពៅ បានដឹកនាំកម្លាំងជំនាញ ពិសេសលោកស្រី ជួប ស៊ីយ៉ុន ចៅសង្កាត់ព្រែកប្រា ចុះទៅពិនិត្យមើលទីតាំងភូមិអូរអណ្តូង ១ ដែលកំពុងរងគ្រោះដោយទឹកលូច្រាលចេញធ្វើឲ្យលិចលង់ផ្ទះសម្បែងរបស់ប្រជាពលរដ្ឋពិបាករស់នៅបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋបានបញ្ចេញមតិដូចៗ គ្នាថា ពលរដ្ឋរងគ្រោះដោយទឹកលូលិចលង់ផ្ទះអស់រយៈពេល ១០ ថ្ងៃ មកហើយ មិនដែលឃើញលោកស្រី ជួប ស៊ីយ៉ុន ចៅសង្កាត់ព្រែកប្រា ដែលទើបឡើងតំណែងថ្មីៗ ចុះមកសាកសួរសុខទុក្ខពួកគាត់ដែលកំពុងរងគ្រោះដោយទឹកលូដ៏ខ្មៅកខ្វក់ មានជះក្លិនស្អុយម្តងណាឡើយ។ អ្វីដែលកំពុងប្រឈមនោះ គឺ ប្រជាពលរដ្ឋរស់ជាមួយទឹកសំអុយ បង្កទៅជាកើតជំងឺកមរមាស់ ឆ្លងជំងឺអាសន្នរោគ និងជំងឺគ្រុនឈាម។

ប្រជាពលរដ្ឋពេលបានឃើញលោកអភិបាលខណ្ឌច្បារអំពៅចុះមកពិនិត្យទីតាំងដោយផ្ទាល់បែបនេះ សង្ឃឹមថា លោកនឹងជួយអន្តរាគមន៍ដាក់ម៉ាស៊ីនបូមទឹកសំអុយឲ្យបានឆាប់រីងស្ងួតដូចដើម ព្រោះបច្ចុប្បន្នសូម្បីបន្ទោបង់នៅបង្គន់អនាម័យតាមផ្ទះពុំបានផង។