ចលនាមហាជនកាន់តែខ្លាំងក្លាក្នុងការបន្តផ្តល់ជំនួយជួយដល់ជនភៀសសឹកនិងវីរកងទ័ពនៅសមរភូមិមុខ

កម្លាំងសប្បុរសធម៌របស់មហាជនក៏ដូចជាប្រជាពលរដ្ឋកម្ពុជាកាន់តែផុលផុសខ្លាំងក្លាក្នុងការបន្តផ្តល់ជំនួយឧបត្ថម្ភជួយដល់វីរជនកងទ័ពនិងជនភៀសសឹកដែលកំពុងនៅសមរភូមិមុខ។

ជាក់ស្ដែងនៅព្រឹកថ្ងៃទី១១ខែធ្នូឆ្នាំ២០២៥នេះនៅទីតាំងក្នុងតំបន់អភិវឌ្ឍន៍បឹងកក់ស្ថិតក្នុងខណ្ឌដូនពេញបន្តមានការរៀបចំរោងសម្រាប់ការទទួលជំនួយឧបត្ថម្ភនានាមានជាស្បៀងអាហារសម្ភារខោអាវសម្លៀកបំពាក់ក៏ដូចជាថវិការជាដើមពីបណ្តាបងប្អូនសប្បុរសជនមកពីគ្រប់មជ្ឈដ្ឋានដើម្បីរៀបចំចាត់ចែងបន្តបញ្ជូនទៅកាន់សមរភូមិមុខក្នុងគ្រាដែលកម្ពុជាកំពុងទទួលរងនូវការឈ្លានពានទឹកដីដ៏ធ្ងន់ធ្ងរពីកម្លាំងយោធាប្រទេសថៃ។

ពលរដ្ឋដែលបានរួមចំណែកផ្តល់ជាជំនួយឧបត្ថម្ភបានសម្តែងក្តីរីករាយពេញចិត្តក្នុងការចូលរួម ជាមួយសកម្មភាពសប្បុរសនៅពេលនេះដែលកាលៈទេសៈនេះគឺជាពេលវេលាដែលពលរដ្ឋខ្មែរចាំបាច់ត្រូវរួបរួមគ្នាខ្មែរស្រឡាញ់ខ្មែរសាមគ្គីភាពគ្នាជាថ្លុងមួយដើម្បីជួយដល់ប្រទេសជាតិ ពិសេសជួយដល់វីរកងទ័ពអង់អាចហានក្លារបស់កម្ពុជាដែល កំពុងឈរជើងរឹងមាំក្នុងការការពារដែនអធិបតេយ្យភាពទឹកដីរបស់កម្ពុជាពីការឈ្លានពានរបស់ខ្មាំងសត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋបានសង្កត់ធ្ងន់ថា ទោះក្នុងកាលៈទេសៈណាក៏នៅតែ ជឿជាក់យ៉ាងមុតមាំលើ ប្រមុខរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន  ម៉ាណែត នាយករដ្ឋមន្រ្តី ក្នុងការដឹកនាំបញ្ជា។

គួរបញ្ជាក់ថា៖តាមរយៈសកម្មភាពសប្បុរសនេះប្រជាជននិងសប្បុរសជននានាបាននឹងកំពុងបង្កើនការស្រុះស្រួលគ្នាជួយជាថវិការ ជាបន្តបន្ទាប់តាមបណ្តាញទំនាក់ទំនងសង្គមពិសេសឧបត្ថម្ភសម្ភារ និងស្បៀងអាហារជាច្រើនទៅតាមបណ្តាទីតាំងសំខាន់ៗនានាដែលមានការរៀបចំទទួលជំនួយឧបត្ថម្ភជាក់ស្តែងដូចនៅក្នុងតំបន់អភិវឌ្ឍន៍បឹងកក់ជាដើម៕អត្ថបទ៖សុភា