ព័ត៌មានជាតិ

អ្នកឈឺកកកុញពេញពេទ្យ មានអ្នកជំងឺកូវីដ ១៦ នាក់ កំពុងសម្រាកព្យាបាលនៅផ្ទះ

បានផុស

៤ years មុន

នៅ

ថ្ងៃអាទិត្យ ១៨ មេសា ២០២១

ដោយ

ការឆ្លងកើនឡើង ខណៈដែលកន្លែងសម្រាកព្យាបាលកកកុញដោយអ្នកជំងឺ មកដល់ពេលនេះមានអ្នកជំងឺ ១៦ នាក់ ត្រូវបានក្រសួងសុខាភិបាលអនុញ្ញាតិឲ្យសម្រាកព្យាបាលនៅតាមផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអនុញ្ញាតិអ្នកជំងឺកម្រិតស្រាលសម្រាកព្យាបាលនៅផ្ទះ ក្រសួងសុខាភិបាលកម្ពុជាក៏បានណែនាំឲ្យមានការតាមដានរោគសញ្ញា និងការថែទាំដោយខ្លួនឯង។

ករណីគ្មានរោគសញ្ញាគួរឲ្យសង្ស័យ ដូចជា មិនក្អក កម្ដៅក្រោម៣៧.៥អង្សា មិនហៀរសំបោរ មិនឈឺបំពង់ក ដែលជាសភាពទូទៅធម្មតា មិនចាំបាច់ប្រើឱសថដើម្បីព្យាបាលនោះទេ។

ករណីកម្រិតស្រាល ហើយមានរោគសញ្ញា ដូចជា មានកម្ដៅលើសពី ៣៧.៥អង្សា មានអាការៈឈឺសាច់ដុំ ឈឺបំពង់ក ត្រូវប្រើថ្នាំជាបន្ទាន់ ក្នុងនោះសម្រាប់មនុស្សពេញវ័យ ដែលមានទំងន់ចាប់ពី៣០គីឡូក្រាមឡើងទៅ ត្រូវប្រើថ្នាំប៉ារ៉ាសេតាម៉ុល ៥០០មីល្លីក្រាម មួយថ្ងៃ៣ដង។ កុមារដែលមានទំងន់ចាប់ពី ២០ ទៅ ២៩គីឡូក្រាម ត្រូវប្រើប៉ារ៉ាសេតាម៉ុល ៣០០មីល្លីក្រាម មួយថ្ងៃ៣ដង ជាកំហិត។

ក្នុងករណីមានសញ្ញាបន្ថែមដូចជា តឹងច្រមុះ ឬហៀរសំបោ ឬក្អក មានឬមិនមានស្លេស សម្រាប់មនុស្សពេញវ័យ ឬកុមារអាយុចាប់ពីអាយុ ៦ឆ្នាំឡើងទៅ ត្រូវលេបថ្នាំ ប្រូម៉ិចស៊ីន (Bromhexion) ៨មីល្លីក្រាម មួយថ្ងៃបីដង ឬប្រសិនបើប្រើថ្នាំ សេទីរីហ្ស៉ីន (Cetirizine) គឺត្រូវលេប ១០មីល្លីក្រាម មួយថ្ងៃម្ដងតែប៉ុណ្ណោះ។

អ្នកជំងឺត្រូវស្នាក់នៅបន្ទាប់ដាច់ដោយឡែក ត្រូវពាក់ម៉ាស លាងសម្អាតដៃឲ្យបានញឹកញាប់ រក្សាគម្លាតយ៉ាងតិច២ម៉ែត្រ បរិភោគអាហារមានជីវជាតិគ្រប់គ្រាន់ ដូចជា សាច់ បន្លែ ផ្លែឈើ និងពិសារទឹកឲ្យបានច្រើន។ ជាមួយគ្នានេះ ត្រូវតាមដានសុខភាពខ្លួនឯង ឲ្យបានញឹកញាប់ទៀងទាត់ជាប្រចាំថ្ងៃ ថែរក្សាសុខភាពផ្លូវចិត្ត និងធ្វើលំហាត់ប្រាណឲ្យបានទៀងទាត់៕