គណៈកម្មការផ្សារអូរឫស្សី៖ ចលនារួបរួមកម្លាំងសាមគ្គីគ្នានៅតែបន្តផុលផុសរៀបចំជំនួយជួយទៅសមរភូមិមុខ

កម្លាំងចលនារួបរួមកម្លាំងសាមគ្គីគ្នារបស់អ្នកសមរភូមិក្រោយ នៅតែខ្លាំងក្លាក្នុងការរៀបចំជំនួយបន្តជួយទៅកាន់សមរភូមិមុខ ក្នុងការផ្តល់ជូនទៅកាន់វីរជនកងទ័ព និងពលរដ្ឋជនភៀសសឹក ដើម្បីជាការរួមចំណែកក្នុងគ្រាដែលប្រទេសជាតិ ត្រូវបានទទួលរងនូវការឈ្លានពានទឹកដីពីប្រទេសជិតខាង។

ជាក់ស្តែងនាព្រឹកថ្ងៃទី១៧ខែធ្នូឆ្នាំ២០២៥នេះ ក្រុមការងារគណៈកម្មការគ្រប់គ្រងផ្សារអូរឫស្សី ដឹកនាំដោយលោក ឡយ ស៊ាងអាង ប្រធានផ្សារនិងអាជីវករបានបន្តក្នុងការវិចខ្ជប់រៀបចំសម្ភារនិងស្បៀងអាហារ ដើម្បីបញ្ចូនទៅកាន់រដ្ឋបាលរាជធានីភ្នំពេញ ក្នុងការរៀបចំបញ្ចូនបន្តទៅកាន់សមរភូមិជួរមុខជូន ដល់ ជនភៀសសឹក និង វីរជនកងទ័ពរបស់កម្ពុជាដែលកំពុងច្បាំងទប់ទល់ពីការឈ្លានពានរបស់ខ្មាំងសត្រូវ។

លោក ឡយ ស៊ាងអាង ប្រធានគណៈកម្មការគ្រប់គ្រងផ្សារអូរឫស្សី ឲ្យដឹងថា ៖ ជាប្រចាំថ្ងៃគិតចាប់តាំងពីការឈ្លានពានឡើងកម្តៅកាន់តែខ្លាំងមក កម្លាំងសប្បុរសពីគ្រប់ទិសទីពិសេសអាជីវករលក់ដូរ ក្នុងផ្សារនៅតែបន្តការផ្តល់ជំនួយជាថវិការស្បៀងអាហារ សម្ភារប្រើប្រាស់ និង សម្លៀកបំពាក់ជាបន្តបន្ទាប់មកកាន់គណៈគ្រប់គ្រងផ្សារ។ ហើយក្រុមការងារគណៈកម្មការផ្សារតែងតែបានរៀបចំចាត់ចែងបញ្ចូនទៅសាលារាជធានីភ្នំពេញ ជាប្រចាំថ្ងៃផងដែរមានថ្ងៃខ្លះអាចបញ្ចូនទៅ០២ជើងក៏មានដែរព្រោះតែជំនួយច្រើន។

ក្នុងនោះផងដែរអាជីវករបានចូលរួមជាស្បៀងអាហារ និង បានចូលរួមទាំងចូលរួមបន្ថែមជាកម្លាំង ដើម្បីរៀបចំវិចខ្ជប់ស្បៀងអាហារដោយសម្តែងក្តីពេញចិត្តបំផុត ចំពោះការចូលរួមចំណែកជាមួយទុក្ខលំបាករបស់ប្រទេសជាតិ ទោះមិនបានកាន់អាវុធទៅច្បាំងជាមួយចោរសៀមឈ្លានពានក្តី តែអ្វីដែលពួកគាត់អាចជួយបាននៅពេលនេះគឺការរួបរួមកម្លាំងសាមគ្គីគ្នាជាថ្លុងមួយតែម្តង។

គួរបញ្ជាក់៖គិតត្រឹមថ្ងៃទី១៧ ខែធ្នូ ឆ្នាំ២០២៥នេះ មានរយៈពេល១១ថ្ងៃហើយដែលកងកម្លាំងយោធាប្រទេសថៃ បានបើកការបាញ់ប្រហារឈ្លានពានចូលមក ក្នុងដែនអធិបតេយ្យភាពរបស់កម្ពុជាយ៉ាងសាហាវព្រៃផ្សៃបំផុត ដោយបានបំផ្លិចបំផ្លាញហេដ្ឋារចនាសម្ព័ន្ធ ផ្ទះសម្បែងពលរដ្ឋ ប្រជាជនជាង៤០ម៉ឺននាក់ត្រូវភៀសសឹក ពិសេសបានសម្លាប់អាយុជីវិតពលរដ្ឋស្លូតត្រង់ជាច្រើនផងដែរ៕អត្ថបទ៖សុភា