កងរាជអាវុធហត្ថលើផ្ទៃប្រទេស ផ្សព្វផ្សាយផែនការរបស់រាជរដ្ឋាភិបាល ក្នុងការបិទខ្ទប់នៅរាជធានីភ្នំពេញនិងក្រុងតាខ្មៅ

កងរាជអាវុធហត្ថលើផ្ទៃប្រទេស នៅព្រឹកថ្ងៃទី១៩ ខែមេសា ឆ្នាំ២០២១នេះ បានផ្សព្វផ្សាយផែនការរបស់រាជរដ្ឋាភិ​បាល និងក្រមសីលធម៌ លិខិតបទដ្ឋានគតិយុត្ត ព្រមទាំងសារាចរស្ដីពីវិធានការបិទខ្ទប់នៅរាជធានីភ្នំពេញ និងក្រុងតាខ្មៅ ដល់កម្លាំងអន្តរាគមន៍ កងរាជអាវុធហត្ថលើផ្ទៃប្រទេស ដែលឈរតាមគោលដៅបិទខ្ទប់បម្រាមគោចរនានា។

ការផ្សព្វផ្សាយនេះ បានធ្វើឡើងក្រោយពីមានការអនុញ្ញាតពីនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងលោកឧត្តមសេនីយ៍ទោ ស សំបូរធន នាយសេនាធិការ កងរាជអាវុធហត្ថលើផ្ទៃប្រទេស ហើយពិធីនេះធ្វើឡើងក្រោមអធិបតីភាពលោកឧត្តមសេនីយ៍ត្រី អេង ហ៊ី ស្នងការ ស្នងការដ្ឋានទំនាក់ទំនងកិច្ចការសាធារណៈ និងជាអ្នកនាំពាក្យ កងរាជអាវុធហត្ថលើផ្ទៃប្រទេស។

សូមបញ្ជាក់ថា រាជរដ្ឋាភិបាល នៃព្រះរាជាណាចក្រកម្ពុជា បានចេញសេចក្តីសម្រេចមួយលេខ ៤៩ សសរ ចុះថ្ងៃទី១៤ ខែមេសា ឆ្នាំ២០២១ ស្ដីពីការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ប៉ុន្តែវិធានការនេះ ក៏មានការលើកលែងករណីមួយចំនួនផងដែរ ហើយបើតាមសម្តេចអគ្គមហាសេនាបតីតេជោ ហ៊ុន សែន បានបញ្ជាក់ថា វិធានការនេះ ធ្វើឡើងដោយតឹងរឹង តែទន់ភ្លន់ ហើយក៏មិនឲ្យប្រជាពលរដ្ឋដាច់ពោះនៅក្នុងអំឡុង នៃការបិទខ្ទប់នេះដែរ៕

អត្ថបទ៖កោះកែវ