អភិបាល​ខេត្តក្រចេះ ជំរុញ​ស្រ្តី​បង្កើន​ចំណេះដឹង​ ដើម្បីដើរឱ្យទាន់ការវិវត្តនៃបញ្ញាសិប្បនិម្មិត (AI)

ស្ត្រីម្នាក់ៗ គឺជាកម្លាំងចលករមិនអាចខ្វះបានក្នុងការកសាងរដ្ឋាភិបាល ឌីជីថលសង្គម និងសេដ្ឋកិច្ចឌីជីថល ធ្វើយ៉ាងណាដើម្បីធានាដល់ការអភិវឌ្ឍន៍ខ្លួនក្នុងវិស័យសាធារណៈ ឲ្យកាន់តែប្រសើរឡើងស្របទៅនឹងចក្ខុវិស័យរបស់ថ្នាក់ដឹកនាំខេត្ត ថ្នាក់ដឹកនាំក្រសួង ក៏ដូចជារាជរដ្ឋាភិបាល។

លោក វ៉ា ថន អភិបាលខេត្តក្រចេះ លើកឡើងបែបនេះ ក្នុងឱកាសអបអរសាទរទិវាអន្តរជាតិនារី ៨មីនា ខួបលើកទី១១៥ ឆ្នាំ២០២៦ ក្រោមប្រធានបទ “សន្តិភាព និងសន្តិសុខសម្រាប់ស្ត្រី និងគ្រួសារ” នារសៀលថ្ងៃទី៩ ខែមិនា ឆ្នាំ២០២៦ នៅសាលប្រជុំសាលាខេត្តក្រចេះ។

អភិបាលខេត្តក្រចេះបានបន្តលើកទឹកចិត្តឱ្យស្ត្រី និងកុមារីកម្ពុជាទាំងអស់ បន្តបង្កើនចំណេះដឹង ជំនាញបច្ចេកទេស និងភាសា ដើម្បីដើរឱ្យទាន់ការវិវត្តនៃបញ្ញាសិប្បនិម្មិត (AI) និងបច្ចេកវិទ្យាថ្មីៗ និងត្រូវមានជំនឿចិត្តលើខ្លួនឯង។

លោក វ៉ា ថន អភិបាលខេត្តក្រចេះ បានគូសបញ្ជាក់ថា ទិវានេះត្រូវបានធ្វើឡើងជារៀងរាល់ឆ្នាំ គឺមិនត្រឹមតែអបអរសាទរនូវសមភាព និងសិទ្ធិរបស់ស្ត្រីក្នុងសង្គមទំនើបប៉ុណ្ណោះទេ ប៉ុន្តែក៏ដើម្បីរំលឹកនិងដឹងគុណយ៉ាងជ្រាលជ្រៅចំពោះ «វីរភាពស្ត្រីកម្ពុជា» ដែលបានលះបង់គ្រប់បែបយ៉ាងក្នុងការកសាងបម្រើបុព្វហេតុការពារជាតិមាតុភូមិ។

អភិបាលខេត្ត បញ្ជាក់បន្ថែមថា សម្រាប់ប្រធានបទនាឆ្នាំនេះ គឺមានគោលបំណង រំលេចពីសារៈសំខាន់មិនអាចកាត់ថ្លៃបាននៃសន្តិភាព និងសន្តិសុខសម្រាប់ស្ត្រី និងក្រុមគ្រួសារ ដែលជាបុរេលក្ខខណ្ឌដ៏ចម្បង ញ៉ាំងឱ្យស្ត្រី និងក្រុមគ្រួសារបានរស់នៅជួបជុំប្រកបដោយសុភមង្គល សុខដុមរមនា សុខមាលភាពទាំងផ្លូវកាយ និងផ្លូវចិត្ត ជាការគូសបញ្ជាក់ពីការចូលរួមចំណែកយ៉ាងសកម្មរបស់ស្ត្រីក្នុងកិច្ចខិតខំប្រឹងប្រែងដើម្បីកសាង និងថែរក្សាសន្តិភាព ដែលជាធាតុផ្សំមិនអាចខ្វះបានសម្រាប់ការអភិវឌ្ឍប្រកបដោយចីរភាព ស្ថេរភាព និងវិបុលភាពសង្គម៕

អត្ថបទ៖ ប្រុញ វិធិន