អ្នក​ជំនាញ​ហិរញ្ញវត្ថុ បង្ហើប​​គន្លឹះ​​ជ្រើសរើស​គ្រឹះស្ថាន​​ធនាគារ​ស្របច្បាប់ ចៀសវាង​ជាប់បំណុល​វ័ណ្ឌក

អ្នកជំនាញ​ហិរញ្ញវត្ថុ​បាន​ប្រាប់​ពី​គន្លឹះ ក្នុងការ​ស្វែងរក​​គ្រឹះស្ថាន​ផ្តល់​សេវា​ហិរញ្ញវត្ថុ​ស្រប​ច្បាប់ ដើម្បី​ទទួលបាន​កិច្ចគាំពារ​ពេលជួប​ការ​លំបាក​ និង​អាច​បញ្ចៀស​បាន​ការ​ជាប់​បំណុលច្រើន​លើសលុប។

លោក ហេង កូយ នាយកមជ្ឍមណ្ឌលការពារអ្នកប្រើប្រាស់​សេវាហិរញ្ញវត្ថុបាន​ប្រាប់ពី​រូបភាព​​គ្រឹះស្ថាន​ហិរញ្ញវត្ថុស្របច្បាប់ ដែលមានសកម្មភាព​​ខុស​ពី​គ្រឹះស្ថាន​ខុសច្បាប់​ដែលអាច​ឲ្យអតិថិជនទទួលបាន​កិច្ច​ការពារ​តាមផ្លូវច្បាប់ និង​ចៀសបាន​ការ​ជាប់បំណុលវណ្ឌក​​រហូត​លក់ផ្ទះ លក់ទ្រព្យសម្បត្តិ​ដើម្បី​ដោះបំណុល។

លោក ហេង កូយ នាយកមជ្ឍមណ្ឌលការពារអ្នកប្រើប្រាស់​សេវាហិរញ្ញវត្ថុ

ភាព​ស្របច្បាប់ និង​ការត្រួតពិនិត្យ៖

គ្រឹះស្ថានហិរញ្ញវត្ថុស្របច្បាប់គឺមានអាជ្ញាប័ណ្ណពីធនាគារជាតិ ហើយត្រូវបាន​ចុះត្រួតពិនិត្យ​ជា​ប្រចាំ​ដើម្បីធានាថា ការប្រតិបត្តិការរបស់ពួក​គេស្រប​ទៅ​តាម​បទប្បញ្ញត្តិ​ត្រឹមត្រូវ។

ការវាយតម្លៃឥណទាន (Loan Assessment) យ៉ាងលម្អិត៖

មុននឹងផ្តល់កម្ចី គ្រឹះស្ថានស្របច្បាប់មានការវាយតម្លៃយ៉ាងលម្អិត ដោយតម្រូវ​ឲ្យឆ្លងកាត់​ការ​ត្រួតពិនិត្យ​ពិន្ទុ​ឥណទាន​តាមរយៈប្រព័ន្ធ CBC (Credit Bureau Cambodia)។ ផ្ទុយទៅវិញ អ្នកផ្តល់​កម្ចីមិន​ស្របច្បាប់​មិនខ្វល់ខ្វាយ​ពីការវាយតម្លៃនេះទេ គឺធ្វើយ៉ាងណា​ឲ្យតែបាន​បញ្ចេញលុយ​កម្ចី​ឲ្យបានលឿន។

ស្តង់ដារឥណទាន និងកិច្ចការពារអតិថិជន៖

ប្រព័ន្ធធនាគារស្របច្បាប់មានស្តង់ដារកម្ចីត្រឹមត្រូវ មានអនុលោមភាព មានប្រព័ន្ធទូរសព្ទ​សម្រាប់​ទំនាក់ទំនង (Hotline) និងមានយន្តការដូចជា FCPC ជាដើម។ ចំណែកឯកម្ចីក្រៅផ្លូវការវិញ គឺពួកគេ​ធ្វើតាម​តែអ្វីដែលពួកគេចង់ធ្វើ ដោយអាចប្រើប្រាស់​កុងត្រាដែល​តឹងរ៉ឹងដើម្បី​បង្ខំអតិថិជន​នៅ​ពេល​ក្រោយ។

តម្រូវការអតិថិជនល្អ៖

គ្រឹះស្ថានស្របច្បាប់ត្រូវការអតិថិជនដែលមានប្រវត្តិល្អ មានចំណូលស្ថិរភាព និងមាន​វិន័យ​ហិរញ្ញវត្ថុល្អ ខណៈ​គ្រឹះស្ថាន​មិនស្របច្បាប់ មិនខ្វល់ពីចំណុចទាំងនេះឡើយ ឲ្យតែបញ្ចេញលុយ​បាន។

គោលនយោបាយគាំទ្រពេលមានវិបត្តិ៖

គ្រឹះស្ថាន​ស្របច្បាប់​មាន​គោលនយោបាយ ជួយ​សម្រួលដល់​អតិថិជន​នៅពេល​ជួបការ​លំបាក ឧទាហរណ៍​ដូចជា “គោលនយោបាយរៀបចំឥណទានឡើងវិញ” (Loan Restructuring Policy) ជាដើម៕