ព័ត៌មានជាតិ

សមត្ថកិច្ចដោះលែងបុរស៣នាក់ ដែលជួបជុំផឹកស៊ីរំខានអ្នកជិតខាង

បានផុស

៥ years មុន

នៅ

ថ្ងៃអង្គារ ៨ មិថុនា ២០២១

ដោយ

បុរស៣នាក់ជួបជុំផឹកស៊ីចាក់ធុងបាស់បើកសម្លេងរំខានអ្នកជិតខាងនៅចំកណ្តាលផ្លូវលំ ភូមិព្រៃព្រីងខាងជើង១ សង្តាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ត្រូវបានសមត្ថកិច្ចដោះលែងវិញហើយបន្ទាប់ពីធ្វើការណែនាំនិងអប់រំរួចមក។

លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានមានប្រសាសន៍នៅរសៀលថ្ងៃទី០៨ ខែមិថុនា ថា «យប់មិញយើងបាននាំខ្លួនមនុស្ស៣នាក់ បានជួបជុំគ្នាផឹកស៊ីបើកធុងបាស់កន្ទុយឡានមានភ្លើងផងបង្កការរំខានសឹងឆ្លងភូមិ។ ដល់ពេលអីចឹងយើងបាននាំគ្នាពួកគាត់ទៅមកកាន់អធិការខណ្ឌពោធិសែនជ័យ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា បុរសទាំង៣នាក់នោះ សមត្ថកិច្ចមិនបានដាក់ទោសពិន័យ ឬបញ្ជូនទៅតុលាការទេ គ្រាន់តែធ្វើការអប់រំណែនាំនិងធ្វើកិច្ចសន្យាឱ្យបញ្ឈប់ធ្វើទង្វើបែបនេះជាបន្តទៀត។

យ៉ាងណាក៏ដោយ លោកវរសេនីយ៍ឯក សាន សុខសីហា បានអំពាវនាវដល់ប្រជាពលរដ្ឋចូលរួមអនុវត្តវិធានាការ ៣ការពារនិង៣កុំទាំងអស់គ្នា ដើម្បីបង្ការនិងទប់ស្កាត់ការឆ្លងជំងឺកូវីដ១៩ក៏ដូចជាកាត់ផ្តាច់ព្រឹត្តិការណ៍២០កុម្ភៈឱ្យបានលឿនបំផុត។

លោកវរសេនីយ៍ឯក សាន សុខសីហា បានបន្តទៀតថា«ប្រសិនជាមិនមានការចូលរួមពីបងប្អូនប្រជាពលរដ្ឋទេ វាពិតជាមានការលំបាក និងមិនអាចឈានទៅកាត់ផ្តាច់ព្រឹត្តិការណ៍សហគមន៍២០កុម្ភៈបានឡើយ»។

គួរបញ្ជាក់ថា កាលពីយប់មិញ លោកឧត្តមសេនីយ៍ទោ ហេង រតនា ស្នងការរងទទួលដឹកនាំខណ្ឌពោធិ៍សែនជ័យ បានដឹកនាំកម្លាំងធ្វើការនាំខ្លួនបុរសទាំង៣នាក់យកមកកាន់អធិការដ្ឋាននគរបាលខណ្ឌពោធិ៍សែនជ័យ ដោយសារពួកគាត់បានជួបជុំផឹកស៊ីចាក់ធុងបាស់បើកសម្លេងរំខានអ្នកជិតខាងនៅចំកណ្តាលផ្លូវលំ ភូមិព្រៃព្រីងខាងជើង១ សង្តាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ដែលជាតំបន់ប្រឈមខ្ពស់ក្នុងការឆ្លងរាលដាលវីរុសកូវី១៩ ៕

អត្ថបទ ៖ សំអឿន