ព័ត៌មានជាតិ

តុលាការខេត្តកណ្តាល សម្រេចឃុំខ្លួនអ្នកកាសែត៥នាក់ និងអ្នកម៉ូតូឌុបម្នាក់ ដាក់ពន្ធនាគារបណ្តោះអាសន្ន

បានផុស

៥ years មុន

នៅ

ថ្ងៃពុធ ២៣ មិថុនា ២០២១

ដោយ

លោក ថោង ផល្លារង្សី ចៅក្រមស៊ើបសួរសាលាដំបូងខេត្តកណ្តាល នៅថ្ងៃទី២៣ ខែមិថុនា ឆ្នាំ២០២១ នេះ សម្រេចឃុំខ្លួនអ្នកសារព័ត៌មាន៥នាក់ ជ្រកក្រោមស្លាកសារព័ត៌មាន BATI TV NEWS និងអ្នករត់ម៉ូតូឌុបម្នាក់ សរុបទាំងអស់៦នាក់ ដាក់ពន្ធនាគារបណ្តោះអាសន្នពីបទ «គំរាមកំហែងហែកកេរ្តិ៍» តាមមាត្រា៣៧២ និងមាត្រា៣៧៣ នៃក្រមព្រហ្មទណ្ឌ ។ ដោយឡែក ម្ចាស់ល្បែងស៊ីសង ក៏ត្រូវបានតុលាការសម្រេចឃុំខ្លួនដាក់ពន្ធនាគារផងដែរ ។

បទ «គំរាមកំហែងហែកកេរ្តិ៍» កំណត់ការផ្តន្ទាទោសដាក់ពន្ធនាគារពី ២ឆ្នាំទៅ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា អ្នកសារព័ត៌មាន៥នាក់ ជ្រកក្រោមស្លាកសារព័ត៌មាន BATI TV NEWS និងអ្នករត់ម៉ូតូឌុបម្នាក់សរុបទាំងអស់៦នាក់ ពាក់ព័ន្ធបទល្មើស «គំរាមកំហែងទារប្រាក់» ពីអ្នកលក់កាហ្វេ មួយកន្លែង តែមានលួចលាក់បើកល្បែងស៊ីសង ជល់មាន់តាមអនឡាញ និងត្រូវបានឃាត់ខ្លួនកាលពីរសៀលថ្ងៃទី១៩ ខែមិថុនា ឆ្នាំ២០២១ នៅចំណុចផ្លូវលំ ភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាល ។

សមត្ថកិច្ចប្រាប់ថា ជនសង្ស័យប្រុសស្រីចំនួន៦នាក់ រួមមាន ១. ឈ្មោះ ស៊ូ ស្រីលាភ ភេទស្រី អាយុ២៩ឆ្នាំ មុខរបរអ្នកសារព័ត៌មាន ជាម្ចាស់អាជ្ញាប័ណ្ណសារព័ត៌មាន BATI TV NEWS ។ ២.ឈ្មោះ ចាន់ ឫទ្ធី ភេទប្រុស អាយុ៣៩ឆ្នាំ មុខរបរអ្នកសារព័ត៌មាន ។ ៣.ឈ្មោះ ផន ថា ភេទប្រុស អាយុ៤៣ឆ្នាំ មុខរបរអ្នកសារព័ត៌មាន។ ៤.ឈ្មោះ ច្រុង សុខនី ភេទប្រុស អាយុ២៤ឆ្នាំ មុខរបរអ្នកសារព័ត៌មាន។

៥.ឈ្មោះ ប្រាក់ បេន ភេទប្រុស អាយុ៤២ឆ្នាំ មុខរបរអ្នកសារព័ត៌មាន។ ៦.ឈ្មោះ អ៊ុក ឡា ភេទប្រុស អាយុ៥១ឆ្នាំ មុខរបររត់ម៉ូតូឌុប៕

អត្ថបទ ៖ ចាន់ មុនី