កម្ពុជា-ឥណ្ឌូនេស៊ី បានរៀបចំព្រឹត្តិការណ៍ជិះកង់ ក្នុងរមណីយដ្ឋានអង្គរ បង្កើនចំណងមិត្តភាព ផ្សព្វផ្សាយវប្បធម៌

ខេត្តសៀមរាប៖ កម្ពុជា-ឥណ្ឌូនេស៊ី បានរៀបចំព្រឹត្តិការណ៍ជិះកង់រួមគ្នា ក្នុងរមណីយដ្ឋានអង្គរ ដើម្បីបង្កើនចំណងមិត្តភាព រួមទាំងការផ្សព្វផ្សាយអំពីវប្បធម៌ និងអរិយធម៌ នៃប្រទេសទាំងពីរ។ ព្រឹត្តិការណ៍ជិះកង់រួមគ្នាដោយគណៈប្រតិភូនៃប្រទេសទាំងពីរនេះ បានធ្វើឡើងនៅព្រឹកថ្ងៃទី៣០ ខែមិថុនា ឆ្នាំ២០២១នេះ។

លោក សូឌី រាម៉ាន់ ហាសាំង ឯកអគ្គរដ្ឋទូតសាធារណៈឥណ្ឌូនេស៊ីប្រចាំកម្ពុជា មានប្រសាសន៍ថា ក្រោមកិច្ចសហប្រតិបត្តិការនៃប្រទេសទាំងពីរ កម្ពុជា-ឥណ្ឌូនេស៊ី បានរៀបចំព្រឹត្តិការណ៍ជិះកង់រួមគ្នា ដើម្បីបង្កើនចំណងមិត្តរវាងប្រជាជន និងប្រទេសទាំងពីរ ឱ្យកាន់តែជិតស្និទ្ធ ខណៈកម្មវិធីមួយចំនួនត្រូវបានខកខាន រយៈពេលជាង១ឆ្នាំកន្លងមក ដោយសារវិបត្តិនៃជំងឺកូវីដ-១៩។

លោកលើកឡើងថា តាមរយៈព្រឹត្តិការណ៍នេះ ក៏ជាការរួមចំណែក ផ្សព្វផ្សាយពីវិស័យទេសចរណ៍នៅកម្ពុជា ជាពិសេសខេត្តសៀមរាប ដែលជាគោលដៅទេសចរណ៍ ដ៏ល្បីល្បាញ ជាទីតាំងនៃប្រាសាទអង្គរវត្ត ដែលមានអាយុកាលរាបពាន់ឆ្នាំ ដើម្បីទាក់ទាញភ្ញៀទេសចរមកកម្សាន្ត ក្រោយពេលវិបត្តិជំងឺកូវីដ-១៩ បានវិលទៅរកភាពប្រក្រតីឡើងវិញ។

មានប្រសាសន៍ក្នុងឱកាសនោះដែរ លោក ប៉ាក់ សុខុម រដ្ឋលេខាធិការក្រសួងទេសចរណ៍ បានសម្ដែងនូវគាំទ្រ ចំពោះព្រឹត្តិការណ៍ជិះកង់រួមគ្នារវាងប្រទេសកម្ពុជា និងឥណ្ឌូនេស៊ី ដែលនេះជាព្រឹត្តិការណ៍ មិនត្រឹមតែដើម្បីបង្កើនចំណងមិត្តភាពរវាងទាំងពីរប៉ុណ្ណោះទេ តែក៏ដើម្បីបង្ហាញអំពីវប្បធម៌ និងអរិយធម៌ពីអតីតកាលរបស់កម្ពុជា និងឥណ្ឌូនេស៊ី ដែលមានភាពប្រហាក់ប្រហែលគ្នា ពិសេសតាមរយៈព្រឹត្តិការណ៍នេះ ពិតជាមានសារៈសំខាន់ក្នុងការផ្សព្វផ្សាយអំពីគោលដៅទេសចរណ៍ របស់ខេត្តសៀមរាប ដែលត្រូវបានបណ្តាប្រទេសនៅក្នុងតំបន់អាស៊ានចាត់ទុកថា ជាទីតាំងវប្បធម៌ នៃប្រទេសអាស៊ានសម្រាប់ឆ្នាំ២០២១ និង២០២២។

សូមជម្រាបថា ព្រឹត្តិការណ៍ជិះកង់រួមគ្នាដោយគណៈប្រតិភូនៃប្រទេសទាំងពីរនេះ បានចាប់ផ្តើមជិះកង់ចេញដំណើរពីមុខប្រាសាទអង្គរវត្ត ឆ្ពោះទៅតាមផ្លូវប្រាសាទក្រវ៉ាន់ រួចបន្តទៅកាន់គោលដៅប្រាសាទផ្សេងៗទៀត ក្នុងតំបន់រមណីដ្ឋានអង្គរ ក្រោមការចូលរួម និង សម្របសម្រួលពីអាជ្ញាធរជាតិអប្សរា៕

អត្ថបទ៖ គឿន វេត