១២គ្រួសារសពដោយសារជំងឺកូវីដ-១៩ នៅបន្ទាយមានជ័យទទួលជំនួយតាមរយៈអភិបាលខេត្ត

បន្ទាយមានជ័យ៖ លោក អ៊ុំ រាត្រី អភិបាលខេត្តនិងប្រធានគណៈកម្មការប្រយុទ្ធនឹងជំងឺកូវីដ-១៩ ខេត្តបន្ទាយមានជ័យ អមដោយលោក ង៉ោ ម៉េងជ្រួន អភិបាលរងខេត្ត លោកវេជ្ជបណ្ឌិតហេង គឹមស៊ត អនុប្រធានមន្ទីរសុខាភិបាលនៃរដ្ឋបាលខេត្ត ព្រមទាំងអភិបាលរងក្រុងប៉ោយប៉ែត កាលពីថ្ងៃទី០៥ ខែកក្កដា ឆ្នាំ២០២១នេះ បានអញ្ជើញប្រគល់ថវិកាឧបត្ថម្ភរបស់រាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឧបត្ថម្ភជូនគ្រួសារសពដែលស្លាប់ដោយជំងឺកូវីដ-១៩ ចំនួន១២គ្រួសារ ។

ថវិកាដែលប្រគល់ជូនគ្រួសារសពម្នាក់ ទទួលបានថវិកាចំនួន៥លានរៀល ក្នុងនោះបានប្រគល់ដល់១២គ្រួសារនៃសព១២នាក់ ដែលមានលំនៅនៅក្រុងប៉ោយប៉ែត ដែលបានស្លាប់ដោយជំងឺកូវីដ-១៩។
លោក អ៊ុំ រាត្រី បានឱ្យដឹងទៀតថា មកទល់ថ្ងៃទី០៥ ខែកក្កដានេះ ខេត្តបន្ទាយមានជ័យមានអ្នកស្លាប់ដោយសារជំងឺកូវីដមានចំនួនដល់៣៩នាក់ហើយ។

ជាការឆ្លើយតបក្នុងនាមរដ្ឋបាលខេត្ត និងបងប្អូនប្រជាពលរដ្ឋគ្រួសារសព សូមគោរពថ្លែងអំណរគុណ និងជូនពរសម្តេច​តេជោ និងសម្តេចកិត្តិព្រឹទ្ធបណ្ឌិត សូមទទួលបាននូវសុខភាពល្អបរិបូរណ៍ កម្លាំងមាំមួនខ្លាំងក្លា បញ្ញាញាណវាងវៃ ជន្មាយុយឺនយូរ និងទទួលបានជោគជ័យត្រចះត្រចង់ក្នុងដឹកនាំប្រទេសជាតិឱ្យមានការរីកចម្រើន។

អត្ថបទ៖ ពៅ