ភាពជោគជ័យ នៃអនាម័យ ជនបទ និងទឹកស្អាត

ការយល់ដឹងរបស់ប្រជាពលរដ្ឋនៅសម័យនេះ គឺយល់ដឹងមានកម្រិតខ្ពស់ មិនដូចកាលពីជំនាន់បុរាណនោះឡើយ ដែលប្រជាជនយើងពុំសូវយល់ពីអនាម័យ នៃការប្រើប្រាស់បង្គន់ ឬបរិភោគទឹកស្អាត ដែលធ្វើឲ្យពួកគាត់ជួបបព្ហាសុខភាពមិន​ដែលស្រាកស្រាន្ត។

លោកយាយ ឡុញ យឿន មានអាយុ៨៦ឆ្នាំ រស់នៅឃុំកងតាណឹង ខេត្ត(កំពង់ចាម) បានប្រាប់ឲ្យដឹងថា កាលពីជំនាន់យាយបានទៅដងទឹកទន្លេយកមកប្រើទេ គឺនៅឆ្ងាយណាស់ ដល់១គីឡូដីឯណោះ ជួនកាល ទូលផង រែកផង ក៏ មានដែរ។ ឯបង្គន់វិញកាលនោះនាំគ្នាទៅជុះតែតាមគុម្ពោធព្រៃ ឬវាលស្រែ ពាសវាល ពាសកាលទេ។ តែឥឡូវនេះមិនពិបាកឡើយ ព្រោះគេមានបង្គន់ប្រើប្រាស់គ្រប់ៗគ្នា។ ផ្ទះខ្ញុំវិញមានបង្គន់ប្រើហើយ ធ្វើអស់តម្លៃ៦០០ដុល្លាដែរ និងបាន​(ត)ទឹកស្អាតសម្រាប់ប្រើផងដែរ។

ពាក់ព័ន្ធនឹងការធ្វើបង្គន់វិញ អុំស្រី អៀ ហេម មានអាយុ ៦១ ឆ្នាំ បាននិយាយថា ខ្ញុំអត់ទាន់មានលុយធ្វើបង្គន់ទេ សព្វថ្ងៃទៅបត់ជើងនៅផ្ទះកូនសិន ទម្រាំរកលុយបានយកមកធ្វើ។ ដោយឡែកកូនប្រុស អុំស្រី អៀ ហេមដែល ទើបនឹងត្រឡប់មកពីប្រទេសថៃ សន្សំលុយបានយកមកធ្វើបង្គន់នៅផ្ទះខ្លួនឯង ដែលនៅជិតផ្ទះម្ដាយដែរ។ លោកប្រាប់ថា ផ្ទះខ្ញុំធ្វើបង្គន់និងមានទឹកស្អាតប្រើតាំងពីឆ្នាំ២០១៤ ម៉្លេះ ព្រោះខ្ញុំយល់ថាការ ដើរបន្ទោរបង់ពាសវាល ពាសកាល អាចបង្កជាជំងឺផ្សេងៗ ដែលនាំឲ្យប៉ះពាល់ដល់សុខភាពយើង។

ដោយឡែកលោកអុំ ប៉ូ ណេង វិញ មានអាយុ ៨០ឆ្នាំ គាត់បានបង្ហាញថា កាលពីជំនាន់មុន ឃុំកងតាណឹងនេះ​ ប្រជាជនយើងនៅពុំទាន់មានការយល់ដឹងនៅឡើយទេ ទាំងការធ្វើបង្គន់ និងការប្រើប្រាស់ទឹកស្អាត ឃើញថា ពីមុនគាត់ច្រើនទៅដងទឹកពីទន្លេយកមកប្រើ ហើយបង្កន់វិញច្រើនតែទៅបត់ជើងពាសវាល ពាសកាល ដែលបង្ករទៅជាជំងឺ គ្រប់ប្រភេទ។តែបច្ចុប្បន្ននេះប្រជាជនយើងមានបង្គន់សឹងតែគ្រប់ផ្ទះទៅហើយ។ បើខ្ញុំគិតវិញ គឺនៅសល់តែ៣ ភាគរយទេ ដែលគាត់ពុំទាន់ធ្វើបង្គន់ប្រហែលមកពីគាត់ពុំសូវយល់ដឹងពី អនាម័យហើយ។ លោកអុំបន្តថា អ្នកខ្លះវិញសង់ផ្ទះធំៗ បែរជាមិនធ្វើបង្គន់ទៅវិញ។
លោក ឆាយ ឆុំ មេឃុំកងតាណឹងបានបញ្ជាក់ប្រាប់ថា នៅឃុំនេះ ប្រជាជនដែលមាន បង្គន់អនាម័យ ឬ ទឹកស្អាតប្រើប្រាស់ គឺ មានចំនួន 80 ភាគរយហើយ គឺមានចំនួនប្រជាជន ១៧០៦ បានធ្វើ (បង្គន់) សម្រាប់អ្នកដែលខ្វះខាតវិញ សល់តែ 3 ភាគរយ ទេ។ យើងកំពុងជំរុញឲ្យគាត់បានយល់ដឹងពីអនាម័យ ហើយងាកមកធ្វើបង្គន់ និងប្រើប្រាស់ទឹកស្អាត វិញ ដើម្បីសុខភាពរបស់ពួកគាត់ និងចៀសផុតពីជំងឺដង្កាត់ផ្សេងៗបានទៀតផង។

លោក ឡេង ស៊ីមផេង នាយកបណ្ដាញ ចែកចាយ ទឹកស្អាត នៅ ឃុំកងតាណឹង បានរៀបរាប់ឲ្យដឹងថា នៅ ឃុំកងតាណឹង នេះ មានការចែកចាយ ទឹកស្អាត ចំនួន 2 ឃុំ គឺ ឃុំ កងតាណឹង និងឃុំ រការអារ ហើយ បណ្ដាញ ទឹកស្អាតនេះ កើតឡើង ចំនួន 5 ឆ្នាំ ហើយ ដែលមាន គុណប្រយោជន៍ខ្លាំងណាស់ ដើម្បីជួយដល់ប្រជាជនយើង ក៏ដូចជាការជួយដល់ ពួកគាត់ ទៅទិញទឹក ដែលមានតម្លៃខ្ពស់ ហើយយើងក៏បានលក់ទឹកជូនគាត់ក្នុងតម្លៃ ១(គីប) តែ 2300 (រៀល)ទេ។ដោយពីមុនគាត់ធ្លាប់ទិញ ទឹក គេ ក្នុង ១(គីប)តម្លៃ 6000( រៀល)ឯណោះ។ដូច្នេះបណ្ដាញទឹកស្អាតរបស់យើង គឺមានប្រយោជន៍ខ្លាំងណាស់ដើម្បីជួយដល់ជីវភាពនិងសុខភាពរបស់គាត់។

លោកបញ្ជាក់ថា បណ្ដាញទឹកស្អាត នេះ គឺ យើងបានសម្លាប់មេរោគ ដល់ទៅ100% ឯឋណោះ គឺ យើងធ្វើសដើម្បី ជួយ ដល់សុខភាពប្រេះសជនយើងផង។ដូច្នេះប្រជាពលរដ្ឌយើង ឥឡូវនេះ គាត់មានការយល់ដឹងច្រើនពី អនាម័យទឹកស្អាតជាពិសេស ជុំវិញការ ប្រើប្រាស់បង្គន់អនាម័យ ខ្ញុំឃើញថា ពួកគាត់បានធ្វើបង្គន់ កើន ដល់ 70% ទៅ 80% ហើយ។លោកបញ្ជាក់ថា កាលពីជំនាន់មុនប្រជាជនយើងនៅទីនេះគាត់ពុំសូវយល់ដឹងពីអនាម័យ ឡើយ។តែឥឡូវនេះមានប្រព័ន្ធ ទឹកស្អាត ប្រើប្រាស់ ថែមទាំងនៅក្នុង ឃុំ បានជំរុញឲ្យគាត់ធ្វើបង្គន់អនាម័យទៀតផង។ ឃើញថា ពេលនេះសុខភាពរបស់ប្រជាជនយើង បានល្អប្រសើរច្រើន ដែលមិនបាន ចំណាយ អស់ ថវិកា ទៅមើលជំងឺឡើយ៕

អត្ថបទ ៖ រុងរឿង