ព័ត៌មានជាតិ

ការផ្គត់ផ្គង់ទឹកស្អាតក្នុងរាជធានីភ្នំពេញ និងក្រុងតាខ្មៅ គ្របដណ្ដប់បាន៩២%

បានផុស

២ ខែ មុន

នៅ

ថ្ងៃសៅរ៍ ២១ កុម្ភៈ ២០២៦

ដោយ

រដ្ឋមន្ត្រីឧស្សាហកម្មលោក ហែម វណ្ណឌី ឱ្យដឹងថាតម្រូវការទឹកស្អាតនៅរាជធានី និងក្រុងតាខ្មៅខេត្តកណ្ដាលហក់ឡើងយ៉ាងខ្លាំង ដោយក្នុងនោះក្នុងមួយថ្ងៃអង្គភាពនេះត្រូវការផលិតទឹកស្អាតដល់ជាង១លានម៉ែត្រគូបដើម្បីបំពេញតម្រូវការប្រជាជន ខណៈបច្ចុប្បន្នបណ្ដាញទឹកស្អាតអាចផ្គត់ផ្គង់បានដល់ពលរដ្ឋប្រមាណ៩២%នៃក្រុងសំខាន់ទាំងនេះ។

ថ្លែងក្នុងពិធីបិទសន្និបាតការងារឆ្នាំ២០២៥ នៅថ្ងៃទី២០ ខែកុម្ភៈ ឆ្នាំ២០២៦ លោក ហែម វណ្ណឌី ឱ្យថាបច្ចុប្បន្នបណ្ដាញទឹកស្អាតក្នុងរាជធានីភ្នំពេញ និងក្រុងតាខ្មៅ អាចគ្របដណ្ដប់បានជាង៩២%ហើយ ដែលបានពង្រីកបណ្ដាញទុយោទឹកបានជិត៤០០គីឡូម៉ែត្រ និងជំរុញសមត្ថភាពផលិតឱ្យហក់ឡើងដល់ជាង ១លានម៉ែត្រគូបក្នុងមួយថ្ងៃ។

លោកបានឱ្យដឹងបន្ថែមដែរថាបច្ចុប្បន្នប្រជាពលរដ្ឋក្នុងរាជធានី និងក្រុងតាខ្មៅជិត៣លាននាក់កំពុងទទួលបានប្រយោជន៍ពីការតភ្ជាប់បណ្ដាញទឹកស្អាតនេះ ខណៈក្រសួងប្ដេជ្ញានឹងតភ្ជាប់ទឹកស្អាតឱ្យពលរដ្ឋបាន១០០%នៅត្រឹមឆ្នាំ២០២៨ខាងមុខ។ លោកក៏ជំរុញផងដែរដល់ការលក់ទឹកដុំទៅកាន់តំបន់សក្ដានុពលសេដ្ឋកិច្ច និងត្រូវពិនិត្យឡើងវិញនូវការផ្ដល់សេវាដោយភាគីទី៣ ព្រមទាំងកាត់បន្ថយអត្រាទឹកគ្មានចំណូលផងដែរ ដោយសង្គតធ្ងន់ថា «ការកាត់បន្ថយបាន ១% គឺស្មើនឹងការបង្កើនចំណូលបាន ១លានដុល្លារ»។

ក្នុងឱកាសនោះដែរ ក៏មានការដាក់ឱ្យដំណើរការជាផ្លូវការនូវកម្មវិធី “PPWSA Mobile App” ដែលជាជំហានថ្មីមួយក្នុងការធ្វើទំនើបកម្មសេវាកម្មអតិថិជន ងាយស្រួលក្នុងការត្រួតពិនិត្យការប្រើប្រាស់ និងការបង់ប្រាក់តាមទូរសព្ទដៃ។ ជាមួយគ្នានេះ រដ្ឋាករទឹកក៏បានចុះអនុស្សរណៈយោគយល់ (MoU) ជាមួយប្រតិបត្តិករឯកជន ដើម្បីពង្រឹងការផ្គត់ផ្គង់ទឹកដុំឱ្យកាន់តែទូលំទូលាយ៕

អត្ថបទដោយ ហ៊ុន សិរីវឌ្ឍន៍