លោកឧកញ៉ា ម៉ុង ឫទ្ធី៖ កាលពីដើមមានឡានតិច​ ហើយច្រើន តែឡាន​តូចៗ ​តែពេលនេះឡានធំ​ក៏មានកំណើន ​ឡានតូចរឹតតែមាន​កំណើន!

លោកឧកញ៉ា ម៉ុង ឫទ្ធី អ្នកជំនួញផ្នែកកសិកម្មដ៏ល្បីឈ្មោះនៅកម្ពុជា បានបង្ហាញការចាប់អារម្មណ៍ ទៅលើករណីហេតុ​ការណ៍ប៉ះពារ​គ្នា​ រវាងរថយន្តធុន​ធ្ងន់មួយគ្រឿង និងរថយន្ត Toyota Pruis លើស្ពានដែកមួយកន្លែង កាលពី​ពេលថ្មីៗនេះ។  

តាមរយៈទំព័រហ្វេសប៊ុករបស់ខ្លួនលោកឧកញ៉ា ម៉ុង ឫទ្ធី បានសរសេរសំណេរប្រមាណ៣បន្ទាត់កន្លះ អមជាមួយរូប​ភាព​មួយចំនួន នៅរសៀលថ្ងៃទី១៥ ខែកក្កដានេះថា «កាលពីដើមឡើយមានឡានតិច​ ហើយច្រើនតែឡាន​តូចៗទៀតផង​ តែពេលនេះដោយសារតែស្រុកទេសរីកចំរើន​ ឡានធំ​ក៏មានកំណើន ​ឡានតូចរឹតតែមាន​កំណើន​ ដូច្នេះហើយ​យើងមានតែខិតខំពង្រីកផ្លូវ​ស្ពាន​តាមនេះ​ដែរ​ ដូចរូបភាពដែល​ខ្ញុំតែងតែ ​បាននឹង​កំពុងតែ​អនុវត្តន៍​រាល់ថ្ងៃ​នេះ​អីចឹង​ អ្នក​បើកបរ​ទាំងឡាយ​ដែលតែងតែ​បំពាន ​ទទួល​ខុសត្រូវ​ដោយ​ខ្លួនឯង​ចុះ​»។

គួររំលឹកថា កាលពីថ្ងៃទី ១៤ ខែកក្កដា ឆ្នាំ២០២១កន្លងទៅនេះ មានហេតុការណ៍ប៉ះពារ​គ្នា ​រវាងរថយន្តធុន​ធ្ងន់មួយគ្រឿង និងរថយន្ត Toyota Pruis លើស្ពានដែកមួយកន្លែងស្ថិត នៅភូមិឫស្សីមួយគុម្ព ឃុំត្រពាំងគ្រញូង ស្រុកត្រាំ​កក់ ខេត្តតាកែវ ។ តាមរយៈរូបភាព​ឃើញ​ថា​ រថយន្ត​ទាំងពីរ​មានការ​កៀរគ្នា​នៅពាក់ណ្តាលស្ពាន បណ្ដាលឲ្យខូចខាត Prius ​យ៉ាង​ដំណំ។ យ៉ាងណាក៏ដោយ ករណីនេះ​មិន​ទាន់​ដឹង​ថា​ភាគី​ណា​ខុស​ ភាគី​ណា​ត្រូវ​នោះទេ។

បើតាមនាយកដ្ឋានសុវត្ថិភាពចរាចរណ៍ផ្លូវគោក បានឲ្យដឹងថា យោងមាត្រា២០ ចំណុចទី៧ នៃច្បាប់ស្តីពីចរាចរណ៍ផ្លូវ គោក នៅលើស្ពានចង្អៀតដែលបើកបរបានតែរថយន្តមួយគ្រឿង យានយន្តធុនធំ ត្រូវទុកសិទ្ធិឲ្យយានយន្តធុនស្រាលទៅមុន។ តែបើក្នុងករណីរថយន្តធុនធំ បានទៅដល់លើស្ពានមុន រថយន្តធុនស្រាលត្រូវឈប់សិន រង់ចាំទាល់តែរថយន្ត ធុនធំឆ្លងផុតស្ពានមុនសិន៕ (ដោយ)៖ ឃួន សុភ័ក្រ