ក្រុមបាល់ទះ ជប៉ុន បំបាក់ក្រុមខ្លាំងៗរាប ក្នុងសប្តាហ៍ទី ១ ពានពិភព​លោក FIVB Nations League

ក្រុមបាល់ទះជម្រើសជាតិ ជប៉ុន កំពុងបង្ហាញសក្តានុពលយ៉ាងអស្ចារ្យ សម្រាប់ការប្រកួតសប្តាហ៍ទី ១ ក្នុងជុំដំបូងនៃពាន FIVB Men’s Volleyball Nations League 2026 បន្ទាប់ពីឆ្លងកាត់ ៤ ប្រកួតទល់នឹងក្រុមខ្លាំង ទទួលបានជ័យជម្នះទាំង ៤ ប្រកួត។

បន្ទាប់ពី Yuji Nishida វិលត្រឡប់មកកាន់ក្រុមជម្រើសជាតិ ជប៉ុន ឡើងវិញនៅឆ្នាំ ២០២៦ នេះ ត្រូវបានគេកត់សម្គាល់ឃើញ ថា ក្រុមបាល់ទះ ជប៉ុន កាន់តែខ្លាំងក្លាជាងឆ្នាំមុនៗទៅទៀត។ ឆ្លងកាត់ ៤ ប្រកួតកន្លងមក ក្នុងសប្តាហ៍ទី ១ គឺពួកគេមិនទាន់ចាញ់ទាល់តែសោះ ពោលថែមទាំងបានយកឈ្នះក្រុមលេខ ១ ក្នុងលោក ប៉ូឡូញ ជាលើកដំបូងថែមទៀត។

អំឡុងពេលប្រកួតបើកឆាកកាលពីថ្ងៃទី ១០ ខែ មិថុនា ក្រុម ជប៉ុន បានលត់ អ៊ុយក្រែន មិនឱ្យតដៃរួចក្នុងលទ្ធផល ៣ សិត ០។ ឈានចូលប្រកួតទី ២ ក្រុមសាំម៉ូរ៉ៃពិតជាធ្វើឱ្យអ្នកគាំទ្រភ្ញាក់ផ្អើលមែនទែន បន្ទាប់ពីឈ្នះក្រុមលេខ ១ ប៉ូឡូញ ក្នុងលទ្ធផល ៣ សិតទល់ ២។ ដោយឡែកការប្រកួតទី ៣ បានបន្តឈ្នះក្រុម ចិន ៣ សិតទល់ ១ និងប្រកួតចុងក្រោយ ទល់ជម្រើសជាតិ ស្លូវេនី បានឈ្នះក្នុងលទ្ធផល ៣ សិតទល់ ១។

តាមរយៈជ័យជម្នះទាំង ៤ ប្រកួតនេះ បានធ្វើឱ្យក្រុម ជប៉ុន ឈរនៅលេខ ២ ប៉ុណ្ណោះអាសន្ន ខណៈ ប្រេស៊ីល ឈរនៅលេខ ១ ដោយឆ្លងកាត់ ៤ ប្រកួត ឈ្នះទាំង ៤ ប្រកួតដូចគ្នា។ ចំណែក អាមេរិក ឈរលេខ ៣, អ៊ីតាលី ឈរលេខ ៤, ស៊ែប៉ី ឈរលេខ ៥, ស្លូវេនី ឈរលេខ ៦, និង ប៉ូឡូញ ឈរលេខ ៧។

គួរបញ្ជាក់ជាថ្មី ថា ការប្រកួតជុំដំបូងក្នុងសប្តាហ៍ទី ១ បានបញ្ចប់ហើយ ខណៈការប្រកួតសប្តាហ៍ទី ២ នឹងចូលមកដល់នៅថ្ងៃទី ២៤ ដល់ថ្ងៃទី ២៨ ខែ មិថុនា ឆ្នាំ ២០២៦៕

អត្ថបទ៖ សេម កុសល