៤ ថ្ងៃនៃការអនុវត្តបម្រាមគោចរ​​សមត្ថកិច្ចចាប់បាន​យានយន្តជាង ១ ពាន់គ្រឿង

នៅក្នុងរយៈពេល០៤ថ្ងៃ នៃការអនុវត្តបម្រាមគោចរបិទការធ្វើដំណើររបស់បងប្អូនប្រជាពលរដ្ឋចាប់ពីម៉ោង​០៩រហូតដល់ម៉ោង៣ភ្លឺ អាជ្ញាធរមានសមត្ថកិច្ចចម្រុះឱ្យគណៈបញ្ជាការឯកភាពរាជធានីភ្នំពេញបានធ្វើការឃាត់យានយន្តគ្រប់ប្រភេទដែលល្មើសទៅនឹងបំរាមគោចរ បានចំនួនជាង១០០០គ្រឿងហើយក្នុងនោះយើងបានផាកពិន័យនៅនឹងកន្លែងចំនួនជិត៣០០គ្រឿង ក្រៅពីនោះយើងបានបញ្ជូនទៅរក្សាទុកនៅ​តាមបណ្តាខណ្ឌនីមួយៗក្នុងរាជធានីភ្នំពេញ។

បើតាមការបញ្ជាក់ឱ្យដឹងពីលោកឧត្តមសេនីយ៍ឯក​ ស​ ថេត​ អគ្គស្នងការរង​និងជាស្នងការនគរបាលរាជធានីភ្នំពេញ​ មានប្រសាសន៍លើកឡើងថា ការអនុវត្តនូវបម្រាមគោចរនេះនៅក្នុងថ្ងៃទី១ ឃើញថាបងប្អូនប្រជាពលរដ្ឋជាច្រើនបានល្មើសទៅនឹងបំរាមគោចរនេះ តែនៅថ្ងៃទី០២ យើងបានឃើញថា បងប្អូនមួយចំនួនមានការចូលរួមច្រើនមានន័យថា អ្នកដែលល្មើសនឹងបម្រាមគោចរនេះ ហាក់ដូចជាមានការថយចុះជាច្រើន។

ដោយឡែកសម្រាប់ថ្ងៃទី ០៣វិញឃើញថា ប្រជាពលរដ្ឋពិតជាបានយល់ដឹងច្រើន ដោយនៅតាមដងផ្លូវនា​នាខណៈដែល វេលាម៉ោងកំណត់នៃការបិទបំរាមគោចរមកដល់ឃើញថាគ្រប់ផ្លូវទាំងអស់ នៅក្នុងរាជធានីភ្នំពេញ មានលក្ខណៈស្ងប់ស្ងាត់ មិនមានបងប្អូនប្រជាពលរដ្ឋធ្វើដំណើរនោះទេ។

នេះបង្ហាញអោយឃើញពីការចូលរួមរបស់បងប្អូនប្រជាពរដ្ឋ ក្នុងការអនុវត្តវិធានរបស់រដ្ឋបាលរាជធានីភ្នំពេញ ក្នុងការបិទបំរាមគោចរពីម៉ោង០៩ដល់ម៉ោង០៣ភ្លឺ។

ប៉ុន្តែទោះបីជាយ៉ាងណាក្តី ក៏នៅមានចំណុចអវិជ្ជមានមួយចំនួនផងដែរ ដោយសារតែ មានម៉ូតូក្មេងៗប៉ុន្មានជា៣ទៅ៤គ្រឿងបានធ្វើដំណើរតាមដងផ្លូវ ល្មើសទៅនឹងបម្រើនេះ ហើយក្រោយពីយើងធ្វើការឃាត់និងសាកសួរ គឺពួកគាត់ចេញពីធ្វើការនៅក្រុមហ៊ុនឯកជនមួយ។

ប៉ុន្តែទោះបីយ៉ាងណាក្តី ករណីនេះ យើងត្រូវតែធ្វើការផាកពិន័យ ដើម្បីឲ្យពួកគាត់ចូលរួមអនុវត្ត។
លោកស ថេត បញ្ជាក់ផងដែរថា ក្នុងរយៈពេល ០៤ថ្ងៃនៃការអនុវត្តបំរាមគោចរនេះ កម្លាំងមានសមត្ថកិច្ចចំណុះឲ្យគណៈបញ្ជាការឯកភាពរាជធានីភ្នំពេញឃាត់យានយន្តគ្រប់ប្រភេទបានចំនួន១០៥៣គ្រឿង ក្នុងនោះមានរថយន្តចំនួន១០៧ គ្រឿង។

យើងបានផាកពិន័យយានយន្តចំនួន២៦៣គ្រឿង និងក្រៅពីនោះ បានបញ្ជូនទៅរក្សាទុកនៅតាមបណ្ដាខណ្ឌនីមួយៗ។

លោកបញ្ជាក់ផងដែរថា ចំពោះបំរាមគោចរនេះ គឺមិនមែនការលើកលែងឬ អប់រំនោះទេ បើទោះបីជាមន្ត្រីរាជ​ការក៏ដោយ បើពួកគាត់មិនមានកាតព្វកិច្ចដើម្បីបំពេញការងារ ធ្វើដំណើររហេតរហូតគឺត្រូវតែឃាត់និងធ្វើការ​ផាកពិន័យ ដូចប្រជាពលរដ្ឋទូទៅដែរ ដើម្បីឲ្យពួកគាត់ចូលរួមទប់ស្កាត់ជំងឺកូវីដ-១៩ទាំងអស់គ្នា៕ ដោយៈ ស្រីរ័ត្ន