ទីក្រុង កៀវ ដាក់បម្រាមគោចរ ៣៥ ម៉ោងទៀត ប្រជាជនហាមចេញពីផ្ទះ និងជម្រកដាច់ខាត

អភិបាលក្រុងកៀវបានប្រកាសជាថ្មីម្តងទៀតនូវបម្រាមគោចររយៈពេល ៣៥ ម៉ោងសម្រាប់រដ្ឋធានីអ៊ុយក្រែនមួយនេះ ចំពេលមានការវាយប្រហាររបស់រុស្ស៊ីម្តងហើយម្តងទៀតមកលើទីក្រុង ។

អភិបាលក្រុងលោក Vitali Klitschko បានប្រកាសការដាក់បម្រាមគោចរបន្ថែមសម្រាប់ទីក្រុងកៀវនៅលើគណនីប្រព័ន្ធផ្សព្វផ្សាយសង្គម Telegram របស់គាត់កាលពីថ្ងៃចន្ទ ។

ប្រជាជននៅក្នុងរាជធានីត្រូវបានជំរុញឲ្យស្នាក់នៅក្នុងផ្ទះ ឬនៅក្នុងជម្រកដាច់ខាត ចាប់ពីម៉ោង ៨ យប់នៅថ្ងៃចន្ទដល់ម៉ោង ៧ ព្រឹកថ្ងៃពុធ ។

លោកអភិបាលក្រុងបាននិយាយថា ហាងនានា រួមទាំងឱសថស្ថាន និងស្ថានីយ៍ប្រេងឥន្ធនៈត្រូវបិទ ក្នុងអំឡុងពេលបម្រាមគោចរនេះ ហើយនេះ​ជា​បម្រាម​គោចរ​លើក​ទី​ ២ ហើយសម្រាប់​ក្រុង​កៀវ បន្ទាប់​ពី​បាន​ដាក់​ចេញ​កាល​ពី​សប្តាហ៍​មុន ។

ការដាក់បម្រាមនេះក៏កើតឡើង បន្ទាប់ពីយោធារុស្ស៊ីបានវាយប្រហារផ្សារទំនើបមួយនៅជិតកណ្តាលទីក្រុងកៀវកាលពីយប់ថ្ងៃអាទិត្យ ។ អាជ្ញាធរក្នុងតំបន់បាននិយាយថា យ៉ាងហោចណាស់មនុស្ស ៨ នាក់បានស្លាប់នៅក្នុងការវាយប្រហារនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លក្ខណៈពិសេសមីស៊ីលល្បឿនលឿនជាងសំឡេងរបស់ រុស្ស៊ី ដែលបាញ់ផ្ទួនៗលើ អ៊ុយក្រែន