ខេត្តថៃជាប់កម្ពុជា អនុវត្តបម្រាមគោចរ លែងឲ្យក្មេងជំទង់ចេញដើរ ក្រោយម៉ោង១០យប់ 

តាមការចុះផ្សាយរបស់កាសែត The Nation, ចាប់ពីថ្ងៃចន្ទទី២២ខែមករាទៅ ខេត្តស្រះកែវ របស់ប្រទេសថៃ ដែលមានព្រំប្រទល់ជាប់ខេត្តបន្ទាយមានជ័យនិងបាត់ដំបងរបស់កម្ពុជា បានចាប់ផ្តើមអនុវត្តបម្រាមគោចរពេលយប់ ដោយហាមឃាត់ក្មេងជំទង់អាយុក្រោម១៥ឆ្នាំ មិនឲ្យចាកចេញពីផ្ទះជាដាច់ខាតក្រោយម៉ោង១០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បម្រាម​គោចរ​នេះ អនុវត្ត​ដោយ​នគរបាល​ខេត្ត​ស្រះកែវ ក្នុងគោលបំណងទប់ស្កាត់បទល្មើសផ្សេងៗ។ តាមបម្រាម អ្នក​ដែល​មាន​អាយុ​ក្រោម១៥ឆ្នាំ អាច​ចាក​ចេញ​ពី​ផ្ទះ​ក្រោយម៉ោង១០យប់បានឡើយ លុះត្រាមាន​មនុស្ស​ពេញ​វ័យទៅជាមួយមើលការខុសត្រូវ ហើយអ្នកបំពាន នឹងត្រូវនគរបាលហៅទៅសួរនាំ រួមជាមួយឪពុកម្តាយឬអាណាព្យាបាល ពួកគេ។

ស្របពេលជាមួយគ្នានោះដែរ លោក Chainarong Boonduang ស្នងការរងនគរបាលខេត្តស្រះកែវ បាននិយាយកាលពីថ្ងៃចន្ទថា មន្រ្តីប៉ូលិស ក៏នឹងដាក់កម្លាំងល្បាតច្រើនជាងមុនផងដែរ ដើម្បីធានាសុវត្ថិភាពជាសាធារណៈនៅពេលយប់។

លើសពីនេះ អគ្គស្នងការនគរបាលជាតិ ចេញបញ្ជាឲ្យមន្ត្រីទាំងអស់ យកចិត្តទុកដាក់លើការទប់ស្កាត់កុមារមិនទាន់គ្រប់អាយុ ពីការជួបជុំគ្នាពេលយប់ ដែលនាំឲ្យកើតមានឧក្រិដ្ឋកម្មជាញឹកញាប់។

សូមបញ្ជាក់ថា ខេត្តស្រះកែវ បានអនុវត្តបម្រាមគោចរនេះ បន្ទាប់ពីអ្នកស្រុកម្នាក់ត្រូវគេសម្លាប់ ហើយបោះសាកសពចូលទៅក្នុងស្រះទឹកនៅស្រុក Aranyaprathet។

ការស្លាប់របស់ស្រ្តីឈ្មោះ Buaphan Tansu អាយុ៤៧ឆ្នាំ បានបង្កជាកំហឹងនៅលើប្រព័ន្ធផ្សព្វផ្សាយសង្គម ពេលមានព័ស្តុតាងច្បាស់ៗបង្ហាញថា នាងត្រូវបានសម្លាប់ដោយក្មេងជំទង់៥នាក់ អាយុចន្លោះពី១៣ទៅ១៦ឆ្នាំ៕

អត្ថបទ៖ សុខ សុវណ្ណ

ចុចអាន៖ កុំភ្លេចខ្លួន! កូវីដនៅថៃ កំពុងឆ្លងខ្លាំងវិញ ត្រឹមមួយសប្តាហ៍ផ្តាច់ជីវិតមនុស្ស ១១នាក់