ព័ត៌មានជាតិ

ការសិក្សាបឋមបង្ហាញថា អ្នកចាក់វ៉ាក់សាំងបាន២ដូស នឹងអាចកាត់បន្ថយអត្រាស្លាប់រហូតដល់៩៨.៨ភាគរយ

បានផុស

៤ years មុន

នៅ

ថ្ងៃព្រហស្បតិ៍ ១២ សីហា ២០២១

ដោយ

លោក វេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានឱ្យដឹងថាប្រសិនបើយើងបានចាក់វ៉ាក់សាំងបានចំនួន២ដូសនោះ នឹងអាចកាត់បន្ថយអត្រាស្លាប់បានរហូតដល់ទៅ៩៨.៨ភាគរយនិងកាត់បន្ថយការសម្រាកពេទ្យរហូតដល់៨៩ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារជាសំឡេងដែលបង្ហោះតៗគ្នានៅថ្ងៃនេះ លោក វេជ្ជបណ្ឌិត លី សូវ៉ាន់ បានបន្តថា លទ្ធផលនេះ ត្រូវបានធ្វើបទបង្ហាញដោយលោកម៉ាយខល ដែលតំណាងឱ្យអង្គការសុខភាពពិភពលោក នាយកដ្ឋានប្រយុទ្ធនឹងជំងឺឆ្លងយូអេស ស៊ីឌីស៊ីនិងដៃគូដទៃទៀត ដែលបានវិភាគទិន្នន័យនូវសេមផលជាង៨ម៉ឺនចាប់ពីថ្ងៃទី០១កុម្ភៈដល់ថ្ងៃទី០៣កក្កដាឆ្នាំ២០២១កន្លងទៅ។

លោក វេជ្ជបណ្ឌិតបានបន្តទៀតថា«លើសពីនេះទៀត បើអត្រាអ្នកស្លាប់លើសពីអាយុ៥០ឆ្នាំឡើងទៅអ្នកដែលប្រឈមនឹងការស្លាប់អាចកាត់បន្ថយរហូតដល់ទៅ តែ០.៩៦ភាគរយទេ។ ប៉ុន្តែប្រសិនបើអ្នកអត់បានចាក់វ៉ាក់សាំងវិញនឹងប្រឈមនឹងការស្លាប់រហូតដល់៩.០៦ភាគរយខ្ពស់មែនទែន។ អីចឹងជាទិន្នន័យមួយដែលល្អប្រសើរមួយ»។

តាមរយៈសារជាសំឡេងនោះ លោក វេជ្ជបណ្ឌិតសូមលើកទឹកឱ្យប្រជាពលរដ្ឋទាំងអស់បន្តរួមគ្នាចាក់វ៉ាក់សាំង ដើម្បីកាត់បន្ថយការសម្រាកពេទ្យក៏ដូចជាការស្លាប់បណ្តាលមកពីជំងឺកូវីដ១៩នេះ។ បើតាម លោក វេជ្ជបណ្ឌិត លីសូវ៉ាន់ ទិន្នន័យដែលបង្ហាញនេះ មានប្រហាក់ប្រហែលទៅនឹងការសិក្សាដទៃទៀតរបស់បណ្តាប្រទេសនានានៅលើពិភពលោកក៏ដូចជាអង្គការសុខភាពពិភពលោក។

យ៉ាងណាក៏ដោយ លោក វេជ្ជបណ្ឌិតបានបញ្ជាក់ថា នេះគ្រាន់តែជាការសិក្សាបឋមទេដែលយកមកពីហ្គោលដែលតាប៉ុណ្ណោះ។ ចំពោះការវិភាគពិស្តារមានក្រុមការងារជំនាញផ្សេងៗទៀតកំពុងដកយកពីហ្គោលដែលតារបស់យើង ដោយលោកស្នើឱ្យក្រុមការងាររបស់យើងយកទិន្នន័យពីនេះឱ្យកាន់តែសុក្រឹត ដើម្បីឱ្យបានទិន្នន័យ ឱ្យកាន់តែសុក្រឹតបំផុតបង្ហាញដល់ថ្នាក់ដឹកនាំធ្វើការសម្រេចដ៏ខ្ពង់ខ្ពស់៕

អត្ថបទ៖ សំអឿន

Related Topics: