តាង៉ែនកសិករខ្មែរ​កកស្ទះ​នៅ​ព្រំដែន​ផ្ទុះ​ខូច​បណ្តើរៗ​ ខណៈថៃបន្ត​បិទ​​គ្មាន​ដំណោះស្រាយ

ខេត្តបាត់ដំបង៖ តាង៉ែន​របស់​កសិរ​រាប់​តោន​ចាប់ផ្តើម​ខួច​បណ្តើរៗ ខណៈ​ក្រុមឈ្មួញនិងកសិករអ្នកដាំដំណាំតាង៉ែនហៅ (មៀនប៉ៃលិន) នៅតំបន់ព្រំដែន​បានបន្តបិទចរាចរណ៍ នៅមាត់ច្រកទ្វាអន្តរជាតិដូង ដើម្បីសុំឲ្យអាជ្ញាធរ​ជួយ​ដោះស្រាយជាលើកទី៣ ក្រោយអាជ្ញាធរថៃបិទមិនឲ្យនាំផ្លែឈើនេះចូលលក់ឲ្យឈ្មួញថៃ។

តំណាងក្រុមប្រជាកសិករដាំដំណាំតាង៉ែនបានឲ្យដឹងនៅថ្ងៃទី១៣ខែសីហានេះថា ការបន្តបិទផ្លូវច្រករបៀងជាលើក​ទី៣នេះ ក្រោយពីពួកគាត់បានបិទតវ៉ាតាំងពីថ្ងៃទី១០ខែសីហា ដើម្បីឲ្យអាជ្ញាធរខេត្តបាត់ដំបងរកដំណោះ​ស្រាយ​ជាមួយភាគីថៃ តែរហូតមកដល់ថ្ងៃទី១៣ខែសីហា នៅតែគ្មានដំណោះស្រាយទើបបន្តបិទថ្ងៃនេះ​ជាថ្ងៃទី៣បន្តទៀត។

តំណាង​កសិករ​បាន​បន្ត​ថា បើ​គ្មាន​ដំណោះស្រាយឆាប់​រហ័ស​ កសិកផល​របស់​ពួកគាត់​នឹង​ខូចខាត​ខាតបង់ជា​មិនខាន។

មកទល់ព្រឹកថ្ងៃ ១៣ សីហានេះ កសិផល (ផ្លែតាង៉ែន) របស់កសិករ​ខ្មែរ​ ដែលផ្ទុកនៅលើរថយន្តបានខូច​ផ្ទុះបែកជាបណ្តើរៗ​ហើយ នៅតែមិនទាន់មានការសម្របសម្រួលគ្នារកដំណោះស្រាយ ខណៈ​ក្រុមឈ្មួញថៃនិងចិននៅក្នុងទឹកដីថៃកំពុងរងចាំទទួលទិញនោះ។

ការអនុវត្តច្បាប់រឹតបណ្តឹង និងបិទមិនឲ្យផ្លែតាង៉ែនខ្មែរនាំចូលពីសំណាក់អាជ្ញាធរថៃនេះ មិនមានភាពស្មើគ្នាឡើយ ខណៈកសិផលកសិករខ្មែរបានរឹតត្បិតមិនឲ្យនាំចូល ប៉ុន្តែទំនិញជាច្រើនប្រភេទរបស់ថៃ បែរជាមានសិទ្ធនាំចូលមកក្នុងទីផ្សារកម្ពុជារាប់សិបឡានក្នុងមួយថ្ងៃៗបែបនេះទៅវិញ ហើយប្រសិនបើមិនអនុញ្ញាតិឲ្យផ្លែឈើខ្មែរនាំចូលទេនោះ ក៏គួរបិទមិនឲ្យមានទំនិញគ្រប់ប្រភេទរបស់ថៃនាំចូលវិញផងដែរ ទើបមានភាពស្មើគ្នាក្នុងនាមប្រទេសជិតខាងគ្នា។

កសិករ​ស្នើសុំឲ្យអាជ្ញាធរខេត្តបាត់ដំបងឬក្រសួងពាណិជ្ជកម្ម ពិសេសរាជរដ្ឋាភិបាលមេត្តា​ជួយរកដំណោះស្រាយ​ឲ្យ​ឆាប់​រហ័ស ឲ្យពួកគាត់ជាកសិករផង។ ពុំនោះទេកសិផលរបស់ពួកគាត់មិនចំពោះតែរុក្ខជាតិ​តាង៉ែន​ហៅ​មៀនប៉ៃលិន ក៏ដូចជាកសិផលផ្សេងៗទៀតនឹងជួបបញ្ហាអត់ទីផ្សារជាក់ជាមិនខាន ព្រោះបច្ចុប្បន្នប្រទេស​ថៃគឺជាទីផ្សារធំទី១ សម្រាប់កសិករផ្គត់ផ្គង់និងនាំចេញរាល់ផលិតផលនិងកសិផល។

ក្រោយពីអាជីវករនិងប្រជាកសិករនាំគ្នាបិទផ្លូវមាត់ច្រករបៀងអស់ជាង២ម៉ោង ដោយចាប់ពីម៉ោង៨:០០នាទីព្រឹក លោកសុខ គឹមខុន អភិបាលស្រុកកំរៀងបានអនុញ្ញាតិឲ្យបងប្អូនប្រជាកសិករ តំណាងសមាគមន៍អ្នកដាំ​តាង៉ែនហៅ (មៀនប៉ៃលិន)ចំនួន៣ខេត្ត មានតំណាងសមាគមន៍ក្នុងខេត្តបាត់ដំបង ខេត្តបន្ទាយមានជ័យនិងខេត្តប៉ៃលិនទៅជួបគ្នា ដើម្បីរឹះរកគន្លឹសឬរកច្រកចេញជំនួសឲ្យការបិទបែបនេះវិញ។

បើទោះបែបណា ពួកគាត់ស្នើសុំឲ្យអាជ្ញាធរខេត្តបាត់ដំបង ជាមួយខេត្តថៃជាប់ព្រំដែនគ្នា បានជួបគ្នានិងផ្តល់ការ​យោគយល់អនុគ្រោះ សម្រួលដល់កសិករនាំចេញក្នុងកម្រិត​ណា​អាចធ្វើទៅបាន ល្អប្រសើរជាងការ​ជួបតែ​តំណាងសហគមន៍គ្នាឯង រកផ្លូវចេញដោយខ្លួនឯងបែបនេះ៕

អត្ថបទ៖ សៅ សារិទ្ធ