ព័ត៌មានជាតិ

ភ្នំពេញ ចាប់ផ្តើមមានរថយន្តពន្លត់អគ្គិភ័យ ដែលមានដងយោងកម្ពស់៥២ម៉ែត្រ

បានផុស

៣ years មុន

នៅ

ថ្ងៃអាទិត្យ ២២ សីហា ២០២១

ដោយ

នៅរាជធានីភ្នំពេញ ចាប់ផ្តើមមានរថយន្តពន្លត់អគ្គិភ័យ ដែលមានដងយោងកម្ពស់៥២ម៉ែត្រហើយ ដើម្បីជាប្រយោជន៍យ៉ាងសំខាន់ ដល់ការអន្តរាគមន៍បាញ់ទឹកទប់ស្កាត់អណ្តាតភ្លើង ឬធ្វើការបាញ់សង្គ្រោះ ពេលមានហេតុការណ៍គ្រោះអគ្គិភ័យនៅតំបន់ដែលតូចចង្អៀត ឬស្មុគស្មាញពិបាកសម្រាប់រថយន្តពន្លត់អគ្គិភ័យខ្នាតតូចៗ អាចចូលទៅបាញ់ទឹកសង្គ្រោះបាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីវេលាព្រឹកថ្ងៃទី២១ ខែសីហា ឆ្នាំ២០២១នេះ ក្រុមមន្ត្រី នៃការិយាល័យពន្លត់បង្ការ និងសង្គ្រោះគ្រោះអគ្គិភ័យ នៃស្នងការដ្ឋាននគរបាលរាជធានីភ្នំពេញ ដឹកនាំដោយលោកវរសេនីយ៍ឯក ព្រហ្ម យ៉ន នាយការិយាល័យ បានធ្វើការរៀនសូត្រ និងហ្វឹកហាត់ អំពីការប្រើប្រាស់រថយន្តខាងលើនេះ ឲ្យបានស្ទាត់ជំនាញជាមុនសិន មុនឈានដល់ការអនុញ្ញាតឲ្យដំណើរការប្រើប្រាស់ជាផ្លូវការណ៍នៅពេលខាងមុខ ។

រថយន្តពន្លត់អគ្គិភ័យខ្នាតធំនេះ ជាប្រភេទរថយន្តម៉ាក EVERDIGM Model ERL 54C ដែលអាចស្ទុកទឹកបានចំណុះ ៣.៥០០លីត្រ ដែលមានដងយោងកម្ពស់ ៥២ម៉ែត្រ ។

មន្ត្រីការិយាល័យអគ្គីភ័យ រាជធានីភ្នំពេញម្នាក់ បានប្រាប់កម្ពុជាថ្មីឲ្យដឹងថា៖ រថយន្តខាងលើ គឺមាន២គ្រឿង ដែលជាអំណោយដ៏ថ្លៃថ្លា របស់ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ដែលបានផ្តល់មកឲ្យការិយាល័យអគ្គីភ័យ ចំណុះស្នងការដ្ឋាននគរបាលរាជធានីភ្នំពេញ០១គ្រឿង និងមួយគ្រឿងទៀត ប្រគល់ជូនទៅខាងនាយកដ្ឋានពន្លត់ និងបង្ការគ្រោះអគ្គិភ័យ នៃក្រសួងមហាផ្ទៃ ដើម្បីជាប្រយោជន៍សំខាន់ ក្នុងការអន្តរាគមន៍ជួយសង្គ្រោះពលរដ្ឋ លើករណីឆាបឆេះផ្សេងៗនានា ៕