ខេត្តកំពង់ចាម នឹងបើកឲ្យសិស្ស ចាប់ពីអនុវិទ្យាល័យឡើងទៅ ចូលរៀននៅថ្ងៃទី២០ កញ្ញាខាងមុខ

អភិបាលខេត្ត កំពង់ចាមលោក អ៊ុន ចាន់ដា បានសម្រេចបើកឲ្យសិស្ស ចាប់ពីអនុវិទ្យាល័យឡើងទៅ និងសាលាពុទ្ធិកៈ ចូលសិក្សានៅថ្ងៃទី២០ ខែកញ្ញាខាងមុខនេះ ហើយរហូតដល់ថ្ងៃទី១១ ខែតុលា ទើបបើកឲ្យសិស្សថ្នាក់បឋម ចូល​រៀន តាមក្រោយ។

លោកអភិបាលខេត្ត បានសម្រេចដូច្នេះ បន្ទាប់ពីបានពិភាក្សា ជាមួយមន្ត្រីពាក់ព័ន្ធ នៅព្រឹកថ្ងៃទី១០ ខែកញ្ញា ឆ្នាំ២០២១ ក្នុងកិច្ចប្រជុំពិនិត្យ និងវាយតម្លៃអំពីការបើក គ្រឹះស្ថានអប់រំសាធារណៈ និងឯកជនឡើងវិញ ក្នុងភូមិ សាស្ត្រ ខេត្តកំពង់ចាម។

លោកអភិបាលខេត្ត បានមានប្រសាសន៍ឲ្យដឹងថា រដ្ឋបាលខេត្តកំពង់ចាម នឹងបើកឲ្យសិស្សចូលរៀន ចែកជាពីរដំណាក់កាល ដោយដំណាក់កាលទី.១ ឲ្យសិស្សចាប់ពីថ្នាក់អនុវិទ្យាល័យឡើងទៅ និងសាលាពុទ្ធិក: ចូលរៀននៅ ថ្ងៃទី២០ ខែកញ្ញា និងដំណាក់កាលទី.២ ឲ្យសិស្សថ្នាក់បឋមសិក្សា ចូលរៀននៅថ្ងៃទី១១ ខែតុលា ឆ្នាំ២០២១​ខាងមុខ ដែលការសម្រេចឲ្យសិស្ស ចាប់ពីអនុវិទ្យាល័យចូលរៀនមុននេះ ដោយសារពួកគេ បានចាក់វ៉ាក់សាំង ការពារជំងឺកូវីដ-១៩ រួចហើយ។

ម្យ៉ាងទៀតពួកគេ ស្ថិតនៅក្នុងវ័យមួយ ដែលទទួលបានការអប់រំច្រើន អំពីវិធានការ ការពារការឆ្លង រាលដាលនៃជំងឺ កូវីដ-១៩ ហើយនៅដំណាក់កាលទី២នេះ គឺដោយទុកឱកាសឲ្យលោកគ្រូ-អ្នកគ្រូ មន្ទីរអប់រំ ក៏ដូចជាអាជ្ញាធរដែនដី បានរៀបចំយុទ្ធសាស្ត្រ ដើម្បីគ្រប់គ្រងពួកគេឲ្យបានល្អសិន ដោយហេតុថា សិស្សថ្នាក់បឋម គឺនៅតូចៗ ដែល ពិបាក​គ្រប់គ្រង។

យោងតាមរបាយការណ៍ របស់មន្ទីរអប់រំ យុវជន និង កីឡាខេត្តកំពង់ចាម សម្រាប់គ្រឹះស្ថានសិក្សាសាធារ ណៈ និងឯកជន ដែលត្រូវស្នើបើកឲ្យដំណើរនោះរួមមាន៖ បឋមសិក្សា ចំនួន៣៥៤, អនុវិទ្យាល័យ ចំនួន៨១, វិទ្យាល័យ  ចំនួន៤២, និងគ្រឹះស្ថានសិក្សាឯកជន ចំនួន៣១កន្លែង៕

អត្ថបទ៖ ហុង  ម៉េងហៀ