រដ្ឋបាលខេត្តកែប កាត់ដីជិត ៨ ពាន់ម៉ែត្រការ៉េឲ្យទៅក្រសួងយុត្តិធម៌ធ្វើការសាងសង់សាលាដំបូងខេត្ត

ផ្ទៃដីទំហំ ៧,៩៨១ម៉ែត្រការ៉េ ស្ថិតនៅភូមិកែប សង្កាត់កែប ក្រុងកែប ខេត្តកែប ត្រូវបានកាត់ចេញពីបញ្ជីសារពើភណ្ឌទ្រព្យសម្បត្តិរដ្ឋរបស់រដ្ឋបាលខេត្តកែបមកក្នុងបញ្ជីសារពើភណ្ឌទ្រព្យសម្បត្តិរដ្ឋរបស់ក្រសួងយុត្តិធម៌សម្រាប់សាងសង់សាលាដំបូងខេត្ត នាព្រឹកថ្ងៃទី២២ ខែធ្នូ ឆ្នាំ ២០២១​ នេះ។

លោក ងិន ងិនដា អភិបាលរងខេត្តកែប បានឲ្យដឹងថា រដ្ឋបាលខេត្តកែប បានចុះមកពិនិត្យ និងវាស់វែងទីតាំងដីដែលរដ្ឋបាលខេត្តកែប បានផ្ទេរមកក្នុងបញ្ជីសារពើភណ្ឌរបស់ក្រសួងយុត្តិធម៌សម្រាប់សាងសង់សាលាដំបូងខេត្តកែប ដោយពេលនេះ ខាងខេត្តបានសម្រេចបោះបង្គោលទីតាំងចំនួន១៩​ ចំណុចក្នុងនោះ បានប៉ះជាមួយផ្ទះប្រជាពលរដ្ឋចំនួនមួយទីតាំងដែលបានសាងសង់លើដីចំណីផ្លូវរបស់រដ្ឋ។ ក្រៅពីនេះ មានការលួចបោះបង្គោលរំលោភយកដីមួយចំនួននៃទីតាំងនេះពីសំណាក់ជនអនាមិក។ តែយ៉ាងណា លោកបានអះអាងថា រដ្ឋបាលខេត្តនឹងព្យាយាមសម្របសម្រួល និងដោះស្រាយចំពោះបញ្ហាទាំងនេះ ដើម្បីឲ្យដំណើរការនៃការសាងសង់របស់ក្រសួងយុត្តិធម៌ប្រព្រឹត្តទៅបានល្អ ។

បន្ថែមពីលើការផ្តល់ទីតាំងដីសម្រាប់សាងសង់សាលាដំបូងខេត្ត និងអយ្យការអមសាលាដំបូងខេត្ត គឺរដ្ឋបាលខេត្តកែប ក៏បានស្នើសុំកាត់ឆ្វៀលដីរបស់រដ្ឋប្រមាណ៥ហិកតាផ្សេងទៀត ធ្វើជាអនុប្រយោគជាដីឯកជនរបស់រដ្ឋឱ្យទៅអគ្គនាយកដ្ឋានពន្ធនាគារនៃក្រសួងមហាផ្ទៃសម្រាប់ធ្វើការសាងសងពន្ធនាគារថ្មីមួយដែលមានទីតាំងស្ថិតនៅភូមិអន្ទង់ស ឃុំ ពងទឹក ស្រុកដំណាក់ចង្អើរ។

គួរបញ្ជាក់ថា សាលាដំបូងខេត្តកែប និងអយ្យការអមសាលាដំបូងខេត្តកែប ត្រូវបានប្រកាសដាក់ឲ្យដំណើរការកាលពីថ្ងៃទី២៤ ខែកញ្ញា ឆ្នាំ ២០២១ កន្លងទៅ ក្រោមអធិបតីភាពលោក កើត រិទ្ធិ រដ្ឋមន្រ្តីក្រសួងយុត្តិធម៌៕

អត្ថបទ ៖ណារី