ព័ត៌មានជាតិ

បារីគេចពន្ធនាំចេញពីកម្ពុជា ៦,០០០ កញ្ចប់ ត្រូវទាហានថៃចាប់បាន

បានផុស

២ years មុន

នៅ

ថ្ងៃចន្ទ ១០ មករា ២០២២

ដោយ

បារី៣ប្រភេទសរុបមានចំនួន ៦,០០០ កញ្ចប់ ដែលបាននាំឆ្លងដែនចេញពីកម្ពុជា ដើម្បីយកទៅ ចែកចាយក្នុងប្រទេសថៃត្រូវទាហានឈុតខ្មៅថៃប្រចាំព្រំដែនខេត្តស៊ីសាកេត ចាប់បានរួមជាមួយនិងជនជាតិថៃចំនួន២នាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការរបស់ទាហានឈុតខ្មៅ លេខ៣ របស់ថៃ បានធ្វើឡើងនៅល្ងាចថ្ងៃទី៩ ខែមករា ឆ្នាំ២០២២ បន្ទាប់ពីមានការសង្ស័យទៅលើរថយន្តមួយគ្រឿងម៉ាកតូយូតា ពាក់ស្លាកលេខ ស៊ីសាកេត ៣២៨៩ ។ ដោយឃាត់រថយន្តនៅចំណុចក្បែរព្រំដែនច្រកជាំស្រងាំ ភាគខាងកើតនៃភូមិ៤ ឃុំផៃផាត់តាណា ស្រុកភូសឹង្ហ ខេត្តស៊ីសាកេត។

ក្រោយការត្រួតពិនិត្យ គេឃើញមានជនជាតិថៃចំនួន២នាក់ សុទ្ធសឹងជាអ្នករស់នៅក្នុងខេត្តស៊ីសាកេត ដោយឡែកនៅគូទរថយន្តគឺមានកេសក្រដាសជាច្រើន ហើយនៅក្នុងនោះសមត្ថកិច្ចបានរកឃើញមានបារីគេចពន្ធចំនួន៣យីហោ ។

បារីទាំងនោះ គឺមានយីហោ SMS ចំនួន៤៤០កញ្ចប់ យីហោ Marlboro មានចំនួន៦០០កញ្ចប់ និង យីហោ Texas5 ចំនួន ៤.៩៦០ កញ្ចប់ សរុបមានចំនួន ៦.០០០ កញ្ចប់ ដែលពួកគេបានសារភាពថា ទិញពីកម្ពុជាដើម្បីយកទៅលក់បន្តក្នុងប្រទេសថៃ។

បច្ចុប្បន្នជនសង្ស័យទាំង២នាក់ រួមនិងវត្ថុតាង ត្រូវបានកម្លាំងយោធាថៃ ប្រគល់ទៅអោយអង្គភាពជំនាញដើម្បីអនុវត្តបន្តតាមផ្លូវច្បាប់ ៕

អត្ថបទ៖ សោ និយមរ័ត្ន