មេឃុំទឹកក្រហ​ម ប្រើប្រាស់វិធីសាស្រ្ដ «នាង អ្នក យក្ស» ដើម្បីដោះស្រាយបញ្ហាជាមួយពលរដ្ឋ

មេឃុំទឹកក្រហ​ម ស្រុកជាំក្សាន្ត ខេត្ដព្រះវិហារ បានអះអាងថា នៅក្នុងការដោះស្រាយបញ្ហា ជាមួយប្រជាពលរដ្ឋនាពេលកន្លងមក ដែលទទួលបានជោគជ័យនោះ គឺលោកប្រើវិធីសាស្រ្ដចំនួន ៣ គឺនាង, អ្នក, និងយក្ស។

លោក វ៉ន សារ៉ុម មេឃុំទឹកក្រហ​ម បានឲ្យដឹងក្នុងសន្និសីទសារព័ត៌មាន ស្ដីពី “វឌ្ឍនភាពមូលដ្ឋានឃុំ-សង្កាត់ និងទិសដៅការងារបន្ដ របស់រដ្ឋបាលខេត្តព្រះវិហារ” នៅព្រឹកថ្ងៃទី ១៥ ខែកុម្ភៈនេះថា លោកប្រើវិធីសាស្រ្ដចំនួន ៣ ដើម្បីដោះស្រាយបញ្ហានានា ជាមួយប្រជាពលរដ្ឋក្នុងមូលដ្ឋានរបស់លោក។ វិធីសាស្រ្ដទាំង ៣នោះ រួមមាន៖ នាង, អ្នក, និងយក្ស។

លោក វ៉ន សារ៉ុម បាននិយាយឲ្យដឹងយ៉ាងដូច្នេះថា «ប៉ុន្តែយុទ្ធសាស្រ្ដរបស់ខ្ញុំ ខ្ញុំ​ប្រើ ៣ ទៅលើប្រជាជន​របស់ខ្ញុំ ដែលទទួលបានជោគជ័យនេះ ទីមួយត្រូវប្រើនាង ទៅសហការជាមួយគាត់ យើងប្រើនាង ដល់ពីរយើងប្រើអ្នក ទៅរកគាត់ដែរ ប៉ុន្តែបើគាត់អត់ស្ដាប់យើង យើងប្រមូលកម្លាំងរបស់យើងមក យើងប្រើយក្ស ម៉េចប្រើយក្ស យកច្បាប់មកអនុវត្ត ថា ទៅកន្លែងនេះៗៗ វាមានហេតុផល ចេះៗៗ ទៅទាក់ទងផ្លូវច្បាប់ ចូលយក្សហើយ»។

មេឃុំទឹកក្រហ​ម ស្រុកជាំក្សាន្ត លោក វ៉ន សារ៉ុម បានបញ្ជាក់ទៀតថា វិធីសាស្រ្ដរបស់លោកទាំង ៣ខា​ងលើនេះ គឺអនុវត្តទទួលបានជោគជ័យនាពេលកន្លង ជាមួយប្រជាពលរដ្ឋក្នុងមូលដ្ឋានឃុំទឹកក្រហ​ម៕

អត្ថបទ៖ ឃួន សុភ័ក្រ