ព័ត៌មានជាតិ

មន្ត្រីនគរបាលម្នាក់ រងរបួសធ្ងន់ ខណៈរថយន្ត ខ.ម បើកបុក នៅស្រុកកូនមុំ

បានផុស

៣ years មុន

នៅ

ថ្ងៃពុធ ១៦ ធ្នូ ២០២០

ដោយ

មន្ត្រីនគរបាលការពារគោលដៅសណ្ដាប់ធ្នាប់ម្នាក់ បានរងរបួសធ្ងន់ ខណៈឈរបញ្ជាយានយន្តគ្រប់ប្រភេទឲ្យឈប់ ដើម្បីត្រួតពិនិត្យសណ្ដាប់ធ្នាប់ នៅលើកំណាត់ផ្លូវជាតិលេខ៧៨ ត្រង់ចំណុចហួសផ្លូវកែងប្រមាណជាង៣០០ម៉ែត្រ ស្ថិតនៅក្នុងភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី ស្រាប់តែឃាត់ប៉ះចំរថយន្តពាក់ស្លាក់លេខ ខ.ម (ខេមរភូមិន្ទ)មិនបានគោរពច្បាប់ចរាចរណ៍នោះឡើយ គឺបើកសំដៅបុកយ៉ាងពេញទំហឹងតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីគ្រោះថ្នាក់ចរាចរណ៍ បានកើតឡើងកាលពីវេលាម៉ោង ៥និង១០នាទីព្រលឹម ថ្ងៃទី១៦ ខែធ្នូឆ្នាំ២០២០នេះ។ តាមប្រភពពីសមត្ថកិច្ចប្រចាំគោលដៅ នៅកន្លែងកើតហេតុបានឲ្យដឹងថា គេឃើញរថយន្តម៉ាក Masada ពណ៌ត្រេអ៊ី ១គ្រឿងពាក់ស្លាកលេខ ខ.ម 02. 2-1215 មិនស្គាល់អត្តសញ្ញាណអ្នកបើកបរ ក្នុងទិសដៅពីកើតទៅលិច (ពីរតនគិរីទៅស្ទឹងត្រែង)ខណៈមកដល់គោលដៅប្រចាំការរបស់នគរបាលការពារសណ្ដាប់ធ្នាប់ខាងលើ អ្នកបើកបរមិនបានគោរពតាមបទបញ្ជារបស់សមត្ថកិច្ចត្រួតពិនិត្យក្នុងគោលដៅនោះឡើយ គឺបំពានច្បាប់ចរាចរណ៍បំបោលបុកតែម្តង កៀរមន្ត្រីនគរបាលម្នាក់ឲ្យរងរបួសយ៉ាងដំណំ។

ប្រភពដដែលបន្តថា មន្ត្រីនគរបាលដែលរងរបួសនោះមាន ឈ្មោះ ព្រំ ចន្ធី ភេទប្រុស អាយុ៥៤ឆ្នាំ ជនជាតិខ្មែរ មុខរបរនគរបាលការពារសណ្តាប់ធ្នាប់ បានរងរបួសត្រង់ក្បាល និងចង្កេះធ្ងន់ធ្ងរ ត្រូវបានដឹកបញ្ជូនទៅមន្ទីរពេទ្យបង្អែកខេត្ត ដើម្បីសង្គ្រោះបន្ទាន់។ ចំណែករថយន្តបង្ក ក្រោយពីកើតហេតុបានបន្ថែមល្បឿនបើកទៅប្លុងចោលដល់ភូមិស្រែបវឹកស ស្ថិតនៅក្នុងភូមិស្រែអង្ក្រង ឃុំត្រពាំងក្រហម ម្ចាស់រថយន្តដកសោរត់គេចខ្លួនបាត់ស្រមោល។ កម្លាំងនគរបាលអធិការនិងកម្លាំងកងរាជអាវុធហត្ថស្រុកកូនមុំ បានដេញតាមនិងស្ទូចយករថយន្តបង្កនោះ យកមករក្សាទុកនៅអធិការដ្ឋាននគរបាលស្រុកកូនមុំ ដើម្បីចាត់ការតាមនីតិវិធីបន្ត៕