ច្បាប់៖ ជនណាបង្កគ្រោះថ្នាក់ឱ្យស្លាប់មនុស្សច្រើននាក់ក្នុងស្ថានភាពស្រវឹង អាចដាក់ពន្ធនាគារពី ២ឆ្នាំ ទៅ៥ឆ្នាំ

កាលពីថ្ងៃទី២០ ខែមករា ឆ្នាំ២០២៤ វេលាម៉ោង៧យប់​ មានករណី​គ្រោះថ្នាក់ចរាចរណ៍មួយគួរឱ្យភា្ញក់ផ្អើល នៅចំណុចស្ពានអាកាសឫស្សីកែវ ស្ថិត​នៅសង្កាត់ឬស្សីកែវ ខណ្ឌឬស្សីកែវ ដែលបានបុករះបណ្ដាលឱ្យមនុស្សប្រុសស្រីចំនួន៤នាក់​ បានបាត់បង់ជីវិត និងរងរបួសធ្ងន់ស្រាលមួយចំនួន។ ករណីបុករះឱ្យមនុស្សស្លាប់នេះ បានបង្កឡើងដោយរថយន្ត​ម៉ាក​ Ford Ranger ដែលបើកបរ​ដោយឈ្មោះ នាង សំអូន ស្ថិតក្នុងស្ថានភាពស្រវឹង។

បើតាមប្រភព​ព័ត៌មាន នៅ​មុន​ពេល​កើតហេតុ​នៅ​ចំណុច​ទីតាំង​ខាងលើ គឺ​កំពុង​មាន​ការ​មមាញឹក​ចរាចរណ៍​ ខណៈ​រថយន្ដ និងម៉ូតូជាច្រើន​គ្រឿង​ឈប់​រង់ចាំ​ស្ដុប ក៏ប៉ុន្តែភ្លាមៗ​ស្រាប់ ​តែ​មានរថយន្ត​ម៉ាក​ Ford Ranger មួយគ្រឿងពណ៌ស ធ្វើដំណើរចុះពីស្ពានឬស្សីកែវ ក្នុងទិសដៅពីកើតមកលិច ដោយល្បឿនយ៉ាងលឿន បានមកបុករះម៉ូតូ និងរថយន្ដយ៉ាងពេញទំហឹង​ជាច្រើនគ្រឿង ដែលបណ្ដាល​ឱ្យ​មាន​មនុស្ស​ដេក​ដួល​​ពេញផ្លូវ ខ្លះ​កៀប​ជាប់​ក្រោម​រថយន្ដ។

​រថយន្ត​បង្ក​ម៉ាក Ford Ranger បើកបរ​ដោយឈ្មោះ នាង សំអូន ភេទប្រុស អាយុ៥៦ឆ្នាំ មុខរបរ មន្ត្រីក្រសួងហិរញ្ញវត្ថុ ដែលបានបើកបរ​ក្នុង​កម្រិត​ជាតិ​អាកុល ០.៥៤ មីលីក្រាមក្នុងមួយលីត្រខ្យល់។ ប៉ុន្តែយ៉ាងណា ភ្លាមៗក្រោយ​កើត​ហេតុ​ សមត្ថកិច្ច​ជំនាញ​ចរាចរណ៍​ផ្លូវ​គោក ​នៃ​ស្នងការដ្ឋាននគរបាល​រាជធានីភ្នំពេញ ក៏បាន​ឃាត់​ខ្លួន​ម្ចាស់​រថយន្ត​បង្ក​ ដើម្បីអនុវត្តតាមនីតិវិធីច្បាប់ជាធរមាន។

ពាក់ព័ន្ធនឹងករណីគ្រោះថ្នាក់ចរាចរណ៍បុករះបណ្ដាលឱ្យមនុស្សស្លាប់ច្រើននាក់បែបនេះ ក៏មានការចោទសួរថា តើជនបង្កអាចប្រឈមនឹងមុខច្បាប់បែបណា ហើយត្រូវផ្តន្ទាទោសក្នុងកម្រិតណា?

បើតាមបទប្បញ្ញតិ្តស្តីពីចរាចរណ៍ផ្លូវគោក ប្រសិនបើជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ច បណ្តាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ និងពិន័យជាប្រាក់ពី ៤លាន រៀល ទៅ១៥លានរៀល និងអាចត្រូវផ្តន្ទាទោសដោយទោសបន្ថែមមួយ ឬ ច្រើន ដូចមានចែងក្នុងក្រមព្រហ្មទណ្ឌ។

ជាមួយគ្នានេះ អំពើល្មើសខាងលើ ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ១០លានរៀល ទៅ២៥លានរៀល កាលបើអំពើនេះបានប្រព្រឹត្តក្នុងករណីណាមួយ ដូចជា៖ ១) បើកបរដោយគ្មានបណ្ណបើកបរ ឬមានបណ្ណបើកបរតែមិនត្រឹមត្រូវតាមប្រភេទយានយន្ត។ ខ) ស្ថិតក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ មីលីក្រាមក្នុងមួយលីត្រខ្យល់ ឬចាប់ពី ០,៨០ ក្រាមក្នុងមួយលីត្រឈាមឡើងទៅ។ គ) បណ្តាលឱ្យមានស្លាប់មនុស្សច្រើននាក់។ ឃ) រត់គេចខ្លួនពីកន្លែងកើតហេតុ ក្នុងគោលបំណងគេចវេះពីការទទួលខុសត្រូវ។

ដូច្នេះ ករណីគ្រោះថ្នាក់ចរាចរណ៍បុករះ រហូតបណ្ដាលឱ្យមនុស្សស្លាប់ជាច្រើននាក់ ហើយជនបង្កគ្រោះថ្នាក់ស្ថិតក្នុងស្ថាន ភាពស្រវឹងបែបនេះ អាចនឹងប្រឈមជាប់នឹងទោសជាប់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ១០លានរៀល ទៅ២៥លានរៀល រួមទាំងទោសបន្ថែមមួយចំនួនទៀតស្របតាមច្បាប់កំណត់ជាធរមាន៕