អភិបាលរាជធានីភ្នំពេញ សម្ដែងការកោតសរសើរចំពោះប្រជាពលរដ្ឋ ដែលបានទៅចូលរួមបោះឆ្នោតយ៉ាងច្រើនកុះករ

អភិបាល នៃគណៈអភិបាលរាជធានីភ្នំពេញលោក ឃួង ស្រេង បានសម្ដែងនូវការកោតសរសើរយ៉ាងខ្លាំង ចំពោះប្រជាពលរដ្ឋរស់នៅរាជធានីភ្នំពេញ ដែលបានទៅចូលរួមបោះឆ្នោតយ៉ាងច្រើនកុះករ នាថ្ងៃទី ៥ ខែមិថុនា ឆ្នាំ ២០២២នេះ ដើម្បីបង្ហាញពីកាតព្វកិច្ចរបស់ខ្លួន ជាប្រជាពលរដ្ឋល្អក្នុងសង្គម។ នេះពិតជាបង្ហាញឲ្យឃើញពីលទ្ធិប្រជាធិបតេយ្យនៅកម្ពុជា កាន់តែរឹងមាំពីអាណត្តិមួយទៅអាណត្តិមួយ។

ការលើកឡើងបែបនេះ របស់លោក ឃួង ស្រេង បានធ្វើឡើងនាព្រឹកថ្ងៃទី ៥ ខែមិថុនានេះ ខណៈដែលលោក និងលោកស្រីបានអញ្ជើញទៅបោះឆ្នោត ជ្រើសរើសក្រុមប្រឹក្សាសង្កាត់ នៅការិយាល័យបោះឆ្នោត ក្នុងកាំកូស៊ីធី ក្នុងសង្កាត់ទួលសង្កែទី ២ ខណ្ឌឬស្សីកែវ រាជធានីភ្នំពេញ។

លោក ឃួង ស្រេង មានប្រសាសន៍ថា មានប្រជាពលរដ្ឋខ្លះ បានមកដល់ការិយាល័យបោះឆ្នោតរបស់ខ្លួន តាំងពីម៉ោង ៥ និង ៣០នាទី ខ្លះមកតាំងពីម៉ោង ៦ព្រឹក ដើម្បីមកចូលរួមការបោះឆ្នោត នាថ្ងៃទី ៥ខែមិថុនានេះ។ នេះពិតជាបង្ហាញអំពី ការយល់ដឹងច្បាស់លាស់ពីសំណាក់ប្រជាពលរដ្ឋ អំពីកាតព្វកិច្ចរបស់ខ្លួន ដែលត្រូវបំពេញជាពលរដ្ឋល្អ។

លោកក៏បានបញ្ជាក់ផងដែរថា នៅព្រឹកថ្ងៃបោះឆ្នោតនេះ ចរាចរណ៍នៅតាមដងផ្លូវហាក់មិនសូវជាមមាញឹកដូចថ្ងៃធម្មតាទេ។ នេះក៏ដោយសារតែប្រជាពលរដ្ឋខ្លះ, ក្រុមការងារគណបក្ស ដូចជាកម្មករ-កម្មការិនី ពួកគាត់ចាកចេញពីរាជធានីភ្នំពេញ ទៅតាមបណ្តាខេត្តផ្សេងៗ ដើម្បីចូលរួមបំពេញកាតព្វ កិច្ចក្នុងការបោះឆ្នោតនាថ្ងៃ ៥ មិថុនានេះ។

ពាក់ព័ន្ធនឹងបញ្ហាសន្តិសុខនៅរាជធានីភ្នំពេញ ក្នុងយុទ្ធនាការអានេះការឃោសនាបោះឆ្នោត ដូចជាការបោះឆ្នោតនៅពេលនេះ នៅរាជធានីភ្នំពេញមានសន្តិសុខសណ្តាប់ធ្នាប់ល្អប្រសើរទាំង គណបក្សនយោ បាយ គ្មានអ្វីព្រួយបារម្ភនោះទេ។ ផ្ទុយទៅវិញពួកគាត់បានសម្ដែងនូវការអរគុណ ចំពោះអាជ្ញាធរ កងកម្លាំងមានសមត្ថកិច្ច ដែលបានចាត់ចែងដូចជាការរៀបចំ សន្តិសុខសណ្ដាប់ធ្នាប់ជូនប្រជាពលរដ្ឋ ជូនគណបក្សនានាបានល្អប្រសើរ។ ពួកគាត់ក៏បានបញ្ជាក់ផងដែរថា កម្ពុជាបានឈានទៅរកការអនុវត្តលទ្ធិប្រជាធិបតេយ្យសេរីពហុបក្សកាន់តែរឹងមាំ ពីអាណត្តិមួយទៅអាណត្តិមួយហើយ៕

អត្ថបទ៖ ស្រីរ័ត្ន