ព័ត៌មានជាតិ

មិត្តហ្វូន បន្តឧបត្ថម្ភដល់លីគបាល់ទាត់កំពូលរបស់កម្ពុជា

បានផុស

៣ years មុន

នៅ

ថ្ងៃសុក្រ ២៤ មិថុនា ២០២២

ដោយ

មិត្តហ្វូន (Metfone) ក្រុមហ៊ុនទូរគមនាគមន៍ និងបច្ចេកវិទ្យាឌីជីថលឈានមុខគេនៅកម្ពុជា បានបន្តការឧបត្ថម្ភគាំទ្ររបស់ខ្លួនសម្រាប់លីគកំពូលកម្ពុជា (CPL) រយៈពេលបីឆ្នាំទៀតចាប់ពីឆ្នាំ ២០២២ ដល់ឆ្នាំ ២០២៤ ដែលក្នុងនោះ មិត្តហ្វូននឹងត្រូវឧបត្ថម្ភប្រាក់ចំនួន ៥០ ម៉ឺនដុល្លារក្នុងមួយឆ្នាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីចុះហត្ថលេខាស្ដីពីការឧបត្ថម្ភកម្មវិធីនេះ មានការចូលរួមជាអធិបតី ពីសំណាក់ឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជា លោក Satoshi Saito អគ្គនាយកប្រតិបត្តិក្រុមហ៊ុន ខេមបូឌានព្រីមៀរលីគ (CPL) និងលោក Phung Van Cuong អគ្គនាយកក្រុមហ៊ុន មិត្តហ្វូន។

ថ្លែងនៅក្នុងពិធីចុះហត្ថលេខានោះ លោក Phung Van Cuong បានមានប្រសាសន៍ថា ការឧបត្ថម្ភនេះ គឺជាផ្នែកមួយនៃការប្ដេជ្ញាចិត្តរបស់ក្រុមហ៊ុនមិត្តហ្វូនក្នុងការអភិវឌ្ឍវិស័យកីឡានៅកម្ពុជា ជាពិសេសកីឡាបាល់ទាត់។ លោកបានបន្ថែមទៀតថា ការវិនិយោគលើវិស័យកីឡា គឺជាការវិនិយោគសម្រាប់អនាគត។

លោក Phung Van Cuong មានប្រសាសន៍ថា៖ “ការឧបត្ថម្ភ ដល់វិស័យបាល់ទាត់កម្ពុជា គឺជាទំនួលខុសត្រូវមួយរបស់ក្រុមហ៊ុនមិត្តហ្វូន ដែលរួមចំណែកដល់ការអភិវឌ្ឍន៍ និងការលើកកម្ពស់គុណភាពកីឡាបាល់ទាត់ ក៏ដូចជាកីឡាទូទៅ នៅកម្ពុជាផងដែរ” ។ លោកបានបន្ថែមទៀតថា៖ “តាមរយៈការឧបត្ថម្ភនេះ គឺជាការបង្កើតលក្ខខណ្ឌសម្រាប់ឲ្យកីឡាករបានអនុវត្ត និងប្រកួតគ្នាកាន់តែមានវិជ្ជាជីវៈប្រសើរជាងមុន ដែលរួមចំណែកដល់ការលើកកម្ពស់សមត្ថភាពរបស់ក្រុមកីឡាបាល់ទាត់ ក៏ដូចជាជួយលើកកម្ពស់ដល់កេរ្តិ៍ឈ្មោះរបស់លីកកម្ពុជានៅក្នុងតំបន់ និងនៅកម្រិតអន្តរជាតិ” ។

ប្រធានសហព័ន្ធកីឡាបាល់ទាត់កម្ពុជា ឯកឧត្តម សៅ សុខា បានសម្ដែងការអរគុណចំពោះក្រុមហ៊ុន មិត្តហ្វូន ដែលបានបន្តការឧបត្ថម្ភគាំទ្រដល់កីឡាបាល់ទាត់កម្ពុជា។ ឯកឧត្តម សៅ សុខា មានប្រសាសន៍ថា៖ “យើងពិតជាមានក្ដីសោមនស្សរីករាយ និងអរគុណចំពោះក្រុមហ៊ុនមិត្តហ្វូន ដែលបានគាំទ្រដល់វិស័យបាល់ទាត់កម្ពុជា ចាប់តាំងពីយើងបានចាប់ផ្ដើមដំណើការ លីកពីពេលដំបូងមកម្ល៉េះ។ មិត្តហ្វូន បានចូលរួម និងជួយគាំទ្រដល់យើងខ្ញុំបើទោះបីជាខ្លួនមិនទាន់បានទទួលប្រាក់ចំណេញនៅឡើយ នៅពេលចាប់ផ្ដើមដំណើរការអាជីវកម្មដំបូង។ ប្រសិនបើពុំមានមិត្តហ្វូនទេនោះ លីគបាល់ទាត់របស់យើង ក៏ពុំបានឈានដល់កម្រិតនេះដែរ ។ ខ្ញុំសូមលើកទឹកចិត្តដល់បណ្ដាក្រុមហ៊ុនវិនិយោគទាំងអស់ ក្រឡេកមកមើលក្រុមហ៊ុនមិត្តហ្វូនជាគំរូ” ។

លោក Satoshi Saito អគ្គនាយកប្រតិបត្តិក្រុមហ៊ុន ខេមបូឌានព្រីមៀរលីគ បានថ្លែងអំណរគុណដល់ក្រុមហ៊ុនមិត្តហ្វូនសម្រាប់ការឧបត្ថម្ភគាំទ្រ ដោយលោកបានបន្ថែមទៀតថា តាមរយៈការឧបត្ថម្ភនេះ លីកបាល់ទាត់កម្ពុជា និងបណ្ដាក្លឹបបាល់ទាត់នានា និងមានការលូតលាស់ ហើយកីឡាបាល់ទាត់កម្ពុជា នឹងក្លាយជាឧស្សាហកម្មមួយ ដូចបណ្ដាលីគផ្សេងទៀតនៅក្នុងពិភពលោកផងដែរ ។

លោក Satoshi Saito បានឲ្យដឹងថា៖ “មិត្តហ្វូន និង CPL ជឿថា នឹងជួយអភិវឌ្ឍលីក និងក្លឹបបាល់ទាត់កម្ពុជាឲ្យរីកចម្រើនលូតលាស់ ហើយធ្វើឲ្យក្រុមជម្រើសជាតិរបស់យើងកាន់តែរីកចម្រើនកាន់តែធំ និងរឹងមាំជាពិសេស ដើម្បីត្រៀមសម្រាប់កីឡាស៊ីហ្គេមនៅឆ្នាំក្រោយ និងនៅពេលក្រោយៗទៀត”។

យោងតាមលោក Phung Van Cuong ក្រុមហ៊ុនមិត្តហ្វូនបានជួយឧបត្ថម្ភវិស័យកីឡាបាល់ទាត់កម្ពុជាចាប់តាំងពីឆ្នាំ ២០១០ មកម្លេះ ជាមួយនឹងថវិកាចំណាយអស់ប្រមាណ ៦ លានដុល្លារសហរដ្ឋអាមេរិក។ ចាប់តាំងពីឆ្នាំ ២០០៦ នៅពេលដែលចាប់ផ្ដើមមានវត្តមាននៅកម្ពុជា ក្រុមហ៊ុន មិត្តហ្វូនក៏បានប្រែក្លាយទៅជា ក្រុមហ៊ុនទូរគមនាគមន៍ឌីជីថលធំជាងគេបំផុតនៅកម្ពុជា ដែលមានអ្នកប្រើប្រាស់ចំនួន ៩ លាននាក់ ដែលស្មើនឹង ៥០% នៃចំណែកទីផ្សារ ។

ក្រុមហ៊ុនមិត្តហ្វូនផ្ដល់សេវាបច្ចេកវិទ្យាឌីជីថល និងទូរគមនាគមន៍ ជាច្រើនប្រភេទ ដើម្បីជួយដល់ការអភិវឌ្ឍសង្គមឌីជីថលនៅក្នុងប្រទេសកម្ពុជា៕

Related Topics:មិត្តហ្វូន