ខ្លោងទ្វារថ្មីក្រុងបាវិតនឹងលេចរូបរាងនាពេលឆាប់ៗខាងមុខ

(ខេត្តស្វាយរៀង): លោក លឹម សៀងហេង អភិបាលក្រុងបាវិត បានអញ្ជើញរៀបចំពិធីក្រុងពាលី សាងសង់ ខ្លោងទ្វារចូលសាលាក្រុងបាវិត និងស្ថាបនាផ្លូវបេតុង០១ខ្សែ ប្រវែង ២៤០ម៉ែត្រ ទទឹង ៦ម៉ែត្រ កម្រាស់១តឹកកន្លះ  ដោយប្រើប្រាស់ថវិកាគម្រោងមូលនិធិសាលាក្រុងបាវិត ក្នុងឆ្នាំ២០២២ នៅថ្ងៃទី១៥ ខែកក្កដានេះ។

លោក លឹម សៀងហេង បានឲ្យដឹងថា ការរៀបចំពិធីក្រុងពាលី ស្ថាបនាសាងសង់ខ្លោងទ្វារចូលសាលាក្រុង បាវិតនាពេលនេះ គឺដើម្បីកែលំអ បរិស្ថានអង្គភាពឲ្យមានសោភ័ណភាពស្រស់ស្អាត ស័ក្តិសមជាកន្លែងធ្វើការរបស់ មន្ត្រីសាលាក្រុងប្រកបដោយផាសុកភាព ដែលនាពេលកន្លងមក ទីតាំងរដ្ឋបាលក្រុងនៅពុំទាន់មានរបង ខ្លោងទ្វារសមរម្យនោះទេ។

ដោយឡែក លោកអភិបាលក្រុង បានបន្តថា ផ្លូវបេតុង ០១ខ្សែ ប្រវែង ២៤០ ម៉ែត្រ ទទឹង៦ម៉ែត្រ ដែលកំពុងស្ថាបនានាពេលនេះដែរ គឺដើម្បីជួយសម្រួលដល់ការធ្វើដំណើររបស់មន្ត្រីរាជការ ប្រជាពលរដ្ឋ កងកម្លាំងគ្រប់ប្រភេទ ដែលមកទំនាក់ទំនងសេវាផ្សេងៗ នៅទីតាំងសាលាក្រុងបាវិត ដែលកន្លងមកផ្លូវមួយខ្សែចូលមកកាន់ទីតាំងសាលាក្រុង បានរងនូវការខូចខាតជាអន្លើរៗពិបាកក្នុងការធ្វើដំណើរ។

សូមបញ្ជាក់ថា សមិទ្ធផលដែលបានធ្វើពិធីក្រុងពាលី ស្ថាបនាសាងសង់នាពេលនេះគឺជាសមិទ្ធផលថ្មីមួយបន្ថែមទៀត សម្រាប់រដ្ឋបាលក្រុងបាវិត ដែលបានកំពុងអភិវឌ្ឍន៍រីកចម្រើនលើគ្រប់វិស័យ ទាំងពុទ្ធចក្រ និងអាណាចក្រ ព្រមទាំងវិស័យឯកជនផ្សេងៗរួមមាន រោងចក្រ សហគ្រាស មណ្ឌលកម្សាន្ត បង្កើតឱកាសការងារដល់កូន ចៅប្រជាពលរដ្ឋ ប្រមាណជិត១០ម៉ឺននាក់៕

ដោយ:ភក្ដី