កម្លាំងចម្រុះបង្ក្រាបទីតាំងឆបោកតាមប្រព័ន្ធបច្ចេកវិទ្យា មួយកន្លែងក្រុងបាវិត ឃាត់ខ្លួនជនបរទេស ៣៣នាក់មាន ២សញ្ជាតិ

គណៈបញ្ជាការឯកភាពរដ្ឋបាលក្រុងបាវិត សហការជាមួយកម្លាំងកងរាជអាវុធហត្ថខេត្តស្វាយរៀង បានបើកប្រតិបត្តិការចុះបង្ក្រាបទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scam) មួយកន្លែង ស្ថិតនៅក្នុងក្រុងបាវិត ដោយបានឃាត់ខ្លួនជនបរទេសចំនួន ៣៣នាក់ រួមទាំងដកហូតវត្ថុតាងមួយចំនួនធំ។

ប្រតិបត្តិការនេះបានធ្វើឡើងកាលពីថ្ងៃទី១៥ ខែកក្កដា ឆ្នាំ២០២៦ ដឹកនាំដោយ លោក រ៉េត រក្សា អភិបាលរងក្រុងបាវិត និងមានការចូលរួមពី លោក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀង ដោយមានការសម្របសម្រួលនីតិវិធីផ្ទាល់ពី លោក ដូរ៉ា អង្គប្រទាន ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង។

ទីតាំងដែលសមត្ថកិច្ចចុះបង្ក្រាបនេះគឺជាវីឡាដែលជាកម្មសិទ្ធិរបស់ឈ្មោះ កែវ ផល្លសម្បូរណ៍ ស្ថិតនៅតាមបណ្តោយផ្លូវកំពង់ស្ពាន ក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង។ ក្នុងនោះដែរក៏មានការចូលរួមពីលោកប្រធានមន្ទីរស្រាវជ្រាវ និងបង្ក្រាបបទល្មើស មេបញ្ជាការមូលដ្ឋានកងរាជអាវុធហត្ថក្រុងបាវិត នាយករងរដ្ឋបាលក្រុងបាវិត មេភូមិតាបឹប រួមទាំងកម្លាំងកងរាជអាវុធហត្ថខេត្ត និងក្រុងជាច្រើនរូបទៀត។

ជាលទ្ធផលប្រតិបត្តិការនេះ ក្រុមការងារចម្រុះបានរកឃើញ និងធ្វើការឃាត់ខ្លួនមនុស្សសរុបចំនួន ៣៣ នាក់ (ស្រី ៣ នាក់) ដែលមាន ២ សញ្ជាតិ រួមមាន៖ ជនជាតិវៀតណាម៖ ចំនួន ៣១ នាក់ (ស្រី ៣ នាក់)

ជនជាតិចិន៖ ចំនួន ២ នាក់ (ប្រុស) ដកហូតវត្ថុតាងចម្រុះមួយចំនួនធំ រួមមាន៖ ទូរស័ព្ទដៃ , កុំព្យូទ័រលើតុ លិខិតឆ្លងដែន,  ដុំ Wifi ,ស៊ីមកាត, ក្រាមពណ៌សថ្លា (សង្ស័យជាគ្រឿងញៀន), អត្តសញ្ញាណប័ណ្ណសញ្ជាតិវៀតណាម, កាតធនាគារ, ប័ណ្ណបើកបរ និងសម្ភារៈពាក់ព័ន្ធមួយចំនួនទៀត។

បច្ចុប្បន្ន ជនសង្ស័យរួមទាំងវត្ថុតាងទាំងអស់ ត្រូវបានសមត្ថកិច្ចបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តស្វាយរៀង ដើម្បីបន្តនីតិវិធីច្បាប់ ខណៈទីតាំងវីឡាខាងលើត្រូវបានក្រុមការងារចម្រុះសម្រេចបិទជាបណ្តោះអាសន្ន៕