ព័ត៌មានជាតិ

លោក កឹម ចំរើន ៖ ពលករខ្មែរឆ្លងជំងឺកូវីដ១៩ ទទួលបានការព្យាបាលដូចជនជាតិថៃដែរ

បានផុស

៣ years មុន

នៅ

ថ្ងៃសុក្រ ២៥ ធ្នូ ២០២០

ដោយ

លោក កឹម ចំរើន ទីប្រឹក្សាទទួលបន្ទុកពលករនៅប្រទេសថៃ បានលើកឡើងនៅក្នុងបណ្តាញសង្គមហ្វេសប៊ុកឲ្យដឹងថា ពលករខ្មែរ ដែលមានឆ្លងជំងឺកូវីដ១៩ នឹងទទួលបាននូវការព្យាបាលជំងឺដូចជនជាតិថៃដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងបែបនេះ ធ្វើឡើងបន្ទាប់ពីលោកបានជួបពិភាក្សាការងារជាមួយលោកលោក ស៊ូឆាត ឈុំគ្លីន រដ្ឋមន្ត្រីក្រសួងការងារនៃព្រះរាជាណាចក្រថៃ នៅថ្ងៃទី២៥ធ្នូនេះ ដើម្បីដោះស្រាយ និងទប់ស្កាត់ការរាតត្បាតជំងឺកូវីដ១៩។ លោកបានបន្តថា«យើងកំពុងធ្វើការយើងជិតស្និទ្ធជាមួយរាជរដ្ឋាភិបាលថៃ ដោយភាគីថៃនឹងជូនដំណឹងផ្លូវការករណីមានបងប្អូនខ្មែរមានឆ្លងជំងឺកូវីដ១៩ ព្រមទាំងទទួលព្យាបាលដូចជនជាតិថៃ ផងដែរ»។

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានឲ្យដឹងថា តាមព័ត៌មានដែលទទួលបានមានពលករខ្មែរម្នាក់ ដែលបានធ្វើដំណើរជាមួយក្រុមគ្នាគាត់ចេញពីខេត្តឈុនបូរីទៅទីក្រុងបាងកកប្រទេសថៃ ត្រូវបានអាជ្ញាធរថៃរកឃើញមានឆ្លងជំងឺកូវីដ១៩។ លោកស្រីបានបន្តថា មិនមែនគាត់មានកូវីដ១៩ ពីកម្ពុជា រួចហើយបានឆ្លងចូលទៅប្រទេសថៃនោះទេ ពោលគឺគាត់បានចេញទៅថៃ តាំងពីមុនមានហេតុការណ៍ផ្ទុះឡើងនូវការរកឃើញវីរុសកូវីដ-១៩ នៅខេត្តសាមុតសាខនទៅទៀត។

លោក កឹម ចំរើន បានអំពាវនាវឲ្យបងប្អូនពលករខ្មែរទាំងអស់ រក្សាភាពនឹងនកុំធ្វើការចល័ត ឬរត់គេចពីមួយកន្លែងទៅមួយកន្លែង នៅក្នុងកំឡុងពេលការរីករាលដាលជំងឺកូវីដ១៩ថ្មីៗនេះ ដើម្បីទប់ស្កាត់ការរាតត្បាតជំងឺកូវីដ១៩ ទាំងអស់គ្នា។ លោកបានបន្តទៀតថា នៅក្នុងកំឡុងពេលនេះ មិនមានការចុះចាប់ឃុំខ្លួនឡើយ ហើយអាជ្ញាធរថៃកំពុងរៀបចំគោលនយោបាយ ដើម្បីជួយបងប្អូនពលករ ដែលមិនមានឯកសារស្នាក់នៅ និងធ្វើការអាចបន្តស្នាក់នៅនិងធ្វើការជាបណ្ដោះអាសន្នបន្តទៀត បាននៅក្នុងប្រទេសថៃ។ លោកបានបញ្ជាក់ថា ក្នុងករណីបងប្អូនមានបញ្ហាសូមទំនាក់ទំនងមកស្ថានទូតតាមរយៈហ្វេសប៊ុកឬលេខទូរស័ព្ទ ០៩៤ ០៩២ ៥៩០៥៕

អត្ថបទ៖ សំអឿន

សូមចុចអាន៖ ផ្លូវសំឡូត- វាលវែង-អូរសោម ដល់កោះកុង ជិះទៅមកបានស្រួល ប្រើពេល ៤ ទៅ ៥ ម៉ោងទៅដល់គោលដៅ