អាជ្ញាធរជាតិអប្សរា ហាមលែងត្រីពុំមែនជាប្រភេទត្រីក្នុងស្រុក ក្នុងកសិន្ធុអង្គរ

អាជ្ញាធរជាតិអប្សរា នៅរសៀលថ្ងៃទី៤ ខែវិច្ឆិកា បានជូន សេចក្តីប្រកាសព័ត៌មាន ដោយរំលឹក ហាមឃាត់ការលែងត្រី ដែលពុំមែនជាប្រភេទត្រីក្នុងស្រុក កសិន្ធុអង្គរ ពីព្រោះសកម្មភាពនេះ អាចនាំឱ្យមានការបាត់បង់ពូជត្រីធម្មជាតិក្នុងស្រុក។

ការចេញសេចក្ដីប្រកាសព័ត៌មាននេះ បន្ទាប់ពី ក្រុមការងារសំអាតបរិស្ថាន អនាម័យនៃអាជ្ញាធរជាតិអប្សរា បានស្រង់យកត្រីធំមួយបានងាប់ក្នុងកសិន្ធុអង្គរ មកលើច្រាំង ហើយជូនអ្នកជំនាញខាងជលផលពិនិត្យ និងបានកប់នៅផ្នែកខាងជើង នៃកសិន្ធុប្រាសាទអង្គរវត្ត។

តាមសេចក្តីសន្និដ្ឋានរបស់អ្នកជំនាញផ្នែកជលផល ត្រីស្លាប់នេះ ជាប្រភេទត្រីដែលស៊ីត្រីតូចជាងខ្លួន ជាអាហារ ហើយត្រូវបានមហាជនលួចយកលែងក្នុងកសិន្ធុប្រាសាទអង្គរវត្ត។ ត្រីនោះស្លាប់ដោយធម្មជាតិ ព្រោះពុំមានស្លាកស្នាមរិតរួតនៃមង ឬប្រការអ្វីផ្សេងឡើយ។

គួររំលឹកថា នៅរសៀលថ្ងៃទី៣ ខែវិច្ឆិកា ឆ្នាំ២០២២ វេលាម៉ោង ១៣ និង ៤០នាទី ក្រុមការងារសំអាតបរិស្ថាន អនាម័យនៃអាជ្ញាធរជាតិអប្សរា បានប្រទះឃើញត្រីអារ៉ាប៉ៃម៉ា (Arapaima) ប្រវែង ២​,១៥ម៉ែត្រ ទទឹង ០,៤០ម៉ែត្រ ដែលជាប្រភេទត្រីទឹកសាប មានប្រភពមកពីតំបន់អាម៉ាហ្សូន នៅអាមេរិចខាងត្បូង បានស្លាប់នៅក្នុងកសិន្ធុប្រាសាទអង្គរវត្ត៕