ក្រុមហ៊ុនអាកាសចរណ៍ជាតិកម្ពុជាអង្គរអ៊ែរ ប្រកាសបើកជើងហោះហើរពីសៀមរាប ទៅរដ្ឋធានីហាណូយ

ចាប់ពីថ្ងៃនេះតទៅ កម្ពុជា អង្គរ អ៊ែរ នឹងធ្វើការហោះហើរជាទៀងទាត់ ៣ជើងក្នុងមួយសប្តាហ៍ រវាងទីក្រុងសៀមរាប និងរដ្ឋធានីហាណូយ គឺនៅរៀងរាល់ថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍។ ក្រៅពីជើងហោះហើរទៅរដ្ឋធានីហាណូយ K6 ក៏នៅមានជើងហោះហើរផ្សេងទៀតទៅកាន់ប្រទេសវៀតណាម ដូចជា៖ ជើងហោះហើររវាងសៀមរាប និងហូជីមិញ ២ជើង/ថ្ងៃ, សៀមរាប និងដាណាំង ១ជើង/ថ្ងៃ, ភ្នំពេញ និងហាណូយ ៣ជើង/សប្តាហ៍, ភ្នំពេញ និងហូជីមិញ ២ជើង/ថ្ងៃ និងព្រះសីហនុ និងហូជីមិញ ១ជើង/ថ្ងៃ ផងដែរ។ នេះបើតាមការផ្សព្វផ្សាយនៅលើផេកផ្លូវការរបស់ខ្លួន នៅថ្ងៃទី ២៣ ធ្នូ នេះ។

ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ បានបោះជំហានទៅមុខ ជាមួយជើងហោះហើរដំបូងរវាងទីក្រុងសៀមរាប និងរដ្ឋធានីហាណូយ នៃប្រទេសវៀតណាម ក្រោយពីមានការធូរស្បើយនៃជំងឺកូវីដ-១៩ ដែលមានជើងហោះហើរលេខ K6 852 ត្រូវចេញដំណើរពីអាកាសយានដ្ឋានអន្តរជាតិសៀមរាប។

ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ បានកំណត់ចក្ខុវិស័យរបស់ខ្លួន ជាក្រុមហ៊ុនអាកាសចរណ៍ឈាន​មុខគេនៅកម្ពុជា និងជាក្រុមហ៊ុនអាកាសចរណ៍ដំបូងគេរបស់កម្ពុជា ដែលទទួលបានវិញ្ញាបនបត្រប្រតិបត្តិការសុវត្ថិភាព ពីសមាគមន៍ដឹកជញ្ចូនផ្លូវអាកាសអន្តរជាតិ (IOSA) និងជាសមាជិកផ្លូវការរបស់អង្គការនេះចាប់ឆ្នាំ២០១៧ ដែលធ្វើឱ្យក្រុមហ៊ុនទទួលបាននូវទំនុកចិត្តខ្ពស់ពីអ្នកដំណើរ និងដៃគូអាជីវកម្មនានាទាំងក្នុង និងក្រៅប្រទេស៕