ខ្លីៗ​ជុំវិញ​ភូមិសាស្ត្រ​ក្រុង​ព្រះសីហនុ

ក្រុងព្រះសីហនុ គឺជាក្រុងមួយក្នុងចំណោមក្រុង-ស្រុកទាំង ៥ នៃ​ខេត្តព្រះសីហនុ ដែល​ជាទីក្រុង​កំពង់ផែ សេដ្ឋកិច្ច ពាណិជ្ជកម្ម និង​ទេសចរណ៍ ស្ថិតនៅប៉ែកនិរតីនៃប្រទេសកម្ពុជា ដែលមានវិសាលភាពផ្ទៃដីគ្របដណ្តប់ទំហំសរុប ៨៤,៣៦៤ គីឡូម៉ែត្រការ៉េ។

ប្រជាសាស្ត្រ

គិត​ត្រឹម​ឆ្នាំ ២០២០ ក្រុងព្រះសីហនុ មាន​ប្រជាពលរដ្ឋរស់នៅ​អចិន្ត្រៃយ៍​សរុប​ចំនួន ២៤ ០៦៣​គ្រួសារ សរុប​ចំនួន ៨៣.៦១០នាក់ ក្នុងនោះស្ត្រីចំនួន ៤២.០៣៣ នាក់។ ប្រជាពលរដ្ឋ​មាន​អាយុ ១៨​ឆ្នាំ​ឡើង​ចំនួន ៥៣.១៨២នាក់។

ការបែងចែក​រដ្ឋបាល

រដ្ឋបាល​ក្រុងព្រះសីហនុ ចែកចេញជា ០៤សង្កាត់ និង ១៥ភូមិ រួមមាន៖

-សង្កាត់លេខ១ មាន​ចំនួន ៣ភូមិ
-សង្កាត់លេខ២ ចំនួន ៣ភូមិ
-សង្កាត់លេខ៣ ចំនួន ៣ភូមិ
-សង្កាត់លេខ៤ ចំនួន ៦ភូមិ

សក្ដានុពលក្រុងព្រះសីហនុ

ភូមិសាស្រ្ត​ក្រុង​ព្រះសីហនុ​មាន​ឆ្នេរ​សមុទ្រ​ប្រវែង ២៤,៥ គីឡូម៉ែត្រ (ខេត្តព្រះសីហនុ មានឆ្នេរប្រវែង ១៧៥.៨គីឡូម៉ែត្រ ) និង​​មាន​​កោះ​ចំនួន ០៥ (កោះព្រាប កោះដែកគោល កោះពស់ កោះថាស និងកោះត្រេះ) និងមានថ្មដុះ ចំនួន ១ទីតាំង ( ខេត្តព្រះសីហនុមានកោះចំនួន ៣២ )។

បណ្តាញ​គមនាគមន៍

ក្រុង​ព្រះសីហនុ​មាន​កំពង់ផែសមុទ្រទឹកជ្រៅជាងគេបំផុតក្នុងប្រទេសកម្ពុជា។ ផ្លូវដែកមានប្រវែង ២៦៤គីឡូម៉ែត្រ ពីរាជធានីភ្នំពេញ មកក្រុងព្រះសីហនុ បច្ចុប្បន្នបានបម្រើសេវាដឹកអ្នកដំណើរ និងដឹកជញ្ជូនប្រេង និងទំនិញបម្រើឱ្យវិស័យឧស្សាហកម្ម។

ផ្លូវគោក តាមរយៈ​ផ្លូវជាតិលេខ៤ មានចម្ងាយ ២៣០គីឡូម៉ែត្រ ទៅរាជធានីភ្នំពេញ អំណោយផលសម្រាប់ការដឹកជញ្ជូនទំនិញគ្រប់ប្រភេទពីមូលដ្ឋានក្រុង ទៅកាន់រាជធានីភ្នំពេញ និងតាមបណ្តាខេត្តក្នុងប្រទេសកម្ពុជា និងជាបណ្តាញផ្លូវគោកសម្រាប់បន្តទៅខេត្តផ្សេងៗទៀត។ ​ផ្លូវល្បឿនលឿន (Express Way) ដែល​បានដាក់​ឲ្យ​ដំណើរការ​នៅ​ចុង​ឆ្នាំ​២០២២ បង្ខិតការ​ធ្វើដំណើរប្រើពេល​​​​ត្រឹម​តែ ៣ ម៉ោង​ប៉ុណ្ណោះ ហើយដែលបច្ចុប្បន្ន​បានប្រែក្លាយ​ក្រុង​ព្រះសីហនុ​​​ជា​គោលដៅ​ទីលំហែកាយ​របស់​អ្នក​ទេសចរ​​មិន​ថា​ថ្ងៃ​ធម្មតា ​និងក្នុង​ឱកាស​បុណ្យ​ជាតិ​ធំៗ។

ក្រុង​ព្រះសីហនុ​ក៏​មាន​ព្រលានយន្តហោះ​អន្តរជាតិដ៏​ធំមួយជា​អាកាសយានដ្ឋាន​អន្តរជាតិ​ទី ៣ ​របស់​កម្ពុជា សម្រួលការតភ្ជាប់​អ្នក​ដំណើរមក​​​ពី​ក្រៅ​ប្រទេស អាច​​មក​ទស្សនា​និង​កម្សាន្ត​ក្នុងទី​​ក្រុង​ឆ្នេរដ៏​ស្អាត​បំផុត​នេះ៕