ក្រសួងកសិកម្ម សម្រេច​ផ្អាក​នាំចូល​ត្រី​ពី​ប្រទេសជិតខាង ដើម្បី​លើកស្ទួយ​ការ​ចិញ្ចឹម​ត្រី​ក្នុងស្រុក

ក្រសួងកសិកម្ម រុក្ខាប្រមាញ់ និង​នេសាទ នៅ​ថ្ងៃទី​០៨ ខែមករា នេះ​បាន​អះអាង​ថា អនុវត្ត​តាម អនុសាសន៍​ណែនាំ​ដ៏​ខ្ពង់ខ្ពស់​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណា​ចក្រ​កម្ពុជា ដែល​បាន​ណែនាំ​ហើយ ណែនាំ​ទៀត​ឲ្យ​ប្រើ​ប្រាស់​ឱកាស​មាស​ក្នុង​ការដាំដុះ ចិញ្ចឹម​ត្រី និង​សត្វ ដើម្បី​ឈាន​ទៅ​ដល់​ការកាត់បន្ថយ​ការ​នាំ​ចូល និង​សំណូមពរ​របស់​សមាគម​វា​រី​វប្បករ​នៅ​កម្ពុជា​ផង​នោះ ក្រសួងកសិកម្ម រុក្ខា ប្រមាញ់ និង​នេសាទ បានធ្វើការ​ពិនិត្យ និង​ពិចារណា​ក្នុងការ​ផ្អាក​ជា​បណ្តោះ អាសន្ន​នូវ​ការនាំ​ចូល ផលិតផល​ជលផល ដែល​វា​រី​វប្បករ​ក្នុងស្រុក​អាច​ផលិត​បាន ដូចជា ត្រី​ប្រា ត្រី​ពោ ត្រី​អណ្តែង និង​ត្រី​ឆ្ពោះ​ជាដើម ដើម្បី​ជួយ​ដោះស្រាយ​បញ្ហា​ប្រឈម​ទីផ្សារ​ផលិតផល​វារីវប្បកម្ម​នាពេល​បច្ចុប្បន្ន រួមចំណែក​ជំរុញ​ការផលិត​ក្នុង ស្រក​ឲ្យ​បាន​ខ្លាំងក្លា និង​ឈានទៅរក​ការនាំចេញ​នាពេលខាងមុខ​។

ក្រសួងកសិកម្ម​អះអាង​ថា ថ្មីៗ​នេះ មាន​ក្រុម​អាជីវករ​នាំចេញ នាំចូល​ផលិតផល​ជលផល​មួយចំនួន មាន​ការ​មិន​ពេញចិត្ត​ចំពោះ​ចំណាត់ការ​នៃ​ការ​ផ្អាក​ជា​បណ្តោះអាសន្ន​នូវ​ការ​នាំចូល​ផលិតផល​ជលផល​ដែល​អាច​ផលិត​បាន​ក្នុងស្រុក​នាពេល​កន្លងមក​។ ដូចនេះ ដើម្បី​ដោះ ស្រាយ​បញ្ហា​ខាងលើ​នៅ ព្រឹក​ថ្ងៃទី​៨ ខែមករា ឆ្នាំ​២០២១ ក្រសួងកសិកម្ម រុក្ខាប្រមាញ់ និង​នេសាទ បាន​រៀប​ចំ​កិច្ចប្រជុំ​ពិភាក្សា​ជាមួយ​ភាគី​ពាក់ព័ន្ធ​រួមមាន​សមាគម​វា​រី​វប្បករ​នៅ​កម្ពុជា និង​តំណាង​អាជីវករ​នាំចេញ នាំចូល​ផល ផលិតផល ជលផល និង​បាន​ព្រមព្រៀងគ្នា​អនុវត្ត​នូវ​វិធានការ​បន្ទាន់​មួយចំនួន​ដូចខាងក្រោម​៖

​ទី​១-​សមាគម​វា​រី​វប្បករ​នៅ​កម្ពុជា​ត្រូវ​រៀបចំ​ផ្តល់ជូន​នូវ​ព័ត៌មាន​ដែល ទាក់ទង​ទៅនឹង​ប្រភេទ បរិមាណ​ផល ផលិតផល​វារីវប្បកម្ម​ដែល​ត្រូវ​ដល់ពេល​ប្រមូល​ផល​នៅតាម​ខែ​នីមួយៗ ដល់​អា​ជីករ​ប្រមូល​ទិញ នាំចេញ នាំចូល​ផល ផលិតផល​ជលផល ដើម្បី​ចុះ​ប្រមូល​ទិញ​ផល ផលិតផល​ជលផល​ដែល​ផលិត បាន​ក្នុងស្រុក​ទាំងនោះ​សម្រាប់​ផ្គត់ផ្គង់​ទីផ្សារ​ក្នុងស្រុក​។

ទី​២-​តំណាង​អាជីវករ​នាំចេញ នាំចូល​ផល ផលិតផល​ជលផល បាន​យល់ព្រម​ផ្អាក​នូវ​ការ​ស្នើសុំ​នាំចូល​ប្រភេទ​ត្រី​ដែល​វា​រី​វប្បករ​ផលិត​បាន​ច្រើន​ដូចជា ត្រី​ប្រា ត្រី​ពោ ត្រី​អណ្តែង និង ត្រី​ឆ្តោ ព្រមទាំង ប្រភេទ​ត្រី​មួយចំនួនទៀត​ដែល​អាច​ចិញ្ចឹម​បាន​ក្នុងស្រុក តាម​ការជូនដំណឹងរ​បស់​សមាគម​វា​រី​វប្បករ​នៅ​កម្ពុជា​។​

​ទី​៣-​តំណាង​អា​ជីករ​នាំចេញ នាំចូល​ផល ផលិតផល​ជលផល បាន​ឯកភាព​ក្នុងការ​បង្កើត​នូវ​សមាគម និង​បណ្តុំ​អ្នកប្រមូល​ទិញ​ផល ផលិតផល​ជល​នៅតាម​តំបន់ ដើម្បី​ប្រមូល​ទិញ​ផល ផលិតផល​ជលផល​ដែល​ផលិត​បាន​ក្នុងស្រុក​។

ទី​៤-​ចំពោះ​ការ​នាំ​ឆ្លងកាត់​ផល ផលិតផល​ជលផល តំណាង​អាជីវករ​នាំចេញ នាំចូល​ផល ផលិតផល​ជលផល ធានា​ថា​នឹង​មាន​ការចុះបញ្ជី​ទទួលស្គាល់​នៅ​ដើមទី​និង​ចុង​ទី​ពី​មន្ត្រី​ជលផល​មាន​សមត្ថកិច្ច និង​ធានា​ថា​ មិន​មាន​ការ​ទម្លាក់​ចែកចាយ​ផល ផលិតផល​ជលផល​ឆ្លងកាត់​នេះ​ចូលទៅក្នុង​ទីផ្សារ​ក្នុងស្រុក​ឡើយ​។

ក្រសួងកសិកម្ម រុក្ខាប្រមាញ់ និង​នេសាទ សង្ឃឹម​យ៉ាង​មុតមាំ​ថា វា​រី​វប្បករ អាជីវករ​នាំចេញ នាំចូល​ផល ផលិតផល​ជលផល​ទាំងអស់​សាធារណជន ក៏ដូចជា​បណ្តាញ​សារព័ត៌មាន​នានា មេត្តា​ជ្រាប ព្រមទាំង​ផ្តល់​កិច្ចសហការ ជាមួយ ក្រសួង កសិកម្ម រុក្ខាប្រមាញ់ និង​នេសាទ ក្នុងការ​បំពេញភារកិច្ច​នេះ​ឲ្យ​បាន​ល្អប្រសើរ ដើម្បី​ជា​ប្រយោជន៍​ក្នុងការ ចូលរួម​ដល់​ការអភិវឌ្ឍ​វារីវប្បកម្ម​នៅ​កម្ពុជា​៕

ដោយ ៖ កោះ​កែវ