រដ្ឋបាលខេត្តមានទិសដៅអ្វីខ្លះ ដើម្បីប្រែក្លាយ​ក្រុងបាត់ដំបង ឱ្យក្លាយជា Smart City?

រដ្ឋបាលខេត្តបាត់ដំបង នឹងប្រែក្លាយក្រុងបាត់ដំបង ឱ្យក្លាយជា Smart City​ ព្រោះក្តីស្រមៃរបស់រដ្ឋបាលខេត្ត គឺចង់ធ្វើ ឱ្យក្រុងបាត់ដំបង មានកន្លែងដែលអាច​ឱ្យបងប្អូន​ប្រជាពលរដ្ឋ​ដើរស្រួល មានផ្លូវសម្រាប់ជិះកង់ អាចដើរទៅរកផ្សាររាត្រី និងថែមទាំងអាចលំហែកាយនៅតាមដងស្ទឹងសង្កែបាន។
លោក សុខ លូ អភិបាលខេត្តបាត់ដំបង លើកឡើងបែបនេះ នៅក្នុងសន្និសីទ​សារព័ត៌មាន​ ស្ដីពី​ “ភាពជោគជ័យ​ ក្នុង​រយៈ​ពេល​ ៥​ឆ្នាំ​​” របស់​រដ្ឋបាល​ខេត្ត​បាត់​ដំបង នាទីស្តីការគណៈរដ្ឋមន្ត្រី ព្រឹកថ្ងៃទី២៤ មករា ២០២៣ នេះ។

បើតាមអភិបាលខេត្តបាត់ដំបង មានគម្រោងផែនការធំៗមួយចំនួន ដែលរដ្ឋបាលខេត្តកំពុងសិក្សា និងត្រៀមអនុវត្ត ក្នុងទិសដៅដើម្បីប្រែក្លាយក្រុងបាត់ដំបងឱ្យក្លាយជា Smart City ។ ក្នុងនោះ រួមមានគម្រោងព្រលានយន្តហោះ វាលបែកចាន គម្រោងផ្លូវអាកាស គម្រោងអភិវឌ្ឍនផ្លូវដែកទៅជាប្រភេទផ្លូវរថភ្លើងល្បឿនលឿន គម្រោងកសាងទីលានចាក់សំរាមធំថ្មី ដើម្បីរំដោះសំរាមពីទីក្រុង និងគម្រោងស្តារប្រព័ន្ធលូក្រោមដី បូករួមនឹងការកែលំអមួយចំនួនផ្សេងទៀត។

លោក សុខ លូ បញ្ជាក់ថា អ្វីដែលកាន់តែពិសេសសម្រាប់ខេត្តនេះ គឺផ្លូវដែលតភ្ជាប់ខេត្តបាត់ដំបង នឹងខេត្តដដៃទៀត ជា​ច្រើន។ លោករំលឹកថា បច្ចុប្បន្នរដ្ឋបាលខេត្តបាត់ដំបង ទទួលគោលការណ៍ពីរាជរដ្ឋាភិបាល លើគម្រោងផ្លូវ សៀមរាប​-បាត់ដំបង (ជាផ្លូវកាត់ ៧៤គីឡូម៉ែត្រ) ដែលរដ្ឋបាលខេត្តរំពឺងថា នឹងជួយនាំទេសចរពីសៀមរាបមកបាត់ដំបង បន្ថែមទៀត ក្នុងបំណងជំរុញកំនើនសេដ្ឋកិច្ចដល់បងប្អូនប្រជាពលរដ្ឋ ក្នុងខេត្តបាត់ដំបង។ និងផ្លូវមួយខ្សែទៀត គឺផ្លូវពីបាត់ដំបងទៅកោះកុង ដែលមានចម្ងាយប្រមាណ ១៩៧គីឡូម៉ែត្រ កាត់តាមសំឡូត វាលវែង អូសោម រហូតដល់កោះកុង និងមានឆ្លងកាត់ កំពង់សោមផងដែរ ដែលគម្រោងនេះនឹងរួចរាល់នៅឆ្នាំ២០២៤ សាងសង់បានប្រហែល ៦០%-៧០% ។

រដ្ឋបាលខេត្តទទួលស្គាល់ថា បងប្អូនប្រជាពលរដ្ឋរស់នៅក្នុងតំបន់ខ្លះ ពិតជាមានផលលំបាក ដោយសារតែក្រុងបាត់ដំបងកំពុងស្ថិតក្នុងការអភិវឌ្ឍន៍ ស្តារ និងធ្វើប្រព័ន្ធលូរំដោះទឹក ហេតុនេះលោកស្នើឱ្យមានការយោគយល់ និងលើកឡើងថា “ស៊ូលំបាកក្នុងរយៈពេលខ្លី តែយើងបានផលប្រយោជន៍រយៈពេលយូរអង្វែង” ៕