ឃាត់ខ្លួនជនជាតិកូរ៉េ ៦ នាក់ ពាក់ព័ន្ធ Online Scams នៅក្រុងបាត់ដំបង

កម្លាំងចម្រុះ នៃគណៈបញ្ជាការឯកភាពរដ្ឋបាលខេត្តបាត់ដំបង ចុះប្រតិបត្តិការបង្រ្កាបបទល្មើស (Online Scams) នៅទីតាំងផ្ទះវីឡា ១ កន្លែង ក្នុងភូមិចំការសំរោង ២ សង្កាត់ចំការសំរោង ក្រុងបាត់ដំបង ដោយឃាត់ខ្លួនជនជាតិកូរ៉េចំនួន ៦ នាក់ និង អ្នកបើកបរម្នាក់ដែលជាជនជាតិខ្មែរ។

ប្រតិបត្តិការនេះ កាលពីព្រឹកថ្ងៃទី ២៨ ខែឧសភា ឆ្នាំ ២០២៦ ម្សិលមិញ ក្រោមការបញ្ជាផ្ទាល់ពី លោក សុខ លូ អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត។

ជាលទ្ធផល ក្រុមការងារ រកឃើញជនជាតិកូរ៉េចំនួន ៦ នាក់​ ភេទប្រុស ជាមុខសញ្ញា (Online Scams) ដែលទើបមកស្នាក់នៅ កាលពីថ្ងៃទី ២២ ខែឧសភា ឆ្នាំ ២០២៦ ហើយត្រូវបានសង្ស័យជាប់ប្រតិវេទក្រហមដែលត្រូវបញ្ជូនទៅអគ្គស្នងការនគរបាលជាតិទាំងមនុស្ស ទាំងវត្ថុតាង។ ដោយឡែក ជនជាតិខ្មែរម្នាក់ ជាអ្នកដឹកជញ្ជូនជនបរទេសដែលជាមុខសញ្ញា (Online Scams) ចល័តពីទីតាំងមួយទៅទីតាំងមួយទៀត កំពុងចាត់ការតាមនីតិវិធី ជាមួយនឹងម្ចាស់ផ្ទះជួល។ ចំពោះផ្ទះជួល ត្រូវបានបិទសៀលរួចប្រគល់ជូនគណៈបញ្ជាការឯកភាពរដ្ឋបាលក្រុងទទួលខុសត្រូវ។

គណៈបញ្ជាការឯកភាពរដ្ឋបាលខេត្ត បាននិងកំពុងបន្តស្រាវជ្រាវ ដើម្បីបង្ការ ទប់ស្កាត់ និង បង្ក្រាបការបំបែកខ្លួនជាទ្រង់ទ្រាយតូចៗ របស់ជនប្រព្រឹត្តបទល្មើស (Online Scams) នេះ និង មានផែនការតាមចាប់មេខ្លោងទាំងឡាយណាដែលមកលាក់ខ្លួនក្នុងភូមិសាស្ត្រខេត្តបាត់ដំបង ដោយអនុវត្តឲ្យខាងតែបានតាមច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា។

ទន្ទឹមនឹងការបង្ក្រាបនេះដែរ រដ្ឋបាលខេត្ត ក៏បានសំណូមពរដល់ប្រជាពលរដ្ឋដែលបានជួលផ្ទះឲ្យជនបរទេស ត្រូវរាយការណ៍ជូនប៉ុស្តិ៍នគរបាលរដ្ឋបាលតាមខ្លឹមសារ នៃអនុក្រឹត្យលេខ ០៣ អនក្រ. បក ស្ដីពីការគ្រប់គ្រងសន្តិសុខ សុវត្ថិភាព តាមទីតាំងរស់នៅប្រមូលផ្តុំ បើមិនដូច្នេះទេ នឹងទទួលរងការផាកពិន័យ ដោយជនបរទេសម្នាក់ បួនលានរៀល រួមទាំងទោសទណ្ឌផ្សេងៗ ទៀត តាមច្បាប់ខាងលើ៕
អត្ថបទ ៖ សោ និយមរ័ត្ន