សន្តិសុខសង្គម

ក្រុមចោរចាស់ក្មេងផ្លោះរបង ចូលលួចលុយផ្ទះលក់ទំនិញ យកប្រាក់បានរាប់លានរៀល ត្រូវជាប់ខ្នោះសមត្ថកិច្ចក្រុងបាត់ដំបង

បានផុស

៤ ខែ មុន

នៅ

ថ្ងៃអង្គារ ២៤ មីនា ២០២៦

ដោយ

កម្លាំងសមត្ថកិច្ចជំនាញនៃអធិការក្រុងបាត់ដំបង បានធើ្វការស្រាវជ្រាវក្រុមជនសង្ស័យចាស់ក្មេងមួយក្រុមដែលបានធើ្វសកម្មភាពបន្លំចូលលួចលុយក្នុងផ្ទះប្រជាពលរដ្ឋអស់ចំនួនជិត៥០០លានរៀល រួមជាមួយគ្រឿងអលង្ការមួយចំនួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ពីកម្លាំងសមត្ថកិច្ចបានឱ្យដឹងថា កាលពីថ្ងៃទី១៨ ខែមីនា ឆ្នាំ២០២៦ មានករណី«បន្លំចូលលួចលុយ» នៅផ្ទះអ្នកលក់ដូរសម្លៀកបំពាក់បោះដុំមួយកន្លែង នៅចំណុចភូមិផ្កាស្លា សង្កាត់ចំការសំរោង ក្រុងបាត់ដំបង។ ក្រោយពីទទួលបណ្ដឹងពីជនរងគ្រោះ មន្ត្រីជំនាញរបស់បានធ្វើការស្រាវជ្រាវកំណត់ទៅលើមុខសញ្ញាលើកញ្ញាវ័យក្មេងៗ ដែលពួកនាងធ្លាប់ដើរចូលផ្ទះគេកន្លងមក ហើយធ្លាប់ត្រូវកម្លាំងរបស់លោកចាប់យកមកអប់រំ តែលើកនេះលែងចូលលួចដៃធ្ងន់តែម្ដង។

លោកសមត្ថកិច្ចបានបញ្ជាក់ថា តាមការពិនិត្យកន្លែងកើតហេតុ ពួកនាងៗបានឡើងផ្លោះរបងខាងក្រោយផ្ទះ រួចចូលតាមទ្វារក្រោយ ខណៈម្ចាស់ផ្ទះកំពុងនៅលក់ដូរខាងមុខ។ ពួកនាងបានចូលកាយលួចយកលុយដាក់ថង់និង គ្រឿងអលង្ការមួយចំនួន បោះចេញទៅក្រៅរបងខាងក្រោយ រួចនាំគ្នាជញ្ជូនចេញរត់គេចខ្លួនបាត់ស្រមោល។

រង្វង់ប្រតិបត្តិការណ៍ស្រាវជ្រាវនេះកម្លាំងសមត្ថកិច្ចកំណត់មុខសញ្ញាបានចំនួន ០៣នាក់នោះ រួមមាន៖ ១ឈ្មោះ-វង់ កញ្ញា ភេទស្រី អាយុ១៦ឆ្នាំ រស់នៅភូមិពពាលខែ ឃុំអូរតាគី ស្រុកថ្មគោល, ២-ឈ្មោះ ម៉ុន ម៉ុត ភេទស្រី អាយុ៣៩ឆ្នាំ (២នាក់នេះជាម្ដាយនិងកូន) និង៣-ឈ្មោះ ប៉ាកកា ជីឡូរី ភេទស្រី អាយុ១៦ឆ្នាំ ស្នាក់នៅមិនពិតប្រាកដ។ ក្រុមជនសង្ស័យវ័យក្មេង និងចាស់ទាំង០៣នាក់នេះ ត្រូវបានកម្លាំងជំនាញនៃអធិការក្រុងបាត់ដំបងធ្វើការស្រាវជ្រាវ តាមឃាត់ខ្លួនបានជាបន្តបន្តាប់ ជាមួយនឹងការរឹបអូសវត្ថុតាងបានមួយចំនួន ប្រាក់ខ្មែរចំនួន២៦៧,៩៥០,០០០លានរៀល (ពីររយហុកសិបប្រាំពីរលានកៅសិបប្រាំម៉ឺនរៀល) ,ខ្សែលោហៈពណ៌លឿងចំនួន០៤ខ្សែ, ផ្លាកដៃលោហៈពណ៌លឿងចំនួន០១ខ្សែ , ខ្សែដៃលោហៈពណ៌លឿងចំនួន០១ខ្សែ, ក្រវិលលោហៈពណ៌លឿង០១គូ ,បន្ដោងព្រះចំនួន០១ ,ម៉ូតូម៉ាកស្គូពីគ្មានលេខ០១គ្រឿង, ទូរស័ព្ទចំនួន០៤គ្រឿង រួមជាមួយវត្ថុតាងពាក់ព័ន្ធមួយទៀត។