ព័ត៌មានជាតិ

កម្ពុជា-ជប៉ុនឯកភាពរៀបចំកម្មវិធីអ្នកនយោបាយវ័យក្មេងកម្ពុជាឡើងវិញ

បានផុស

២ years មុន

នៅ

ថ្ងៃពុធ ២៥ មករា ២០២៣

ដោយ

កម្ពុជា-ជប៉ុន ឯកភាពគ្នាចាប់ផ្ដើមរៀបចំឡើងវិញកម្មវិធីសម្រាប់អ្នកនយោបាយវ័យក្មេងកម្ពុជា ក្រោយខកខានដោយសារជំងឺរាតត្បាតកូវីដ១៩ ដើម្បីស្វែងយល់ពីដំណើរការលទ្ធិប្រជាធិបតេយ្យនៅប្រទេសទាំងពីរ។

ការឯកភាពនេះបានធ្វើឡើងតាមរយៈជំនួបទ្វេភាគីរវាងរដ្ឋមន្ត្រីការបរទេសកម្ពុជា-ជប៉ុន ក្នុងឱកាសដែលលោករដ្ឋមន្ត្រី ប្រាក់ សុខុន ធ្វើទស្សនកិច្ចនៅទីក្រុងតូក្យូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសទស្សនកិច្ចនេះ រដ្ឋមន្ត្រីការបរទេសទាំងពីរបានពិភាក្សាគ្នាដោយត្រង់ទៅត្រង់មក និងប្រកបដោយផ្លែផ្កាអំពីវិធីសាស្ត្រ និងមធ្យោបាយនានាក្នុងការធ្វើឲ្យកាន់តែស៊ីជម្រៅ និងពង្រីកបន្ថែមទៀតភាពជាដៃគូយុទ្ធសាស្ត្រគ្រប់ជ្រុងជ្រោយ ដែលទើបបានដំឡើង កាលពីពេលថ្មីៗនេះ។

ភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ជប៉ុន គឺបានពង្រីកកិច្ច សហប្រតិបត្តិការលើវិស័យជាច្រើន រួមមាន៖ នយោបាយ សន្តិសុខ ការពារជាតិ ពាណិជ្ជកម្ម វិនិយោគ ទេសចរណ៍ ការអភិវឌ្ឍហេដ្ឋារចនាសម្ព័ន្ធ ការបោស សម្អាតមីន និងការផ្លាស់ប្តូររវាងប្រជាជន និងប្រជាជន ព្រមទាំងការលើកស្ទួយប្រជាធិបតេយ្យនៅកម្ពុជា។

ពាក់ព័ន្ធនឹងបញ្ហាប្រជាធិបតេយ្យនៅកម្ពុជា រដ្ឋមន្ត្រីទាំងពីរបានឯកភាពឲ្យមានការចាប់ផ្តើមឡើងវិញនូវកម្មវិធីសម្រាប់អ្នកនយោបាយវ័យក្មេងកម្ពុជា ដែលត្រូវបានខកខានដោយសារជំងឺរាតត្បាតសកល ដើម្បីស្វែងយល់ពីដំណើរការលទ្ធិប្រជាធិបតេយ្យពហុបក្សនៅប្រទេសជប៉ុន។

ទន្ទឹមនេះ ភាគីទាំងពីរក៏បានប្តេជ្ញាចិត្តក្នុងការរក្សាខ្ជាប់នូវកិច្ចសន្ទនាស្តីពីស្ថានភាពសិទ្ធិមនុស្ស ដែលមានស្រាប់រវាងប្រទេសទាំងពីរ និងបានពិចារណាក្នុងការដំឡើងកម្រិតយន្តការពិគ្រោះយោបល់ទ្វេភាគី ដែលបច្ចុប្បន្នពីថ្នាក់ឧត្តមមន្ត្រី ទៅថ្នាក់អនុរដ្ឋមន្ត្រី។

ចំពោះវិស័យសន្តិសុខ ប្រមុខការទូតកម្ពុជា-ជប៉ុន បានស្វាគមន៍នូវកិច្ចសហប្រតិបតិ្តការ និងទំនាក់ទំនងយ៉ាងសកម្មលើវិស័យសន្តិសុខ និងការពារជាតិ ដែលបានឆ្លុះបញ្ចាំងតាមរយៈការផ្លាស់ប្តូរទស្សនកិច្ចរវាងនាយទាហាននៃប្រទេសទាំងពីរ និងការចូលចតរបស់នាវានៃកងកម្លាំងស្វ័យការពារជើងទឹកជប៉ុននៅកំពង់ផែស្វយ័តក្រុងព្រះសីហនុរបស់កម្ពុជាកាលពីឆ្នាំមុន។

ទាក់ទិននឹងការធ្វើពាណិជ្ជកម្ម ប្រមុខការទូតទាំងពីរបានសម្តែងការរីករាយចំពោះការកើនឡើងនូវទំហំពាណិជ្ជកម្មរវាងប្រទេសទាំងពីរ ដែលបានឈានទៅជិតដល់កម្រិមួយគួរឲ្យកត់សម្គាល់ មុនវិបតិ្តជំងឺកូវីដ-១៩ ជាពិសេសលំហូរយ៉ាងខ្លាំងនៃការវិនិយោគពីប្រទេសជប៉ុនចូលមកកម្ពុជា។ ដើម្បីពង្រីកទំហំពាណិជ្ជកម្មរវាងកម្ពុជា-ជប៉ុន ភាគីទាំងពីរក៏បានឯកភាពធ្វើការជិតស្និទ្ធជាមួយគ្នាបន្ថែមទៀតក្នុងការលើកកម្ពស់កិច្ចសហប្រតិបតិ្តការសេដ្ឋកិច្ចដែលកំពុងរីកចម្រើននេះ រួមទាំងការជំរុញឲ្យមានការហោះហើរផ្ទាល់ឡើងវិញរវាងកម្ពុជា និងជប៉ុន ផងដែរ៕