ឈប់ឆ្ងល់! អាកាសធាតុប្រែប្រួល ក្ដៅ ត្រជាក់ មិនទៀងទាត់ ​មន្ត្រីជំនាញពន្យល់មូលហេតុមួយចំនួន​

អាកាសធាតុមានការផ្លាស់ប្ដូរដែលយើងអាច​សង្កេតឃើញជាក់ស្ដែង​ដូចជា ​ការធ្លាក់ភ្លៀង​មិនទៀងទាត់​នារដូវប្រាំង ការផ្លាស់ប្ដូរពីត្រជាក់ទៅក្ដៅ ពីក្ដៅមកត្រជាក់វិញ ដោយសារ​តែការ​ប្រែប្រួលអាកាសធាតុ ការឡើងកម្ដៅផែនដី និងបញ្ហាពាក់ព័ន្ធជាមួយ​នឹងឧស្ម័នផ្ទះ​កញ្ចក់​ ​ដែលចេញពីការបំភាយឧស្ម័នចេញពីផែនដី។ នេះបើតាមការឱ្យដឹងពីលោក នេត ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ប្រាប់កម្ពុជាថ្មី នៅថ្ងៃទី ២៦ ខែមករា ឆ្នាំ ២០២៣។

លោក នេត ភក្ត្រា បញ្ជាក់ថា ការប្រែប្រួលអាកាសធាតុគឺពាក់ព័ន្ធនឹងកត្តាមនុស្ស ធម្មជាតិផ្សេងៗ ដែលមានវិស័យចំនួន ៧ ដែលបានបំភាយឧស្ម័នផ្ទះកញ្ចក់ ទី១ ​វិស័យដឹកជញ្ជូន ​ការប្រើ​ប្រាស់​នូវមធ្យោបាយ​ឥន្ធនៈផូស៊ីល ​ធ្វើឱ្យផ្សែងបំភាយចូលក្នុងបរិយាកាស។ ទី២ ការបញ្ចេញថាមពល ទី៣ សំណង់ ការសាងសង់ផ្សេងៗក៏វាពាក់ព័ន្ធធូលីចូលទៅក្នុងបរិយាកាសដែរ ទី ៤ គឺពាក់ព័ន្ធ​ជាមួយនឹងព្រៃឈើ ទី ៥ ពាក់ព័ន្ធនឹងការប្រើប្រាស់ដី និងទី ៧ ពាក់ព័ន្ធជាមួយសំរាម ដែល​ចំហេះ​ចេញពីការដុតសំរាមធ្វើឱ្យមានការបំភាយឧស្ម័ន​នៅក្នុងបរិយាកាស​ដែល​គេហៅថា ឧស្ម័ន​ផ្ទះកញ្ចក់ ដែលធ្វើឱ្យមានកំណកធ្វើឱ្យផែនដីមានកម្ដៅ។

មន្ត្រីក្រសួងបរិស្ថានដដែលរូបនេះ បន្តថា ជាវិធានការ​នៅក្នុងការគ្រប់គ្រងការប្រែប្រួលអាកាសធាតុ រាជរដ្ឋាភិបាល​បានចូលរួម​យ៉ាងសកម្មជាមួយពិភពលោក ទោះបីជាកម្ពុជា​ ជាប្រទេសតូចមែន ក៏ប៉ុន្តែ​មានភាពសកម្មនៅក្នុងការងារទប់ស្កាត់ កាត់បន្ថយផលប៉ះពាល់ចេញពីការប្រែប្រួល​អាកាស​ធាតុ។

​រាជរដ្ឋាភិបាលកម្ពុជាបានអនុវត្តនូវផែនការសកម្មភាពបន្ស៊ាំទៅនឹងការប្រែប្រួលអាកាសធាតុ ព្រមទាំង​រៀបចំនូវផែនការអភិវឌ្ឍរយៈពេលវែង ដើម្បីធ្វើអព្យាក្រឹត្យកាបោន ដើម្បីគ្រប់គ្រង​ទៅលើ​ការបំភាយ​ឧស្ម័នផ្ទះកញ្ចក់។

លោក នេត ភក្ត្រា បានលើកឧទាហរណ៍ថា ដូចជាការប្រើប្រាស់ពីចរន្តអគ្គិសនី ដែលធ្វើពីទំនប់​វារីអគ្គិ​សនី ​ប្រព័ន្ធសូឡា ដែលទាញពន្លឺព្រះអាទិត្យយកមកប្រើប្រាស់ នេះហើយដែលគេហៅថាជាថាម​ពលស្អាត ដែលចូលរួមក្នុងការកាត់បន្ថយការប្រើប្រាស់នូវធ្យូងថ្ម ប្រើប្រាស់នូវប្រេងឥន្ធនៈ ដើម្បី​បង្កើតជាថាមពល។

ពាក់ព័ន្ធជាមួយនឹងមធ្យោបាយដឹកជញ្ជូន បច្ចុប្បន្ននេះ រាជរដ្ឋាភិបាល​បានជំរុញ​ទៅលើការប្រើប្រាស់នូវប្រភេទរថយន្តថ្មីៗ ក៏ដូចជារថយន្តប្រើប្រាស់អគ្គិសនី ដើម្បីកាត់បន្ថយចំហេះប្រេងឥន្ធនៈ។

បើតាម លោក នេត ភក្ត្រាដើម្បីការពារខ្លួនពីការប្រែប្រួលអាកាសធាតុ ​ទី១ គឺប្រជាពលរដ្ឋត្រូវអនុវត្តផែនការសកម្មភាពដែលដាក់ចុះ ដោយរាជរដ្ឋាភិបាល ​ដែលធ្វើការសិក្សា វាយតម្លៃ ក៏ដូចជាពិនិត្យទៅលើបច្ចេកទេស និងវិធីសាស្ត្រ ក្នុងការអនុវត្តក្នុងនោះ គឺបងប្អូនប្រជាពលរដ្ឋ អាចចូលរួមក្នុងការកាត់បន្ថយការឡើងកម្ដៅផែនដី តាមរយៈការកាត់បន្ថយ ឬការប្រើប្រាស់នូវមធ្យោបាយដឹកជញ្ជូនដែលប្រើប្រាស់ពីថាមពលករកើតឡើងវិញ។ ទី២ យើងគ្រប់គ្រងសំណល់យើងឱ្យបានល្អ ឧទាហរណ៍ថា នៅផ្ទះ សំណល់របស់យើង ១០០% យើង អាចបែងចែកថាសំណល់សរីរាង្គ និងអាចធ្វើជាជីកំប៉ុស្ដិ៍ សំណល់ប្លាស្ទិចអាចប្រើប្រាស់ឡើងវិញ ឬកាត់បន្ថយការប្រើប្រាស់ដើម្បីកុំឱ្យមានកំណើនសំរាមនៅលើភពផែនដី៕