ព័ត៌មានជាតិ

នគរបាលខេត្តកំពង់ចាម ស្រាវជ្រាវបង្ក្រាបបទល្មើសគ្រឿងញៀន ឃាត់ជនសង្ស័យជាច្រើននាក់

បានផុស

៥ years មុន

នៅ

ថ្ងៃពុធ ១៣ មករា ២០២១

ដោយ

ជនសង្ស័យប្រុស ស្រី ជាច្រើននាក់ ត្រូវកម្លាំងនគរបាលខេត្តកំពង់ចាម ស្រាវជ្រាវបង្ក្រាបជាបន្តបន្ទាប់ និងចាប់យកវត្ថុតាងពាក់ព័ន្ធមួយចំនួនធំ ។

សមត្ថកិច្ចប្រាប់ឱ្យដឹងថា ដោយបានការអនុញ្ញាតពីលោក សុធា ពិសិដ្ឋ ព្រះរាជអាជ្ញារង អមសាលាដំបូងខេត្តកំពង់ចាម កម្លាំងជំនាញការិយាល័យប្រឆាំងគ្រឿងញៀនខេត្ត រួមជាមួយកម្លាំងជំនាញ អធិការដ្ឋាននគរបាលស្រុកព្រៃឈរ កម្លាំងជំនាញ អធិការដ្ឋាននគរបាលស្រុកកំពង់សៀម និងកម្លាំងជំនាញអធិការដ្ឋាននគរបាលក្រុងកំពង់ចាម ដឹកនាំដោយលោកឧត្តមសេនីយ៍ត្រី ជីវ សេងរស់ ស្នងការរងទទួលផែនការងារប្រឆាំងគ្រឿងញៀនខេត្ត បានបើកកិច្ចប្រតិបត្តិការចុះបង្រា្កបករណីជួញដូរដោយខុសច្បាប់នូវសារធាតុញៀន ដោយប្រើវិធានញុះញង់ ឃាត់ខ្លួនជនសង្ស័យ៨នាក់ ( ស្រី០១នាក់ ) កាលពីថ្ងៃទី១០ ខែមករា ឆ្នាំ២០២១ វេលាម៉ោង១៣និង៣០នាទី នៅចំណុច វត្តមៀន ភូមិត្រពាំងក្រសាំង ឃុំត្រពាំងព្រះ ស្រុកព្រៃឈរ ខេត្តកំពង់ចាម ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងប្រតិបត្តិការនេះ សមត្ថកិច្ចដកហូតវត្ថុតាងរួមមាន៖ ម្សៅក្រាមពណ៌ស ជាគ្រឿងញៀន ចំនួន៨៤កញ្ចប់ (ធំចំនួន ០៥កញ្ចប់), ទូរស័ព្ទដៃចំនួន០៨គ្រឿង និងរថយន្តធំ ចំនួន០២គ្រឿង។

សមត្ថកិច្ចប្រាប់បន្តថា ដោយបានចម្លើយសារភាពពីជនសង្ស័យ លុះនៅវេលាម៉ោង៦ព្រឹក ថ្ងៃទី១២ ខែមករា ឆ្នាំ២០២១ កម្លាំងជំនាញខេត្តកំពង់ចាម និងជំនាញអធិការស្រុកជើងព្រៃ បន្តសហការជាមួយជំនាញស្នងការដ្ឋាននគរបាលខេត្តកណ្តាល ជំនាញអធិការដ្ឋានស្រុកស្អាង និងប៉ុស្តិ៍នគរបាលរដ្ឋបាលក្រាំងយ៉ូវ ដឹកនាំផ្ទាល់ដោយលោក សុធា ពិសិដ្ឋ ព្រះរាជអាជ្ញារងអមសាលាដំបូងខេត្តកំពង់ចាម បានបន្តឃាត់ខ្លួនជនសង្ស័យបន្ថែម២១នាក់( ស្រី០១នាក់ ) ។

នៅក្នុងប្រតិបត្តិការនេះ ដកហូតវត្ថុតាងរួមមាន៖ ម្សៅក្រាមពណ៌ស សង្ស័យជាថ្នាំញៀន ចំនួន ៤២កញ្ចប់ (ធំ០៦កញ្ចប់) ទូសព្ទ័ដៃចំនួន ២០គ្រឿង រថយន្តចំនួន ០២គ្រឿង កាំភ្លើងកែឆ្នៃ ចំនួន ០១ដើម ស្រោមកាំភ្លើង K៥៤ ចំនួន០១ ស្លាកលេខខេមរភូមិន្ទ ០២បន្ទៈ អាយកូម០១គ្រឿង អាវខេមរៈភូមិន្ទ ថ្នាក់ឧត្តមសេនីយ៍ត្រី ក្លែងក្លាយ ចំនួន០១សម្រាប់ និងថង់វេចខ្ចប់មួយចំនួនធំ។

បច្ចុប្បន្នជនសង្ស័យរួមនិងវត្ថុតាង ត្រូវបានសមត្ថកិច្ចបាននាំទៅកាន់ការិយាល័យប្រឆាំងគ្រឿងញៀន ដើម្បីចងក្រងសំណុំរឿងចាត់ការតាមនិតិវិធី ៕

អត្ថបទ ៖ រ៉ាវុទ្ធ