សម្តេចតេជោ ហ៊ុន សែន នាយករដ្ឋមន្រ្តី បានស្នើដល់ក្រសួងអប់រំ ក្រសួងសេដ្ឋកិច្ច និងក្រសួងការងារ ផ្តល់ការបណ្តុះ​បណ្តាលវិជ្ជាជីវៈដូនតា ដូចជា តម្បាញ ចម្លាក់ គំនូរ ស្មូន និងផ្សេងៗទៀត រង្វង់ ២-៤ភាគរយ ក្នុងចំណោមសិស្ស និស្សិតក្រីក្រ ១លាន ៥សែននាក់ ដែលជំនាញនេះ ទទួលបន្ទុកដោយក្រសួង​វប្បធម៌​ និង​វិចិត្រ​សិល្បៈ​។

សម្តេចថ្លែងដូច្នេះថា« ឥឡូវនេះ អាចបែងចែកវិជ្ជាជីវៈនៃសិស្សក្រីក្រសម្រាប់សកលវិទ្យាល័យនានា ដែលបាននិងកំពុង​ទទួលការ​បណ្តុះបណ្តាលស្រាប់…ព្រោះអ្នកទទួលបានការបណ្តុះបណ្តាលទាំង ១លាន ៥សែននាក់ បណ្តុះបណ្តាល​ដោយឥតបង់ថ្លៃ ហើយថែមទាំងទទួលបាននូវប្រាក់ឧបត្ថម្ភពីរដ្ឋថែមទៀត»។

ថ្លែងក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យធនធានមនុស្ស ថ្ងៃទី២០ ខែកុម្ភៈ ឆ្នាំ២០២៣ សម្តេច ហ៊ុន សែន ស្នើដល់លោក ហង់ ជូនណារ៉ុន រដ្ឋមន្រ្តីក្រសួងអប់រំ ពិនិត្យមើលចំនួនសាលាដែលកំពុងធ្វើការ​បណ្តុះ​បណ្តាល​វិជ្ជាជីវៈ ដោយមានការលើកទឹកចិត្ត និងបន្តខិតខំបំពេញបេសកកម្មនេះ ដើម្បីងាយរកកាងារធ្វើ រួមចំណែកផ្តល់​ចំណេះដឹងវិជ្ជាជីវៈត្រឹមត្រូវដល់ពលរដ្ឋខ្មែរ ក្នុងបំណងបម្រើដល់ការអភិវឌ្ឍកាន់តែលឿន​ឆ្ពោះទៅគោល​ដៅសេដ្ឋកិច្ចផ្អែកលើចំណេះដឹង។

សម្តេចសង្កត់ធ្ងន់ថា ការធ្វើដូចនេះ ដើម្បីឱ្យសិស្សក្រីក្រមានឱកាសសម្រាប់ទទួលបាននូវការបណ្តុះបណ្តាល។ បើតាមសម្តេច ការបណ្តុះបណ្តាលវិជ្ជាជីវៈនេះ មិនកម្រិតលក្ខខណ្ឌខ្ពស់នោះទេ។ ការបណ្តុះបណ្តាលនេះ អាចធ្វើ​ឡើងតាមគ្រឹះស្ថានសិក្សានានា ដែលមានកម្មវិធីបណ្តុះបណ្តាលនេះស្រាប់មិនថា គ្រឹះស្ថានរដ្ឋ ឬឯកជនឡើយ។ នេះជាការបន្ថែមរបស់សម្តេចតេជោ។

សូមបញ្ជាក់ថា រាជរដ្ឋាភិបាល​ នឹងបើកវគ្គបណ្តុះបណ្តាលដល់និស្សិតក្រីក្រកម្ពុជា ជាង​ ១លាន ៥សែននាក់ ឱ្យបានចូលសិក្សាចំណេះជំនាញបច្ចេកទេស វិជ្ជាជីវៈ នៅចុងឆ្នាំ២០២៣​ និងឆ្នាំ២០២៤​ ដោយទទួលបាន​ប្រាក់ឧបត្ថម្ភពីរដ្ឋ នៅកំឡុងពេលរៀននេះផងដែរ៕