​ប្រទេស​ ៤ មាន ថៃ​ អូស្ត្រាលី ព្រុយ​ណេ និង​ចិន ​បាន​ប្រកាស​ផ្ដល់​អាហារូបករណ៍​សម្រាប់​​ឆ្នាំ​សិក្សាថ្មី​ ២០២៣-​២០២៤​​។

ក្រសួង​អប់រំ យុវជន និង​កីឡា កាល​ពី​ពេល​ថ្មី​ៗ​បាន​បង្ហោះព័ត៌មានពី​ការ​​ផ្ដល់​អាហារូបករណ៍​ដល់​សិស្ស-និស្សិត​ ដែល​មាន​បំណង​ចង់​បន្ត​ការ​សិក្សា​នៅ​ក្រៅ​ប្រទេស​ទាំង​ថ្នាក់​បរិញ្ញាបត្រ បរិញ្ញាបត្រ​ជាន់​ខ្ពស់ និង​ថ្នាក់​បណ្ឌិតលើ​ជំនាញ​សិក្សា​ជា​ច្រើនគួប​ផ្សំ​អត្ថប្រយោជន៍​ជា​ច្រើន​ផង​ដែរ។

អាហារូបករណ៍​ដែល​ផ្តល់​ដោយ​​ប្រទេស​ទាំង ៤​ មាន​ដូច​ជា៖

១. អាហារូបករណ៍​​របស់​ប្រទេស​ថៃ​

ក្រោម​កម្មវិធី “Boon Rawd Scholarship 2023” សាកលវិទ្យាល័យ Mae Fah Luang ខេត្ត​ឈៀង​រ៉ៃ នៃ​ព្រះរាជាណាចក្រ​ថៃ ​បាន​ប្រកាស​ជ្រើសរើស​និស្សិត​កម្ពុជា ២ រូប​ សិក្សា​ថ្នាក់​បរិញ្ញាបត្រ​ជាន់​ខ្ពស់ ឆ្នាំ​សិក្សា​២០២៣-​២០២៤​។ តាមរយៈ​​អាហារូបករណ៍​ពី​សាកលវិទ្យាល័យ Mae Fah Luang​ នឹង​ផ្ដល់​ជូន​និស្សិត​កម្ពុជា​នៅ​ថ្លៃ​សិក្សា ថ្លៃ​​ជួល​អន្តេវាសិកដ្ឋាន ប្រាក់​ឧបត្ថម្ភ​ម្នាក់ ៦ ពាន់​បាត ក្នុងមួយខែ និង​ការ​ធានា​រ៉ាប់រង​សុខភាព​ផង​​ដែរ។

បេក្ខជន​មាន​ចំណាប់​អារម្មណ៍​ចំពោះ​អាហារូបករណ៍​ខាងលើ​អាច​បំពេញ​សំណុំ​បែប​បទ ភ្ជាប់ជា​មួយ​នឹង​ឯកសារ​ចាំ​បាច់​នានា តាម​រយៈ​​គេហទំព័រ https://shorturl.asia/E6NqV រួច​ផ្ញើ​ជូន​ស្ថានទូត​កម្ពុជា​ប្រចាំ​ព្រះរាជាណាចក្រ​ថៃ តាម​រយៈ​ក្រសួងការបរទេស និង​សហ ប្រតិបត្តិការ​អន្តរជាតិ ឲ្យ​បាន​មុន​ថ្ងៃទី៣១ ខែ​ឧសភា ឆ្នាំ២០២៣។

២. អាហារូបករណ៍​​របស់​ប្រទេស​ព្រុយ​ណេ

ក្នុង​ឆ្នាំ​សិក្សា​ ២០២៣-២០២៤​ សាកលវិទ្យាល័យ Brunei Darussalam (UBD) នឹង​ផ្ដល់​អាហារូបករណ៍ ថ្នាក់​​បរិញ្ញាបត្រ​ជាន់ខ្ពស់លើ​មុខ​ជំនាញ Public Policy and Management (MPPM) សិក្សា​រយៈពេល ១២ខែ​ (ដោយ ឆមាស​​ទី១ សិក្សា​នៅ UBD និង ១ ឆមាស​ទៀត សិក្សា​នៅ​សាកលវិទ្យាល័យ​ណា​មួយនៅ​សហរដ្ឋអាមេរិក)។

កាលបរិច្ឆេទ​នឹង​​ផុត​កំណត់​នៅ​ថ្ងៃ​ទី៦ ខែ​ឧសភា ឆ្នាំ​២០២៣​ ខាង​មុខ​នេះ​។ សម្រាប់​ព័ត៌មាន​លម្អិត​បេក្ខជន​អាច​ចូល​ទៅ​កាន់​គេហទំព័រ https://ips.ubd.edu.bn//master-of-public-policy-and-management-by-coursework/da។

៣.​ អាហារូបករណ៍​របស់​ប្រទេស​អូស្ត្រាលី

តាម​រយៈ​កម្ម​វិធី​អាហារូបករណ៍​”Australia Awards Scholarships Intake 2024″ ​​រដ្ឋាភិបាល​អូស្ត្រាលី បាន​បើក​ឱកាស​ដល់​និស្សិត​កម្ពុជា​សម្រាប់​សិក្សា​ថ្នាក់​បរិញ្ញាបត្រជាន់​ខ្ពស់ និង​​ថ្នាក់​បណ្ឌិត ​ដោយ​ផ្ដោត​លើ​និស្សិត​ដែល​មាន​ជីវភាព​ក្រីក្រ​ ឬ​ពិការភាព ក៏​ដូច​ជា​ជនជាតិ​ដើម​ភាគតិច​ ជា​ពិសេស​ស្ត្រី​ដែល​មក​ពី​តំបន់​ដាច់​ស្រយាល​​ជា​ដើម។

ចំពោះ​ សិស្ស​-និស្សិត​ ដែល​ចង់​ទៅសិក្សា​នៅ​ក្រៅ​ទេស​ត្រូវ​ដាក់​ពាក្យ​ឲ្យ​បាន​មុន​ថ្ងៃទី១ ខែឧសភា ឆ្នាំ២០២៣។ ទន្ទឹម​នេះ សម្រាប់​ព័ត៌មាន​លម្អិត​បេក្ខជន​អាច​ចូល​ទៅ​កាន់ https://www.australiaawardscambodia.org/contact/1 ។

​៤.អាហារូបករណ៍​របស់​ប្រទេស​ប្រជាមានិត​ចិន

សាធារណៈ​រដ្ឋ​ប្រជាមានិត​ចិន​ ផ្តល់​អាហារូបករណ៍​​ច្រើន​កន្លែងលើ​ការ​សិក្សា​ថ្នាក់​បរិញ្ញាបត្រ​ជាន់​ខ្ពស់ (រយៈពេល១-៣ឆ្នាំ) និង​ថ្នាក់បណ្ឌិត (រយៈពេល ៣ឆ្នាំ ) លើ​មុខ​ជំនាញ​ជា​ច្រើន​ ដល់​មន្ត្រី​រាជការ​កម្ពុជា​ក្នុង​ឆ្នាំ​សិក្សា​២០២៣-២០២៤​ ក្រោម​កម្ម​វិធី​អាហារូបករណ៍​ “MOFCOM ”។

និស្សិត​កម្ពុជា​អាច​ទទួល​បាន​​អត្ថប្រយោជន៍​ពី​អាហារូបករណ៍​មួយ​នេះ ដូច​ជា​ ការ​រ៉ាប់រង​ថ្លៃ​សិក្សា, កន្លែង​ស្នាក់​នៅ, ការ​ធ្វើ​ដំណើរ​​កម្ពុជា-សាធារណរដ្ឋប្រជាមានិតចិន និង​អត្ថប្រយោជន៍​ផ្សេង​ៗ ហើយ​ហ្នឹង​ផុត​កំណត់​នៅ​ថ្ងៃ​ទី​១៦ ខែ​ឧសភា ឆ្នាំ​២០២៣​ ខាងមុខ​នេះ៕

ប្រភព៖ ក្រសួងអបរំ យុវជន និងកីឡា