​អាជ្ញាធរកំពុងរង់ចាំលទ្ធផលត្រីពុលងាប់នៅស្ទឹងព្រែកត្នោត​

អាជ្ញាធរខេត្តកំពង់ស្ពឺកំពុងរង់ចាំលទ្ធផលបញ្ជាក់ពីមូលហេតុ ត្រីពុលអណ្ដែតងាប់នៅស្ទឹងព្រែក​ត្នោត ស្ថិតក្នុងភូមិមួយចំនួន ក្នុងស្រុកភ្នំស្រួច ខេត្តកំពង់ស្ពឺ។

​លោក វ៉ី សំណាង អភិបាលខេត្តកំពង់ស្ពឺបានឱ្យដឹងនៅរសៀលថ្ងៃទី ១៩ ខែឧសភា ឆ្នាំ ២០២៣ នេះថា ទឹកភ្លៀងធ្លាក់នៅផ្នែកខាងលើហើយហូរចូលអាងប្រព្រឹត្តិកម្មចម្រោះទឹកកខ្វក់របស់រោងចក្រផលិតដំណាប់ស្វាយ (Boengket Planting & Industrial Co., Ltd) ដោយសារតែទឹកហូរពីខាងលើមក​ត្រូវប្រើរយៈ​ពេលយូរ ១ ថ្ងៃ ឬ ២ ថ្ងៃបានមកដល់ស្ទឹងព្រែកត្នោត ក៏ឃើញមានករណីពុលត្រី។

លោក វ៉ី សំណាង បញ្ជាក់ថា រោងចក្រផលិតដំណាប់ស្វាយនោះ ​មានអាងប្រព្រឹត្តិកម្មទឹកដែរ ប៉ុន្តែបរិមាណទឹកច្រើនមិនដូចអ្វីដែលរោងចក្របានគិតទុក ដូចជាមានភ្លៀងធ្លាក់បន្ថែម ប៉ុន្តែលោកបានឱ្យមន្ត្រីចុះសិក្សាស្វែងរកការពិតរួចហើយ នឹងអាចសន្និដ្ឋានមូលហេតុពិតប្រាកដឆាប់ៗនេះ។ ត្រីដែលងាប់ជាត្រីធម្មជាតិសុទ្ធសាធ។

នៅព្រឹកថ្ងៃទី ១៩ ខែឧសភា ឆ្នាំ២០២៣ មានករណីត្រីតូចធំបានពុលងាប់អណ្ដែតទឹក ជាច្រើនក្បាល ស្ថិតនៅ នៅភូមិពាមទុង ឃុំត្រែងត្រយឹង និងនៅភូមិកុមារពេទ្យ ភូមិចេក និងភូមិក្រាំងរលួស ស្ថិតក្នុងឃុំអូរ ស្រុកភ្នំស្រួច ខេត្តកំពង់ស្ពឹ៕

អត្ថបទ៖ ឡេង ដេត