លោក វ៉ី សំណាង៖ រោងចក្រចំនួន ៦ទៀត គ្រោងបោះទុនវិនិយោគជាង ៥០លានដុល្លារ នៅខេត្តកំពង់ស្ពឺ

លោក វ៉ី សំណាង អភិបាលខេត្តកំពង់ស្ពឺ បានឱ្យដឹងថា រោងចក្រចំនួន៦ រួមមាន រោងចក្រផលិតកាបូប ស៊ីលីកូន គ្រឿងកែច្នៃ សម្ផស្ស ក្រដាសវេចខ្ចប់ និងរបស់របរប្រើប្រាស់របស់សត្វសុនខ គ្រោងបោះទុនវិនិយោគប្រមាណ ៥០លានដុល្លារ នៅខេត្តកំពង់ស្ពឺ ដោយបានបង្កើតការងារដល់កម្មករ កម្មការិនីប្រមាណ ៦ពាន់ ទៅ ១ម៉ឺនកន្លែង។
ដំណឹងល្អសម្រាប់ខេត្តកំពង់ស្ពឺនេះ ក្រោយពីលោក វ៉ី សំណាង បានអនុញ្ញាតឱ្យតំណាងក្រុមហ៊ុនយូម៉ាក មកពីប្រទេសអាល្លឺម៉ង់ និងចិន ចូលជួបសម្តែងការគួរសម និងពិភាក្សាការងារ នាថ្ងៃទី ២៤ ឧសភានេះ។

តាមរយៈហ្វេសប៊ុកផ្លូវការរបស់លោកអភិបាលខេត្ត បានសរសេរដូច្នេះថា« សូមស្វាគមន៍ការអញ្ជើញ​មកកាន់ទឹកដីខេត្តកំពង់ស្ពឺ របស់ក្រុមហ៊ុនយូម៉ាក»។

លោក វ៉ី សំណាង អភិបាលខេត្តកំពង់ស្ពឺ បានប្រាប់កម្ពុជាថ្មីកន្លងមកថា ការខិតខំប្រឹងប្រែងទាក់ទាញវិនិយោគិន​ឱ្យចូលមក​វិនិយោគនៅខេត្តកំពង់ស្ពឺនេះ គោលបំណង ដើម្បីផ្តល់ប្រយោជន៍ដល់ពលរដ្ឋនៅក្នុងស្រុកដោយផ្ទាល់ តាមរយៈ​ការបង្កើតការងារផ្តល់ប្រាក់ចំណូលសម្រាប់ទ្រទ្រង់ជីវភាព។ លើសពីនេះទៀត ក្រៅតែពីការផ្តល់ប្រាក់ចំណូល​សម្រាប់​ពលរដ្ឋហើយនោះ ការវិនិយោគបង្កើតរោចក្រសហគ្រាស ត្រូវតែបង់ពន្ធជូនរដ្ឋជាប្រចាំ ដែលចំណូល​បានពីការ​ប្រមូលពន្ធនេះ នឹងបានជាប្រយោជន៍សម្រាប់​យកទៅអភិវឌ្ឍហេដ្ឋា​រចនាសម្ព័ន្ធនានា ជាពិសេសបាន​ជួយដល់​កំណើនសេដ្ឋកិច្ចជាតិផងដែរ។

បើតាមលោកអភិបាលខេត្ត បច្ចុប្បន្ននេះ ខេត្តកំពង់ស្ពឺ មានរោងចក្រសហគ្រាសទាំងតូចទាំងធំ ដែលកំពុងដំណើរ​ប្រមាណជាង ១៧០០ ក្នុងនោះ សម្រាប់រោងចក្រកាត់ដេរសម្លៀកបំពាក់ស្បែកជើងមានចំនួនជិត ២០០ក្រុមហ៊ុន៕