សិស្ស​ត្រូវ​សម្រេចចិត្ត​ជ្រើសរើស​មុខវិជ្ជា​សិក្សា​ឲ្យ​បានច្បាស់លាស់​ពី​ថ្នាក់​ទី​១០​

​លោក ប៉ិច បូ​ឡែ​ន​ ប្រធាន​សហព័ន្ធ​សេវាកម្ម​អប់រំ​កម្ពុជា​បាន​ឲ្យ​ដឹង​ថា​ សិស្ស​ត្រូវ​គិតគូរ​និង​សម្រេច​ចិត្ត​ឲ្យ​ច្បាស់​ក្នុងការ​ជ្រើសរើស​មុខវិជ្ជា​សិក្សា​ផ្នែក​វិទ្យាសាស្ត្រ​ពិត​ឬ​វិទ្យាសាស្ត្រ​សង្គម ពី​ថ្នាក់​ទី​១០​ទៅ​ឲ្យ​ហើយ​ដើម្បី​កសាង​មូលដ្ឋានគ្រឹះ​ដ៏​រឹងមាំ​មួយ​សម្រាប់​ឈានទៅ​ចាប់យក​ជំនាញ​សិក្សាពិត​ប្រាកដ​មួយ​នៅ​សាកលវិទ្យាល័យ​ ឬ​វិទ្យាស្ថាន​បច្ចេកទេស​ផ្សេងៗក៏ដូចជា​ពង្រឹង​សមត្ថភាព​ការងារ​។​

លោក​បាន​បន្តថា ​«​សិស្ស​ខ្លះ​ចូលរៀន​ខុស​ជំនាញ ដោយសារ​នៅ​វិទ្យាល័យ​ពួកគេ​ខិតខំ​រៀន​សូត្រ​តែ​មុខវិជ្ជា​វិទ្យាសាស្ត្រ​សង្គម ពីព្រោះ​មិន​ចង់​ប្រើ​ខួរក្បាល​ និង​មិន​ចូលចិត្ត​ការគិត វិភាគ​ស្មុគស្មាញ​ច្រើន តែ​នៅពេល​រៀន​ចប់​វិទ្យាល័យ​ បែរជា​ជ្រើស​រើសយក​ជំនាញ​ផ្នែក​វិស្មកម្ម ឬ​ហិរញ្ញវត្ថុ​ទៅវិញ​ដែល​ជំ​នាញ​ទាំងនោះ​ត្រូវ​ប្រើ​មុខវិជ្ជា​វិទ្យាសាស្ត្រ​ពិត​ជួយ​គាំទ្រ​។​ កត្តា​នេះហើយ​ដែល​ធ្វើ​ឲ្យ​ការសិក្សា​ខុស​ទិសដៅ និង​មិន​ទទួលបាន​ជោគជ័យ​»​។​

លោក​បាន​បន្តទៀតថា​ យោងតាម​ការកំណត់​របស់​ក្រសួង​អប់រំយុវជន និង​កីឡា​បាន​បែង​ចែកជា​ពីរ​ផ្នែក​មុខវិជ្ជា​សិក្សា គឺ​ផ្នែក​វិទ្យាសាស្ត្រ​ពិត​មានមុខ​វិជ្ជា គណិតវិទ្យា​ គីមីវិទ្យា រូបវិទ្យា ជីវវិទ្យា ឯ​ផ្នែក​វិទ្យាសាស្ត្រ​មានមុខ វិជ្ជាភាសា​ខែ្មរ ភូមិវិទ្យា ប្រវត្តិវិទ្យា​ សីលធម៌​និង​ពលរដ្ឋវិទ្យា ផែនដីវិទ្យា និង​ភា​សា​បរទេស​ ហើយ​ចាប់​អនុវត្ត​នៅ​ថ្នាក់​ទី​១២​។​

​លោក​បាន​បញ្ជាក់ថា ​សម្រាប់​ប្រទេស​កំពុង​អភិវឌ្ឍ​ គឺ​ត្រូវ​ការ​ជំនាញ​ផ្នែក​វិទ្យាសាស្ត្រ​ពិត​ច្រើន​ជាង​គេ ដូចជា​ផ្នែក​វិស្វកម្ម ​ស្ថាបត្យកម្ម​ សរសេរ​កូដកម្ម​វិធីវិជ្ជ​សាស្ត្រ បច្ចេកវិទ្យា វិភាគ​សេដ្ឋកិច្ច វិភាគ​ហិរញ្ញវត្ថុ​ជាដើម​ ដែល​ជំនាញ​ទាំងនោះ​មាន​ឪ​កាស​ទទួល​ការងារ​ច្រើនជាមួយនឹង​ប្រាក់បៀវត្សរ៍​ក៏​ច្រើន​គួរសម​ដែរ​៕

អត្ថបទ​ ៖ ​សំអឿន​