ទោះមិនមានអគារសិក្សា​​ សិស្សានុសិស្សដែលភៀសសឹកមកស្នាក់នៅវត្តព្រះបាទ៤ស្ថាន​ បានបន្តរៀនក្រោមដើមឈើ

ទោះចាកចេញពីផ្ទះសម្បែង ចាកចេញឆ្ងាយពីសាលា​ សិស្សានុសិស្សមិនបានបោះបង់ចោលការសិក្សា​ នៅចុងសប្តាហ៍ថ្មីៗ ក្នុងថ្ងៃទី២០ ខែធ្នូ ឆ្នាំ២០២៥ សិស្សានុសិស្សដែលបានភៀសសឹកមកស្នាក់នៅវត្តព្រះបាទ៤ស្ថាន​ ស្រុកសូទ្រនិគម ​បានសិក្សាជាមួយនឹងលោកគ្រូ អ្នកគ្រូដែលបានភៀសសឹកនៅទីតាំងជាមួយគ្នា។ បើទោះបីមិនមានអគារសិក្សា​ក៏ដោយ​ សិស្សានុសិស្សបានរៀនក្រោមដើមឈើលើកម្រាលតង់ផ្ទាល់ដីដោយយកចិត្តទុកដាក់បំផុត។

លោករដ្ឋបាលខេត្ត បានថ្លែងអំណរគុណយ៉ាងជ្រាលជ្រៅចំពោះលោកគ្រូ អ្នកគ្រូដែលបានឆ្លៀតឱកាសបង្រៀនដល់សិស្សានុសិស្សបានរៀនបន្ត ទោះបីមិនបានសិក្សានៅក្នុងថ្នាក់ក៏ដោយ ក៏ពួកគាត់នៅតែបន្តសិក្សាបានដោយមិនបោះបង់ការសិក្សានោះឡើយ។

សូមបញ្ជាក់ផងដែរថា​ គិតមកដល់ពេលនេះសិស្សានុសិស្សាប្រមាណជាង​ ៩ពាន់នាក់បានភៀសសឹក​ និងបានរៀនតាមសាលា​សម្រាប់សិស្សថ្នាក់ធំ​ និងតាមបណ្តាទីតាំងវត្តអារ៉ាមដែលបងប្អូនភៀសសឹកស្នាក់នៅ៕

ដោយ៖ គឿន វេត