ទីប្រឹក្សា ជំនួយការរដ្ឋសភា មិនអាចប្រើសិទ្ធិអំណាចខ្លួន ទៅអនុវត្តក្នុងតំណែង ក្របខណ្ឌមន្ត្រីរាជការឡើយ

សេចក្ដីសម្រេចស្ដីពីគោលការណ៍នៃការតែងតាំងទីប្រឹក្សានិងជំនួយការរដ្ឋសភាបានកំណត់ថា  ទីប្រឹក្សានិងជំនួយការប្រធានរដ្ឋសភានិងអនុប្រធានរដ្ឋសភា មិនអាចប្រើប្រាស់សិទ្ធិអំណាចរបស់ខ្លួន ដើម្បីយកទៅអនុវត្តនៅក្នុងមុខតំណែងនៃក្របខណ្ឌមន្ត្រីរាជការ អគ្គលេខាធិការដ្ឋានរដ្ឋសភាឡើយ។

សេចក្ដីសម្រេចនេះបានកំណត់ឱ្យ រដ្ឋសភា មានទីប្រឹក្សា និងជំនួយការតាមការចាំបាច់។ ទីប្រឹក្សានិងជំនួយការ ត្រូវតែងតាំងដោយ ព្រះរាជក្រឹត្យតាមសេចក្តីស្នើរបស់ប្រធានរដ្ឋសភា ឬត្រូវតែងតាំងដោយសេចក្ដីសម្រេចរបស់ប្រធាន រដ្ឋសភា។

ជាមួយគ្នានេះ ប្រធាននិងអនុប្រធានរដ្ឋសភា មានទីប្រឹក្សានិងជំនួយការតាមការចាំបាច់។ ទីប្រឹក្សានិងជំនួយការ ត្រូវតែងតាំងដោយព្រះរាជក្រឹត្យតាមសេចក្ដីស្នើរបស់ប្រធានរដ្ឋសភា ឬត្រូវតែងតាំងដោយសេចក្តីសម្រេច របស់ប្រធានរដ្ឋសភា។

បើតាមសេចក្ដីសម្រេចស្ដីពីគោលការណ៍នៃការតែងតាំងទីប្រឹក្សានិងជំនួយការរដ្ឋសភា  ការតែងតាំងទីប្រឹក្សានិងជំនួយការរដ្ឋសភា ទីប្រឹក្សានិងជំនួយការប្រធានរដ្ឋសភានិងអនុប្រធាន រដ្ឋសភា ត្រូវបំពេញតាមគោលការណ៍ និងលក្ខខណ្ឌដូចជា៖

ទី១ មន្ត្រីនយោបាយ ឬបុគ្គលផ្សេងទៀត ដែលមិនស្ថិតនៅក្នុងក្របខណ្ឌជាមន្ត្រីរាជការស៊ីវិល មន្ត្រីនគរបាល ឬយោធិន អាចទទួលបានការតែងតាំងជាទីប្រឹក្សា ឬជំនួយការរដ្ឋសភា ដោយបាន ទទួលការផ្ដល់ឋានៈស្មើ បន្ថែមលើមុខងារបច្ចុប្បន្ន និងប្រាក់បំណាច់កម្រិតណាមួយបាន ។ ទី២ ការតែងតាំងមន្ត្រីរាជការនៃអគ្គលេខាធិការដ្ឋានរដ្ឋសភា ឱ្យបំពេញមុខងារជាទីប្រឹក្សាឬជំនួយការ រដ្ឋសភា ទីប្រឹក្សាឬជំនួយការប្រធានរដ្ឋសភានិងអនុប្រធានរដ្ឋសភា បន្ថែមលើមុខងារបច្ចុប្បន្ន មិនត្រូវ ធ្វើឱ្យប៉ះពាល់ដល់ការអនុវត្តកាតព្វកិច្ចជាមន្ត្រីរាជការ ហើយមិនមានការផ្តល់ឋានៈស្មើ និងប្រាក់បំណាច់ ឡើយ។ ទី៣ មន្ត្រីរាជការស៊ីវិល មន្ត្រីនគរបាលជាតិ និងយោធិន អាចទទួលការតែងតាំងជាទីប្រឹក្សា ឬជំនួយការនៃរដ្ឋសភា បន្ថែមលើមុខងាបច្ចុប្បន្នបាន ក្នុងលក្ខខណ្ឌដែលមន្ត្រីរាជការសាមីនោះ មិនទទួលបានការផ្ដល់ឋានៈស្មើ និងប្រាក់បំណាច់បន្ថែមកម្រិតណាមួយឡើយ។

ទី៤ មេធាវី ឬអ្នកវិជ្ជាជីវៈសេរី ដែលកំពុងប្រកបវិជ្ជាជីវៈអាចទទួលការតែងតាំងជាទីប្រឹក្សា ឬជំនួយការរដ្ឋសភា និងទីប្រឹក្សា ឬជំនួយការប្រធានរដ្ឋសភានិងអនុប្រធានរដ្ឋសភា ក្នុងលក្ខខណ្ឌ ដែលមិនមានការផ្តល់ឋានៈស្មើ និងប្រាក់បំណាច់កម្រិតណាមួយឡើយ។ ទី៥ មេធាវី ឬអ្នកវិជ្ជាជីវៈសេរី ដែលមិនប្រកបវិជ្ជាជីវៈអាចទទួលការតែងតាំងជាទីប្រឹក្សានិង ជំនួយការរដ្ឋសភា ទីប្រឹក្សានិងជំនួយការប្រធានរដ្ឋសភានិងអនុប្រធានរដ្ឋសភា ដោយទទួលបានការ ផ្តល់ឋានៈស្មើ និងប្រាក់បំណាច់កម្រិតណាមួយបាន។ទី៦ បុគ្គលដែលជាសមាជិកក្នុងក្រុមប្រឹក្សាភិបាល ឬគ្រប់គ្រងក្រុមហ៊ុនឯកជន ឬបុគ្គលដែលទទួល បានគោរមងារឧកញ៉ា អាចទទួលបានការតែងតាំងជាទីប្រឹក្សា ឬជំនួយការរដ្ឋសភា ក្នុងលក្ខខណ្ឌដែល មិនមានការផ្តល់ឋានៈស្មើ និងប្រាក់បំណាច់កម្រិតណាមួយឡើយ។

ផ្អែកតាមសេចក្ដីសម្រេចស្ដីពី គោលការណ៍នៃការតែងតាំងទីប្រឹក្សានិងជំនួយការរដ្ឋសភា មុខតំណែងទីប្រឹក្សានិងជំនួយការរដ្ឋសភា ត្រូវបញ្ចប់នៅពេលចប់នីតិកាលនីមួយៗនៃរដ្ឋសភា។ មុខតំណែងទីប្រឹក្សានិងជំនួយការប្រធានរដ្ឋសភានិងអនុប្រធានរដ្ឋសភា ត្រូវបញ្ចប់នៅពេលដែល ប្រធាននិងអនុប្រធានរដ្ឋសភា ត្រូវបានបញ្ចប់មុខតំណែង។

ចំពោះប្រាក់បំណាច់របស់ទីប្រឹក្សានិងជំនួយការរដ្ឋសភា  ទីប្រឹក្សានិងជំនួយការប្រធានរដ្ឋសភានិងអនុប្រធានរដ្ឋសភា ដែល មានឋានៈស្មើ ទទួលបានប្រាក់បំណាច់ប្រចាំខែ តាមសេចក្តីសម្រេចរបស់ប្រធានរដ្ឋសភា៕