អាវុធហត្ថខេត្តបាត់ដំបង ឃាត់ខ្លួនជនសង្ស័យ​២នាក់ ករណីប្រើប្រាស់ឯកសណ្ឋាន និងក្លែងបន្លំឯកសារកងទ័ព

កម្លាំងកងរាជអាវុធហត្ថខេត្តបាត់ដំបង កាលពីថ្ងៃទី១៨ ខែមីនា ឆ្នាំ២០២៤ បានចុះបង្រ្កាបករណីប្រើប្រាស់ឯកសណ្ឋាន និងក្លែងបន្លំឯកសារកងទ័ព ដោយឃាត់ខ្លួនជនសង្ស័យចំនួន២នាក់ ដើម្បីអនុវត្តនីតិវិធីច្បាប់។

ការឃាត់ខ្លួនជនសង្ស័យដែលប្រាស់ឯកសណ្ឋាន និងក្លែងបន្លំឯកសារកងទ័ពនេះ បានធ្វើឡើងកាលពីវេលាម៉ោង១១និង១៥​នាទី ថ្ងៃទី១៨ ខែមីនា ឆ្នាំ២០២៤ ដឹកនាំលោកវរសេនីយ៍ឯក ហួត សុភាព មេបញ្ជាការរងទទួលការងារស្រាវជ្រាវព័ត៌មានសន្ដិសុខ ស្ថិតនៅភូមិព្រៃសង្ហា ឃុំខ្នាចរមាស ស្រុកបវេល ខេត្តបាត់ដំបង។

ក្នុងប្រតិបត្តិការនេះ កម្លាំងបានឃាត់ខ្លួនជនសង្ស័យចំនួន២នាក់ឈ្មោះ កាន់ យ៉ុង ភេទប្រុស អាយុ៥០ឆ្នាំ មុខរបរឃួងអណ្ដូង រស់នៅភូមិព្រៃសង្ហា ឃុំខ្នាចរមាស ស្រុកបវេល ខេត្តបាត់ដំបង។ ឈ្មោះ សួង តារា ភេទប្រុស អាយុ៣៩ឆ្នាំ មុខរបរលក់ដូរ រស់នៅភូមិគោកក្ដួច ឃុំតាពូង ស្រុកថ្មគោល ខេត្តបាត់ដំបង។

ក្រោយពីឃាត់ខ្លួនកម្លាំងបានរកឃើញវត្ថុតាង និងសម្ភារមួយចំនួន ព្រមទាំងដករថយន្ដម៉ាកហាយឡិនឌ័រ ពណ៌ទឹកប្រាក់សេរីឆ្នាំ២០០៤ ស្លាកលេខ ភ្នំពេញ2AG-8425។ ជនសង្ស័យទាំង២នាក់ រួមទាំងវត្ថុតាងត្រូវបាន បញ្ជូនបន្តដើម្បីអនុវត្តតាមនីតិវិធីច្បាប់៕

អត្ថបទ៖ សុខុម